ТУМАН АДЛИЯ БЎЛИМИ ЎТГАН ЙИЛ ДАВОМИДА САМАРАЛИ ФАОЛИЯТ КЎРСАТДИ

Ўтган 2021 йилда Адлия вазирлиги тизимида замонавий бошқарув услублари амалиётга  жорий этилиши муносабати билан туман Адлия бўлими иш фаолиятида талабчанлик кучайтирилиб, ходимларнинг масъулияти янада ошди. Бунинг натижасида бўлим олдига қўйилган вазифаларни амалга ошириш, жумладан фуқаролар мурожаатлари билан ишлаш, мониторинглар ўтказиш, туман даражасидаги идора ва ташкилотларда ҳуқуқни қўллаш амалиётини ўрганиш, қонунчиликдаги янгиликлар ва давлат сиёсатини етказиш борасидаги ишларда самарадорлик ортди.

Бўлимга 2021 йил давомида жами 223 та ариза ва шикоят келиб тушди. Ушбу мурожаатларнинг 160 тасини ариза, 60 тасини шикоят ташкил қилиб, келиб тушган мурожаатларнинг 214 таси ҳал қилинди. Шулардан қаноатлантирилган ариза ва шикоятлар 131 тани, ҳуқуқий тушунтириш берилганлари 82 тани ташкил қилди. Айрим мурожаатлар тааллуқлилиги бўйича тегишли ташкилотларга юборилиб, айримлари кўрилмасдан қолдирилди.

Шунингдек, бевосита шахсий қабулларда жами 165 нафар фуқаро қабул қилинди, 34 нафар фуқаронинг мурожаати қабул қилди. Норма ижодкорлиги соҳасида эса турли соҳаларга оид қонунчиликни такомиллаштириш юзасидан 27 та таклиф берилди. Халқ депутатлари туман Кенгашининг 4 та ва туман ҳокимининг 4 та норматив-ҳуқуқий ҳужжат лойиҳалари ҳуқуқий экспертизадан ўтказилди.

Бўлим томонидан фуқароларнинг ҳуқуқ ва манфаатларини ҳимоя қилиш борасида ҳам муайян ишлар амалга оширилди. Жумладан, 93 нафар фуқаронинг манфаатида фуқаролик ва маъмурий судларга жами 91 та даъво ариза ва суд буйруғи тартибидаги аризалар киритилиб, 59 таси қаноатлантирилди. Киритилган даъво аризалар натижасида фуқароларнинг иш ҳақи ва устама пуллари, болалар нафақа пуллари ундириб берилди. Айрим фуқароларнинг мурожаатига кўра, мансабдор шахсларнинг ғайриқонуний хатти-ҳаракатини бартараф қилиш билан боғлиқ, фарзандига туғилиш гувоҳномаси олиш каби масалалари қонуний ҳал қилинди ва ушбу даъво аризалар натижасида фуқаролар фойдасига 840 млн.дан ортиқ миқдордаги иш ҳақи, етказилган моддий ва маънавий зарарлари ундириб берилди.

Бундан ташқари, 65 та идора ва ташкилотларда 21 та ўрганиш ва 47 та мониторинглар ўтказилди. Шундан, 8 та ўрганиш ижтимоий-иқтисодий соҳада ҳуқуқни қўллаш амалиётига, 6 таси инсон ҳуқуқларини ҳимоя қилиш соҳасига, 2 таси юридик хизмат фаолиятига, 5 таси давлат бошқаруви самарадорлигини таҳлил қилиш соҳасига оид бўлди. Ўрганишларнинг 47 таси мурожаатлар асосида ўтказилди. Ушбу ўрганиш ва мониторинглар давомида 7830 та қонун бузилиш ҳолатлари аниқланди. Мазкур ҳолатлари бўйича идора ва ташкилотларга жами 116 та тақдимномалар киритилди. Шунга кўра, 12 нафар шахс интизомий жавобгарликка тортилди, 73 нафар мансабдор шахснинг қонунга хилоф ҳаракатсизлиги ва 2 та ғайриқонуний ҳужжат ижроси тўхтатилди, яна 8 та ҳужжат бекор қилинди. Тақдимномалар асосида фуқаро ва ташкилотларнинг 282 млн. сўмдан зиёд пул маблағлари ундирилиб, қайтариб берилди.

Идора ва ташкилот раҳбарларининг фуқаролар мурожаатлари билан ишлашда ва ходимларнинг меҳнат ҳуқуқларига риоя қилишда йўл қўйган қонунбузилиш ҳолатлари сабабли бўлим томонидан маъмурий жавобгарликка тортиш юзасидан йил давомида 12 та таклиф берилди. Бу бўйича тўғридан тўғри расмийлаштирилган баённомалар 8 тани ташкил қилиб, 4 нафар мансабдор шахснинг ноқонуний хатти-ҳаракатлари юзасидан тегишли идораларга таклиф берилди. Натижада 12 нафар мансабдор шахс маъмурий жавобгарликка тортилди.

Фуқароларнинг ҳуқуқий онги ва маданиятини ошириш юзасидан ҳам салмоқли ишлар амалга оширилди. Айниқса, бу борада тумандаги оммавий ахборот воситалари билан ҳамкорлик жуда самарали бўлди. Хусусан, ўтган йил давомида бўлим ходимлари томонидан ахборот воситаларида 263 та чиқишлар қилинди, оғзаки ҳуқуқий-тарғибот 522 тани, кўргазмали тарғибот 24 тани ташкил этди.

Амударё туман Адлия бўлими томонидан 2021 йил давомида амалга оширилган ишлар сарҳисоби келтирилган рақамларда самарали кўринса-да, аслида бўлим фаолиятига бўлган баҳони халқимиз беради. Зеро, ҳар бир эришган ютуқлармиз орқасида инсон ва жамият манфаатлари турганлигини чуқур англаймиз ва келажакда ҳам хизмат вазифамизни янада маъсулият билан давом қилдирамиз.

М.Матюсупов, туман Адлия бўлими бошлиғи.