AMUDARYoDA HAM MAKTABLARNING BOShLANGʻICh SINF OʻQUVChILARIGA BEPUL TUShLIK BERISh YOʻLGA QOʻYILDI

Maʼlumki, Prezident Shavkat Mirziyoyev Qoraqalpogʻistondagi umumtaʼlim maktablarida boshlangʻich sinf oʻquvchilariga bepul tushlik berilishi, buning uchun byudjetdan yiliga 100 milliard soʻm ajratilishini maʼlum qilgan edi.  Shuningdek, Yangi Oʻzbekistonning taraqqiyot strategiyasi va uni «Inson qadrini ulugʻlash va faol mahalla yili»da amalga oshirishga oid davlat dasturiga koʻra ham 2022-yil 1-apreldan Qoraqalpogʻiston Respublikasi va Xorazm viloyatida 1-4-sinf oʻquvchilarini bepul ovqat bilan taʼminlash koʻzda tutilgan.

Yurtimiz boʻylab barcha maktablarda anʼanaviy tarzdagi taʼlim boshlangan 7-fevral kunidan Amudaryo tumanida boshlangʻich sinf oʻquvchilariga oziq-ovqat mahsulotlari yetkazib berish boshlab yuborildi.

7-fevral kuni Amudaryo tumani hokimi oʻrinbosari Mahmud Shermetov, tuman Xalq taʼlimi boʻlimi mudiri Akmal Ismoilov va boshqa masʼullar tumandagi 82-, 40-, 55-sonli maktablarda boʻlib, boshlangʻich sinf oʻquvchilariga bepul tushlik tarqatish jarayoni bilan tanishdi.

Taʼkidlash joizki, tuman Xalq taʼlimi boʻlimiga qarashli 85 ta umumtaʼlim maktablarida jami 13 ming 707 nafar boshlangʻich sinf oʻquvchilari taʼlim olishadi. Ulardan 1-sinf oʻquvchilar 3299 nafar, 2-sinf oʻquvchilari 3621 nafar, 3-sinf oʻquvchilari 3549 nafar, 4-sinf oʻquvchilari esa 3238 nafarni tashkil qiladi.

Tumandagi barcha umumtaʼlim maktablaridagi boshlangʻich sinf oʻquvchilariga qadoqlangan tayyor mahsulotlar keytering tashkiloti, yaʼni “AZUR KOMPAKT SERVIS” masʼuliyati cheklangan jamiyati tomonidan ertalab  soat 9:00ga qadar yetkazib beriladi.

Maktab direktori keytering tashkiloti xodimidan tayyor mahsulotlarni tegishli tartib boʻyicha rasmiylashtirib, qabul qilib oladi. Maʼnaviy-maʼrifiy ishlari boʻyicha direktor oʻrinbosari boshlangʻich sinf oʻquvchilarning kunlik davomatini oladi va aniq raqamlarni tayyorlab, kundalik.com saytiga kiritadi. Roʻyxat maxsus jurnalga ham tushiriladi.

Olingan davomat boʻyicha maktab direktori sinf rahbarlariga tayyor mahsulotlarini tarqatadi. Sinf rahbarlari tayyor taom mahsulotlarini idishlarda sinf xonalariga olib boradi. Tayyor mahsulotlar roʻyxat boʻyicha oʻquvchilarga tarqatiladi va sanitariya qoidalari, normalari, gigiyena normativlariga muvofiq oʻquvchilariga 3-darsdan soʻng katta tanafus vaqtida tarqatiladi. Sinf rahbari oʻquvchilarning ovqatlanishini nazorat qiladi va maktab direktoriga hisobot beradi. 

Maktab direktori tomonidan ham tuman Xalq taʼlimi boʻlimi tegishli mutasaddi xodimlariga kunlik maʼlumotlarni berib boriladi.

Xalq taʼlimi boʻlimi rahbari kunlik maʼlumotlarni tasdiqlangan holda Qoraqalpogʻiston Respublikasi Xalq taʼlimi vazirligining “Sogʻlom ovqatlantirish va tibbiy xizmatni muvofiqlashtirish” boʻlimiga hisobot  berib boradi. Qoraqalpogʻiston Respublikasi Xalq taʼlimi vazirligi esa kunlik maʼlumotlarni Oʻzbekiston Respublikasi Xalq taʼlimi vazirligining “Sogʻlom ovqatlantirish va tibbiy xizmatni muvofiqlashtirish” boʻlimiga kundalik hisobot  berib boradi.

Undan tashqari, olis hududlardagi maktablar va filiallarga bir haftalik tayyor mahsulotlar keytering tashkiloti tomonidan yetkaziladi. Shu oʻrinda aytish joizki, yakka tartibda taʼlim olayotgan oʻquvchilar uyda taʼlim olayotgani sababli tayyor mahsulot bilan taʼminlanmaydi.

Boshlangʻich sinf oʻquvchilariga bepul tushlik tarqatilishi ularning sogʻlom boʻlib voyaga yetishi va darslarni yaxshi oʻzlashtirishlariga xizmat qilishi bilan nihoyatda ahamiyatlidir.

Zafar Abdullayev, tuman XTB maʼnaviy-axloqiy tarbiya va taʼlim muassasalari faoliyatini tashkil etish shoʻʼba mudiri.