BAYNALMILAL JANGChILAR VA TAʼLIM FAXRIYSI TAQDIRLANDI

Mamlakatimizda sobiq baynalmilal jangchilarni birlashtirish, sogʻligʻini tiklash, ularni tibbiy reabilitatsiya qilish maqsadida “Veteran” jangchi – faxriy va nogironlari birlashmasi hamda uning hududiy boʻlimlari faoliyat olib bormoqda. Birlashma tomonidan afgʻon urushida halok boʻlganlar nomi Ikkinchi jahon urushida halok boʻlganlar qatori “Xotir kitobi”ga kiritilayapti, oilalariga ijtimoiy yordamlar berilayapti.

Bizning yurtimizdagi boʻlgani kabi boshqa respublikalarda ham baynalmilal jangchilarni qoʻllab-quvvatlaydigan jamoat tashkilotlari mavjud.

Shu yilning 3-yanvarida Belorussiyada faoliyat yuritayotgan Polotsskiy baynalmilal-jangchi faxriylar jamoat tashkiloti oʻzining baynalmilal burchini sidqidildan ado etgan, faxriy jangchilarni qoʻllab-quvvatlashga munosib hissa qoʻshayotgan tumanimizning uch nafar sobiq afgʻon urushi qatnashchilarini ikkinchi darajali “Xizmatlari uchun” medali bilan taqdirlagan edi.

Shu yilning 8-fevral kuni medallar oʻz egalariga – Mangʻit shahrining Gulzor mahallasida yashovchi Abdugʻaniy Muxanov, Boʻston mahallasida yashovchi Shavkat Saitboyev va 31-sonli maktab direktorining oʻquv ishlari boʻyicha oʻrinbosari Oybek Shomurodovlarga tantanali ravishda topshirildi.

Medallarni Oʻzbekiston “Veteran” jangchi – faxriy va nogironlari birlashmasi Qoraqalpogʻiston boʻlimining Amudaryo tumanidagi vakili Bahodir Jumaniyozov bir guruh sobiq afgʻonchi jangchilar hamrohligida taqdirlanganlarning xonadonlariga olib borib, tantanali ravishda topshirdi.

15-fevral – sovet armiyasi afgʻon tuprogʻidan olib chiqilgan kun arafasidagi bu xushxabar baynalmilal jangchilarga ulkan quvonch baxsh etdi.

Belorussiyada faoliyat yuritayotgan shu tashkilot mamlakatimizning uch nafar oʻqituvchilarini yoshlarni vatanparvar qilib tarbiyalashdagi ishtiroki uchun Faxriy yorliq va Aleksandr Nevskiy medali bilan ham taqdirlagan. Ular orasida uzoq yillar 30-sonli maktabda yoshlarga taʼlim-tarbiya bergan, shu maktabga rahbarlik qilgan, taʼlim faxriysi Valentina Petrovna Kuznetsova ham bor.

Onaxonga medalni topshirish marosimi uning oilasidagilarga ham, baynalmilal jangchilarga ham ulkan xursandchilik baxsh etdi.

1979-yildan 1989-yilgacha afgʻon zaminida mavjud tuzumga qarshi chiqqan muxolifatning qurollangan tuzilmalariga qarshi kechgan janglarda sobiq ittifoq tarkibidagi respublikalarda harbiy xizmat burchini oʻtayotgan yigitlar ham safarbar etilgan edi.

Hududda sovet qoʻshinlarining cheklangan kontingenti tomonidan qoʻllab-quvvatlangan Afgʻoniston hukumati bilan dunyoning bir qator yetakchi davlatlarining moliyaviy koʻmagidan foydalangan afgʻon mujohidlarining koʻp sonli tuzilmalari oʻrtasida 10-yildan ortiq davom etgan urushda sobiq ittifoq respublikalarining oʻn minglab zabardast oʻgʻlonlari halok boʻldi, omon qaytganlarining ham ayrimlari urushda olgan jarohatlari tufayli erta olamdan oʻtdi.

Biz bilan hamnafas yashayotgan sobiq afgʻonchi jangchilar bilan hamsuhbat boʻlsangiz – urush asoratlari ularning ham sogʻlom, bardam va tetik boʻlib yashashiga salbiy taʼsir qilayotganini aytishadi. Biroq ular davr taqozosiga koʻra, burchlarini ado etganlaridan afsuslanmaydi.

Vaqtlar oʻtaverar, el-yurt uchun qilingan xizmatlar esa hech qachon oʻz qadrini yoʻqotmaydi.

Oygul RAJABOVA.