36-SONLI MAKTABDA «SALOM YaNGI YIL» DEB NOMLANGAN TADBIR OʻTKAZILDI

Yangi yil hamma orziqib kutadigan, xushkayfiyat bilan nishonlaydigan katta bayram. Ushbu ertaknamo bayram, ayniqsa, bolajonlar uchun juda quvonchli. Shu munosabat bilan oʻtkazilgan tadbirlarda unutilmas taassurotlarga boy boʻlgan turli tomoshalar namoyish etilib, sovgʻalar ulashiladi.

Bayram arafasida Amudaryo tumanidagi 36-sonli maktabda ham 5- va 6-sinf oʻquvchilari ishtirokida yangi yil bayramiga bagʻishlab, “Salom Yangi yil” deb nomlangan tadbir oʻtkazildi.

Maktabning 5-“V” sinfi rahbari Muhabbat Tursunboyeva hamda 6-“A” sinfi rahbari Dilnura Boboniyozova tashkilotchiligida oʻtkazilgan ushbu tadbirda oʻquvchilar sahna koʻrinishlarini, yangi yil haqidagi qoʻshiq va sheʼrlarni ijro etishdi.

Bayramona bezatilgan sinfxonada tashkil etilgan tadbirda oʻquvchilar qorbobo va qorqiz, ertaklar va sevimli multfilmlar qahramonlari liboslarida ishtirok etdilar.

Yangi yil bayrami tomoshalarida turli ertak va multfilmlar qahramonlar orqali rostgoʻylik, halollik va hamisha ezgulikka intilib yashashdek insoniy fazilatlar ulugʻlanadi. Bu kabi tomoshalar bolajonlar qalbida  yuksak insoniy tuygʻularni mustahkamlaydi, ularni ona yurtga sadoqatli boʻlishga oʻrgatadi, asar qahramonlaridan saboq olib, faqat aʼlo baholarga oʻqishga, tinch va osuda hayotimizning qadriga yetishga undaydi.

Tadbirga tashrif buyurgan Qorbobo dastlab oʻqituvchilarni va barcha oʻquvchilarni kirib kelayotgan yangi yil bayrami bilan tabriklab, ezgu tilaklar bildirdi. Shuningdek, bugungi kunda yosh avlod tarbiyasi, taʼlim olishi, sogʻligi, komil inson boʻlib voyaga yetishi, kasb-hunarni mustahkam egallashi va hayotda oʻz oʻrniga ega boʻlishi davlatimiz siyosatida eng ustuvor vazifalardan biriga aylangani, bu borada keng miqyosdagi ishlar amalga oshirilgani xususida toʻxtaldi.

Oʻz navbatida Prezidentimiz rahnamoligida yaratilayotgan keng sharoit va imkoniyatlar yosh avlodning zamonaviy bilim va kasb-hunarlarni puxta oʻzlashtirishi, ilm-fan, madaniyat, sport va boshqa sohalarda isteʼdod va salohiyatini namoyon etishi uchun mustahkam zamin boʻlib xizmat qilayotganini taʼkidladi.

Shundan soʻng, har ikkala sinf oʻquvchilari yangi yil bayrami haqida quvnoq qoʻshiqlar va sheʼrlar, dilrabo raqslar ijro etishdi.

Tadbirda oʻquvchilarning sevimli ertaklari asosidagi sahna koʻrinishlari ham namoyish qilindi. Qorbobo, Qorqiz, turli ertak va multfilm qahramonlari rollari oʻquvchilar tomonidan ijro etildi. Barcha tomoshalarni oʻquvchilar katta qiziqish va maroq bilan koʻrib, dildan yayradilar.

Bayram tomoshalari oʻquvchilarga olam-olam zavq bagʻishladi. Ular yangi yilga monand bezatilgan sinfxonada Qorbobo, Qorqiz va turli ertaklar qahramonlari bilan birga qoʻshiq aytib, raqs tushdi. Tadbir davomida Qorbobo tomonidan turli xil qiziqarli oʻyinlar oʻtkazilib, oʻyin soʻngida gʻolib ishtirokchilarga ajoyib sovgʻa-salomlar ulashildi.

Butun yurtimiz boʻylab davom etgan yangi yil bayrami shodiyonalari kabi 36-sonli maktabda oʻquvchilarga quvonch, bayramona kayfiyat, qalbiga ezgulik ulashish maqsadida oʻtkazilgan ushbu tadbir ham barchaga bir olam quvonch va unutilmas taassurotlar baxsh etdi.

O.Xudoyberganova, 36-sonli maktabning ijodiy-madaniy masalalar boʻyicha targʻibotchisi.