БАЙНАЛМИЛАЛ ЖАНГЧИЛАР ВА ТАЪЛИМ ФАХРИЙСИ ТАҚДИРЛАНДИ

Мамлакатимизда собиқ байналмилал жангчиларни бирлаштириш, соғлиғини тиклаш, уларни тиббий реабилитация қилиш мақсадида “Ветеран” жангчи – фахрий ва ногиронлари бирлашмаси ҳамда унинг ҳудудий бўлимлари фаолият олиб бормоқда. Бирлашма томонидан афғон урушида ҳалок бўлганлар номи Иккинчи жаҳон урушида ҳалок бўлганлар қатори “Хотир китоби”га киритилаяпти, оилаларига ижтимоий ёрдамлар берилаяпти.

Бизнинг юртимиздаги бўлгани каби бошқа республикаларда ҳам байналмилал жангчиларни қўллаб-қувватлайдиган жамоат ташкилотлари мавжуд.

Шу йилнинг 3 январида Белоруссияда фаолият юритаётган Полоцский байналмилал-жангчи фахрийлар жамоат ташкилоти ўзининг байналмилал бурчини сидқидилдан адо этган, фахрий жангчиларни қўллаб-қувватлашга муносиб ҳисса қўшаётган туманимизнинг уч нафар собиқ афғон уруши қатнашчиларини иккинчи даражали “Хизматлари учун” медали билан тақдирлаган эди.

Шу йилнинг 8 февраль куни медаллар ўз эгаларига – Манғит шаҳрининг Гулзор маҳалласида яшовчи Абдуғаний Муханов, Бўстон маҳалласида яшовчи Шавкат Саитбоев ва 31-сонли мактаб директорининг ўқув ишлари бўйича ўринбосари Ойбек Шомуродовларга тантанали равишда топширилди.

Медалларни Ўзбекистон “Ветеран” жангчи – фахрий ва ногиронлари бирлашмаси Қорақалпоғистон бўлимининг Амударё туманидаги вакили Баҳодир Жуманиёзов бир гуруҳ собиқ афғончи жангчилар ҳамроҳлигида тақдирланганларнинг хонадонларига олиб бориб, тантанали равишда топширди.

15 февраль – совет армияси афғон тупроғидан олиб чиқилган кун арафасидаги бу хушхабар байналмилал жангчиларга улкан қувонч бахш этди.

Белоруссияда фаолият юритаётган шу ташкилот мамлакатимизнинг уч нафар ўқитувчиларини ёшларни ватанпарвар қилиб тарбиялашдаги иштироки учун Фахрий ёрлиқ ва Александр Невский медали билан ҳам тақдирлаган. Улар орасида узоқ йиллар 30-сонли мактабда ёшларга таълим-тарбия берган, шу мактабга раҳбарлик қилган, таълим фахрийси Валентина Петровна Кузнецова ҳам бор.

Онахонга медални топшириш маросими унинг оиласидагиларга ҳам, байналмилал жангчиларга ҳам улкан хурсандчилик бахш этди.

1979 йилдан 1989 йилгача афғон заминида мавжуд тузумга қарши чиққан мухолифатнинг қуролланган тузилмаларига қарши кечган жангларда собиқ иттифоқ таркибидаги республикаларда ҳарбий хизмат бурчини ўтаётган йигитлар ҳам сафарбар этилган эди.

Ҳудудда совет қўшинларининг чекланган контингенти томонидан қўллаб-қувватланган Афғонистон ҳукумати билан дунёнинг бир қатор етакчи давлатларининг молиявий кўмагидан фойдаланган афғон мужоҳидларининг кўп сонли тузилмалари ўртасида 10 йилдан ортиқ давом этган урушда собиқ иттифоқ республикаларининг ўн минглаб забардаст ўғлонлари ҳалок бўлди, омон қайтганларининг ҳам айримлари урушда олган жароҳатлари туфайли эрта оламдан ўтди.

Биз билан ҳамнафас яшаётган собиқ афғончи жангчилар билан ҳамсуҳбат бўлсангиз – уруш асоратлари уларнинг ҳам соғлом, бардам ва тетик бўлиб яшашига салбий таъсир қилаётганини айтишади. Бироқ улар давр тақозосига кўра, бурчларини адо этганларидан афсусланмайди.

Вақтлар ўтаверар, эл-юрт учун қилинган хизматлар эса ҳеч қачон ўз қадрини йўқотмайди.

Ойгул РАЖАБОВА.