АМУДАРЁДА ҲАМ МАКТАБЛАРНИНГ БОШЛАНҒИЧ СИНФ ЎҚУВЧИЛАРИГА БЕПУЛ ТУШЛИК БЕРИШ ЙЎЛГА ҚЎЙИЛДИ

Маълумки, Президент Шавкат Мирзиёев Қорақалпоғистондаги умумтаълим мактабларида бошланғич синф ўқувчиларига бепул тушлик берилиши, бунинг учун бюджетдан йилига 100 миллиард сўм ажратилишини маълум қилган эди.  Шунингдек, Янги Ўзбекистоннинг тараққиёт стратегияси ва уни «Инсон қадрини улуғлаш ва фаол маҳалла йили»да амалга оширишга оид давлат дастурига кўра ҳам 2022 йил 1 апрелдан Қорақалпоғистон Республикаси ва Хоразм вилоятида 1-4-синф ўқувчиларини бепул овқат билан таъминлаш кўзда тутилган.

Юртимиз бўйлаб барча мактабларда анъанавий тарздаги таълим бошланган 7 февраль кунидан Амударё туманида бошланғич синф ўқувчиларига озиқ-овқат маҳсулотлари етказиб бериш бошлаб юборилди.

7 февраль куни Амударё тумани ҳокими ўринбосари Маҳмуд Шерметов, туман Халқ таълими бўлими мудири Акмал Исмоилов ва бошқа масъуллар тумандаги 82-, 40-, 55-сонли мактабларда бўлиб, бошланғич синф ўқувчиларига бепул тушлик тарқатиш жараёни билан танишди.

Таъкидлаш жоизки, туман Халқ таълими бўлимига қарашли 85 та умумтаълим мактабларида жами 13 минг 707 нафар бошланғич синф ўқувчилари таълим олишади. Улардан 1-синф ўқувчилар 3299 нафар, 2-синф ўқувчилари 3621 нафар, 3-синф ўқувчилари 3549 нафар, 4-синф ўқувчилари эса 3238 нафарни ташкил қилади.

Тумандаги барча умумтаълим мактабларидаги бошланғич синф ўқувчиларига қадоқланган тайёр маҳсулотлар кейтеринг ташкилоти, яъни “AZUR KOMPAKT SERVIS” масъулияти чекланган жамияти томонидан эрталаб  соат 9:00га қадар етказиб берилади.

Мактаб директори кейтеринг ташкилоти ходимидан тайёр маҳсулотларни тегишли тартиб бўйича расмийлаштириб, қабул қилиб олади. Маънавий-маърифий ишлари бўйича директор ўринбосари бошланғич синф ўқувчиларнинг кунлик давоматини олади ва аниқ рақамларни тайёрлаб, kundalik.com сайтига киритади. Рўйхат махсус журналга ҳам туширилади.

Олинган давомат бўйича мактаб директори синф раҳбарларига тайёр маҳсулотларини тарқатади. Синф раҳбарлари тайёр таом маҳсулотларини идишларда синф хоналарига олиб боради. Тайёр маҳсулотлар рўйхат бўйича ўқувчиларга тарқатилади ва санитария қоидалари, нормалари, гигиена нормативларига мувофиқ ўқувчиларига 3-дарсдан сўнг катта танафус вақтида тарқатилади. Синф раҳбари ўқувчиларнинг овқатланишини назорат қилади ва мактаб директорига ҳисобот беради. 

Мактаб директори томонидан ҳам туман Халқ таълими бўлими тегишли мутасадди ходимларига кунлик маълумотларни бериб борилади.

Халқ таълими бўлими раҳбари кунлик маълумотларни тасдиқланган ҳолда Қорақалпоғистон Республикаси Халқ таълими вазирлигининг “Соғлом овқатлантириш ва тиббий хизматни мувофиқлаштириш” бўлимига ҳисобот  бериб боради. Қорақалпоғистон Республикаси Халқ таълими вазирлиги эса кунлик маълумотларни Ўзбекистон Республикаси Халқ таълими вазирлигининг “Соғлом овқатлантириш ва тиббий хизматни мувофиқлаштириш” бўлимига кундалик ҳисобот  бериб боради.

Ундан ташқари, олис ҳудудлардаги мактаблар ва филиалларга бир ҳафталик тайёр маҳсулотлар кейтеринг ташкилоти томонидан етказилади. Шу ўринда айтиш жоизки, якка тартибда таълим олаётган ўқувчилар уйда таълим олаётгани сабабли тайёр маҳсулот билан таъминланмайди.

Бошланғич синф ўқувчиларига бепул тушлик тарқатилиши уларнинг соғлом бўлиб вояга етиши ва дарсларни яхши ўзлаштиришларига хизмат қилиши билан ниҳоятда аҳамиятлидир.

Зафар Абдуллаев, туман ХТБ маънавий-ахлоқий тарбия ва таълим муассасалари фаолиятини ташкил этиш шўъба мудири.