ВАТАН ҲИМОЯЧИЛАРИ УСТОЗЛАРДАН ТАЪЛИМ ВА ТАРБИЯ ОЛАДИ
Янги йил байрами шукуҳи тарқалиб улгурмасидан бошқа бир байрамни кутиб оламиз. Бу 14 январь – Ватан ҳимоячилари кунидир. Ҳар бир аёл-қиз борки, шу куни тонгданоқ отаси, ака-укалари, умр йўлдоши, фарзандларини илиқ табрик сўзлари билан қутлайди. Юртимизнинг тинчлиги, осойишта ҳаётимизни таъминлаб турган Ватанимизнинг ҳимоячилари – ҳарбийларимизнинг борлигига шукрона айтади. Айнан уларнинг ғоят машаққатли ва муҳим бўлган касби, фаолияти туфайли чегараларимиз дахлсиз, халқимиз тинч, элимиз осуда, ҳаётимиз файзлидир.
Таътил кунларида мактабимизда ушбу байрам муносабати билан бўлиб ўтган кичик тадбир мени мақола ёзишга ундади. Жамоамиздаги эркак ўқитувчиларни байрам билан қутладик. Шунда мен бу сананинг бошқа бир моҳияти ҳақида ўйлаб қолдим. Ўқитувчилик касбида меҳнат қилаётган эр-йигитларимизнинг ишларини ҳам ҳарбийларимизнинг фаолиятига қиёсласа бўлади. Ҳарбийларимиз бизни ташқи душманлар, ёвуз ниятда бўлган кучлардан моддиян ҳимоя қилса, ўқитувчиларимиз ўсиб келаётган ёш авлоднинг онги ва қалбини билим билан бойитади, мустаҳкамлайди, руҳини шакллантиради, ҳаёт курашларига тоблайди, ёт ғоялар, хавфлардан ҳимоя қилади. Айнан улар берган билим ва тарбия туфайли ўқувчилар камол топадилар, давлатимиз мустақиллиги ва кейинги тараққиётининг устунлари бўлиб етишадилар. Шунинг учундир, биз бу кунда фақатгина ҳарбийларимиз, ички ишлар ходимларини эмас, балки ҳар бир йигит, ҳар бир кишини табриклаймиз.
Ёш авлодни ўқитиш ва тарбиялашда эркак ўқитувчиларнинг ўрни жуда муҳимдир. Эсимда, мен 2013 йилда мактабимизга ишга келганимда жамоамизда эркак ўқитувчилар камчиликни ташкил этарди. Бу тасодифий бўлмай, ўша вақтларда бутун таълим тизимида меҳнат қилаётган эркак педагогларнинг сони аёл педагогларга нисбатан оз эди. Президентимиз Ш. Мирзиёев фаолиятининг дастлабки йилларидаёқ бунга алоҳида эътибор қаратди, таълим соҳасида эркак ўқитувчиларнинг сонини ошириш кераклигини қайта-қайта таъкидлади. Бу борада олиб борилган ислоҳотлар ўз натижасини берди. Бугунги кунда аёл ўқитувчиларимиз билан бир қаторда, эркак ўқитувчиларимиз ҳам ёш авлодни ўқитиш ва тарбиялаш ишига ўзининг муносиб ҳиссасини қўшиб келмоқда.
Азиз ва муҳтарам ака-укаларимиз, ёшларимиз, ўзининг ғайрати ва шижоатини Ватан ҳимояси ва порлоқ истиқболига сафарбар қилган ўктам ўғлонларимизни ушбу қутлуғ байрам билан чин юракдан табриклайман.
Гулзира Матниязова, 30-сонли мактаб ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
