56-сонли мактабда “Оила-маҳалла-таълим муассасаси" ҳамкорлиги жамоат Кенгашининг кенгайтирилган йиғилиши ўтказилди

Ҳар томонлама баркамол, комил инсонни тарбиялаш жамиятимиз олдида турган долзарб масалалардан бири бўлиб келмоқда.

Ёш авлодни маънавий-ахлоқий, маъданий-маърифий жиҳатдан етук инсонлар қилиб тарбиялаш иши биринчи навбатда оиладан бошланади. Бу борада баркамол авлодни тарбиялашда ота-она, маҳалла ва таълим муассасаларининг ҳамкорлиги муҳим аҳамият касб этади.

 Айниқса, ушбу ҳамкорликни тўғри йўлга қўйиш – ўсмирлар орасида қаровсизлик, ҳуқуқбузарлик ва жиноятчиликнинг олдини олишда муҳим тарбия воситасидир. Боланинг қандай инсон бўлиб вояга етиши ота-она тарбияси ва атроф-муҳит таьсирига боғлиқ.

Бола тарбиясида уларнинг ёш жиҳатига, руҳият ва тушунчасига, феъл-атворига алоҳида аҳамият бериш зарурдир. Ушбу талаб асосида мамлакатимизда жисмонан соғлом, билим ва тафаккури ўткир, маънавиятли, аниқ касбга ва мутахассисликка эга, ғоявий собитқадам фарзандлар, яъни баркамол авлод модели яратилди ва уни шакллантириш давлат сиёсати даражасига кўтарилди.

2012 йилнинг 19 июнида Ўзбекистон Республикаси Вазирлар маҳкамасининг “Баркамол авлодни тарбиялашда оила институти ва фуқароларнинг ўзини ўзи бошқариш органларининг таълим муассасалари билан ўзаро ҳамкорлигини янада ривожлантириш чора-тадбирлари тўғрисида”ги қарори қабул қилиниб, Халқ таълими Вазирлиги ҳузуридаги “Оила-маҳалла-таълим муассасаси” ҳамкорлиги Жамоат кенгаши фаолиятига асос солинган эди.

Мана шу даврдан бошлаб барча жойларда ташкил этилган “Оила-маҳалла-таълим муассасаси” ҳамкорлиги жамоат кенгашлари ўзларининг йиллик режаларига асосан муваффақиятли фаолият юритиб келмоқда.

Жорий йилнинг 5 февраль куни 56-сонли мактаб ҳузурида фаолият кўрсатаётган “Оила-маҳалла-таълим муассасаси” ҳамкорлиги жамоат Кенгашининг кенгайтирилган йиғилиши ўтказилиб, унда жамоат Кенгаши аъзолари ва Манғит шаҳрида жойлашган бир қатор таълим муассасалари вакиллари иштирок этдилар.

Ушбу йиғилишда бугунги куннинг долзарб масаласи – “Оила-маҳалла-таълим муассасаси” ҳамкорлиги механизмини янада такомиллаштириш масаласи муҳокама этилди.

Йиғилишни маънавий-маърифий ишлар бўйича мактаб директори ўринбосари Роҳатой Худайберганова очди ва олиб борди. Йиғилишда мактаб директори, жамоат Кенгаши раиси Арзигул Худайберганова кун тартибидаги масала юзасидан маъруза қилди.

Маъруза юзасидан бўлган музокараларда жамоат Кенгаши аъзоси, Дурунки маҳалла фуқаролар йиғини раисининг оила, хотин-қизлар, ижтимоий масалалар бўйича ўринбосари Гавҳар Мингбоева, жамоат Кенгаши аъзоси, мактабнинг ота-оналар қўмитаси раиси Гулназира Салаева, жамоат Кенгаши аъзоси, ота-оналар вакили Омонгул Қаюпова, 1-сонли мактаб директорининг маънавий-маърифий ишлар бўйича ўринбосари Гулистон Мадрахимова, жамоат Кенгаши аъзоси, шифокор Меҳри Ҳусаинова, жамоат Кенгаши аъзоси, мактаб психологи Дониёр Йўлдошев, 8-сонли мактабгача таълим муассасаси ходими Мавлуда Алламберганова ва жамоат Кенгаш аъзоси, синф раҳбари Солия Юсуповалар иштирок этдилар.

Йиғилиш якунида муҳокама этилган масала юзасидан тегишли қарор қабул қилинди.

Алламберган Жуманиёзов.