ИС ГАЗИДАН ЗАҲАРЛАНИШНИНГ ОЛДИНИ ОЛИШГА ҚАРАТИЛГАН ТАДБИРЛАР ЎТКАЗИЛМОҚДА

Маълумки, ис гази, чақнаш ва ёнғинлар инсонларнинг ҳаёти ва соғлиғига, юридик ва жисмоний шахсларнинг мол-мулкига, атроф табиий муҳитга жиддий зарар етказади. Қишнинг ёғингарчилик ва совуқ кунларида ҳарорат кескин пасайиб боради. Мана шундай вазиятда фуқаролар томонидан қўлбола иситиш мосламаларидан фойдаланиш ҳолатлари кўпайиб, фавқулодда вазиятлар содир бўлмоқда. Бу ҳол инсонларнинг турли тан жароҳатлари олиши, айрим ҳолларда дунёни тарк этиши билан якунланади.

Амударё туманида мана шундай кўнгилсиз воқеаларнинг олдини олиш мақсадида кўплаб профилактик тадбирлар амалга оширилмоқда.

Жумладан, ҳудудларда ис гази ва газ-ҳаво аралашмаси чақнашининг олдини олиш мақсадида тумандаги кўп қаватли уйларда, идора-ташкилотларда, умумтаълим мактабларда Фавқулодда вазиятлар бўлими томонидан бир қанча тарғибот тадбирлари ташкил этилмоқда.

Амударё тумани Фавқулодда вазиятлар бўлими тамонидан 2022 йил 7 январь куни тумандаги Чойкўл овули ва Босув маҳалласи худудларида профилактик тадбирлар ўтказилди. Фуқороларнинг хавфсизлигини таъминлаш ва ис газидан заҳарланишнинг олдини олиш мақсадида ўтказилган ушбу тадбир давомида аҳоли турар жойлари кўздан кечирилиб, фуқароларга тегишли тавсиялар берилди.

Профилактик текшириш ишлари жараёнида Чойкўл овули ҳудудидан 55 та, Босув маҳалласи худудидан 62 та, жами 117 та хонадан хатловдан ўтказилиб “Чорвадор” кўчасида истиқомат қилувчи бир нечта фуқаролар ҳонадонида қоидабузарлик ҳолатлари аниқланди ва тегишли тартибда огоҳлантирилди.

Шунингдек, Босув маҳалласида жойлашган 42-сонли умумтаълим мактабининг моддий техник базаси ёнғин ҳавсизлиги қоидаларига тўлиқ жавоб бермаслиги аниқланиб, Фавқулодда вазиятлар бўлими ҳодимлари томонидан мавжуд камчиликлар бартараф этилди. Шундан сўнг, ис газидан заҳарланишнинг олдини олиш ва заҳарланган кишига биринчи тез тиббий ёрдам кўрсатиш бўйича тушинтиришлар берилди.

Фавқулодда вазиятлар бўлими ҳодимлари томонидан қайд этиб ўтилганидек, биринчи тиббий ёрдам сифатида аввало ис газидан заҳарланган кишини зудлик билан тоза ҳавога олиб чиқиш, юзаки нафас олишда, ёки нафас олиш тўхтаб қолганда суний нафас олдириш, баданни ишқалаш, қисқа вақт спирт ҳидлатиш зарурдир.

Тадбирда ҳар бир маҳаллада тарғибот ишларини кучайтириш, фуқароларни огоҳликка чақириш, хонадонларда эҳтиёт чораларини кўриш лозимлиги таъкидланди.

Таҳлилларга мурожаат қиладиган бўлсак, Амударё туманида 2020 йил мобайнида содир бўлган ёнғин ҳолатлари ўтган йиллардагига нисбатан сезиларли даражада камайган. Албатта, ушбу ижобий натижага эришишда тарғибот-ташвиқот ишларининг аҳамияти катта, аммо, ёнғинлар натижасида инсонларнинг тан жароҳат олиши ва ҳалок бўлиш ҳолатлари ҳамон қайд этилаётганлиги ташвишланарли ҳолдир.

Ўтказилаётган тадбирлардан кўзланган асосий мақсад – фуқароларга ис гази, унинг хусусиятлари ва инсон организмига салбий таъсири, ис газидан заҳарланиш ҳолатларининг олдини олиш учун риоя этиш лозим бўлган ёнғин хавфсизлиги қоидалари ҳақида батафсил маълумот бериш ва шу орқали фавқулодда вазиятларнинг олдини олишда ёшларнинг иштирокини кучайтиришдан иборатдир.

Ф.Эшимбетова.