VATAN HIMOYaChILARI USTOZLARDAN TAʼLIM VA TARBIYa OLADI

Yangi yil bayrami shukuhi tarqalib ulgurmasidan boshqa bir bayramni kutib olamiz. Bu 14-yanvar – Vatan himoyachilari kunidir. Har bir ayol-qiz borki, shu kuni tongdanoq otasi, aka-ukalari, umr yoʻldoshi, farzandlarini iliq tabrik soʻzlari bilan qutlaydi. Yurtimizning tinchligi, osoyishta hayotimizni taʼminlab turgan Vatanimizning himoyachilari – harbiylarimizning borligiga shukrona aytadi. Aynan ularning gʻoyat mashaqqatli va muhim boʻlgan kasbi, faoliyati tufayli chegaralarimiz daxlsiz, xalqimiz tinch, elimiz osuda, hayotimiz fayzlidir.

Taʼtil kunlarida maktabimizda ushbu bayram munosabati bilan boʻlib oʻtgan kichik tadbir meni maqola yozishga undadi. Jamoamizdagi erkak oʻqituvchilarni bayram bilan qutladik. Shunda men bu sananing boshqa bir mohiyati haqida oʻylab qoldim. Oʻqituvchilik kasbida mehnat qilayotgan er-yigitlarimizning ishlarini ham harbiylarimizning faoliyatiga qiyoslasa boʻladi. Harbiylarimiz bizni tashqi dushmanlar, yovuz niyatda boʻlgan kuchlardan moddiyan himoya qilsa, oʻqituvchilarimiz oʻsib kelayotgan yosh avlodning ongi va qalbini bilim bilan boyitadi, mustahkamlaydi, ruhini shakllantiradi, hayot kurashlariga toblaydi, yot gʻoyalar, xavflardan himoya qiladi. Aynan ular bergan bilim va tarbiya tufayli oʻquvchilar kamol topadilar, davlatimiz mustaqilligi va keyingi taraqqiyotining ustunlari boʻlib yetishadilar. Shuning uchundir, biz bu kunda faqatgina harbiylarimiz, ichki ishlar xodimlarini emas, balki har bir yigit, har bir kishini tabriklaymiz.

Yosh avlodni oʻqitish va tarbiyalashda erkak oʻqituvchilarning oʻrni juda muhimdir. Esimda, men 2013-yilda maktabimizga ishga kelganimda jamoamizda erkak oʻqituvchilar kamchilikni tashkil etardi. Bu tasodifiy  boʻlmay, oʻsha vaqtlarda butun taʼlim tizimida mehnat qilayotgan erkak pedagoglarning soni ayol pedagoglarga nisbatan oz edi. Prezidentimiz Sh. Mirziyoyev faoliyatining dastlabki yillaridayoq bunga alohida eʼtibor qaratdi, taʼlim sohasida erkak oʻqituvchilarning sonini oshirish kerakligini qayta-qayta taʼkidladi. Bu borada olib borilgan islohotlar oʻz natijasini berdi. Bugungi kunda ayol oʻqituvchilarimiz bilan bir qatorda, erkak oʻqituvchilarimiz ham yosh avlodni oʻqitish va tarbiyalash ishiga oʻzining munosib hissasini qoʻshib kelmoqda.

Aziz va muhtaram aka-ukalarimiz, yoshlarimiz, oʻzining gʻayrati va shijoatini Vatan himoyasi va porloq istiqboliga safarbar qilgan oʻktam oʻgʻlonlarimizni ushbu qutlugʻ bayram bilan chin yurakdan tabriklayman.

Gulzira   Matniyazova, 30-sonli maktab oʻqituvchisi.