TUMAN ADLIYa BOʻLIMI OʻTGAN YIL DAVOMIDA SAMARALI FAOLIYaT KOʻRSATDI

Oʻtgan 2021-yilda Adliya vazirligi tizimida zamonaviy boshqaruv uslublari amaliyotga  joriy etilishi munosabati bilan tuman Adliya boʻlimi ish faoliyatida talabchanlik kuchaytirilib, xodimlarning masʼuliyati yanada oshdi. Buning natijasida boʻlim oldiga qoʻyilgan vazifalarni amalga oshirish, jumladan fuqarolar murojaatlari bilan ishlash, monitoringlar oʻtkazish, tuman darajasidagi idora va tashkilotlarda huquqni qoʻllash amaliyotini oʻrganish, qonunchilikdagi yangiliklar va davlat siyosatini yetkazish borasidagi ishlarda samaradorlik ortdi.

Boʻlimga 2021-yil davomida jami 223 ta ariza va shikoyat kelib tushdi. Ushbu murojaatlarning 160 tasini ariza, 60 tasini shikoyat tashkil qilib, kelib tushgan murojaatlarning 214 tasi hal qilindi. Shulardan qanoatlantirilgan ariza va shikoyatlar 131 tani, huquqiy tushuntirish berilganlari 82 tani tashkil qildi. Ayrim murojaatlar taalluqliligi boʻyicha tegishli tashkilotlarga yuborilib, ayrimlari koʻrilmasdan qoldirildi.

Shuningdek, bevosita shaxsiy qabullarda jami 165 nafar fuqaro qabul qilindi, 34 nafar fuqaroning murojaati qabul qildi. Norma ijodkorligi sohasida esa turli sohalarga oid qonunchilikni takomillashtirish yuzasidan 27 ta taklif berildi. Xalq deputatlari tuman Kengashining 4 ta va tuman hokimining 4 ta normativ-huquqiy hujjat loyihalari huquqiy ekspertizadan oʻtkazildi.

Boʻlim tomonidan fuqarolarning huquq va manfaatlarini himoya qilish borasida ham muayyan ishlar amalga oshirildi. Jumladan, 93 nafar fuqaroning manfaatida fuqarolik va maʼmuriy sudlarga jami 91 ta daʼvo ariza va sud buyrugʻi tartibidagi arizalar kiritilib, 59 tasi qanoatlantirildi. Kiritilgan daʼvo arizalar natijasida fuqarolarning ish haqi va ustama pullari, bolalar nafaqa pullari undirib berildi. Ayrim fuqarolarning murojaatiga koʻra, mansabdor shaxslarning gʻayriqonuniy xatti-harakatini bartaraf qilish bilan bogʻliq, farzandiga tugʻilish guvohnomasi olish kabi masalalari qonuniy hal qilindi va ushbu daʼvo arizalar natijasida fuqarolar foydasiga 840 mln.dan ortiq miqdordagi ish haqi, yetkazilgan moddiy va maʼnaviy zararlari undirib berildi.

Bundan tashqari, 65 ta idora va tashkilotlarda 21 ta oʻrganish va 47 ta monitoringlar oʻtkazildi. Shundan, 8 ta oʻrganish ijtimoiy-iqtisodiy sohada huquqni qoʻllash amaliyotiga, 6 tasi inson huquqlarini himoya qilish sohasiga, 2 tasi yuridik xizmat faoliyatiga, 5 tasi davlat boshqaruvi samaradorligini tahlil qilish sohasiga oid boʻldi. Oʻrganishlarning 47 tasi murojaatlar asosida oʻtkazildi. Ushbu oʻrganish va monitoringlar davomida 7830 ta qonun buzilish holatlari aniqlandi. Mazkur holatlari boʻyicha idora va tashkilotlarga jami 116 ta taqdimnomalar kiritildi. Shunga koʻra, 12 nafar shaxs intizomiy javobgarlikka tortildi, 73 nafar mansabdor shaxsning qonunga xilof harakatsizligi va 2 ta gʻayriqonuniy hujjat ijrosi toʻxtatildi, yana 8 ta hujjat bekor qilindi. Taqdimnomalar asosida fuqaro va tashkilotlarning 282 mln. soʻmdan ziyod pul mablagʻlari undirilib, qaytarib berildi.

Idora va tashkilot rahbarlarining fuqarolar murojaatlari bilan ishlashda va xodimlarning mehnat huquqlariga rioya qilishda yoʻl qoʻygan qonunbuzilish holatlari sababli boʻlim tomonidan maʼmuriy javobgarlikka tortish yuzasidan yil davomida 12 ta taklif berildi. Bu boʻyicha toʻgʻridan toʻgʻri rasmiylashtirilgan bayonnomalar 8 tani tashkil qilib, 4 nafar mansabdor shaxsning noqonuniy xatti-harakatlari yuzasidan tegishli idoralarga taklif berildi. Natijada 12 nafar mansabdor shaxs maʼmuriy javobgarlikka tortildi.

Fuqarolarning huquqiy ongi va madaniyatini oshirish yuzasidan ham salmoqli ishlar amalga oshirildi. Ayniqsa, bu borada tumandagi ommaviy axborot vositalari bilan hamkorlik juda samarali boʻldi. Xususan, oʻtgan yil davomida boʻlim xodimlari tomonidan axborot vositalarida 263 ta chiqishlar qilindi, ogʻzaki huquqiy-targʻibot 522 tani, koʻrgazmali targʻibot 24 tani tashkil etdi.

Amudaryo tuman Adliya boʻlimi tomonidan 2021-yil davomida amalga oshirilgan ishlar sarhisobi keltirilgan raqamlarda samarali koʻrinsa-da, aslida boʻlim faoliyatiga boʻlgan bahoni xalqimiz beradi. Zero, har bir erishgan yutuqlarmiz orqasida inson va jamiyat manfaatlari turganligini chuqur anglaymiz va kelajakda ham xizmat vazifamizni yanada maʼsuliyat bilan davom qildiramiz.

M.Matyusupov, tuman Adliya boʻlimi boshligʻi.