БЕШ МИЛЛАТЛИ АҲИЛ ОИЛА

18 ёшида Туркманистон давлатидан тақдир тақозосига кўра кўчиб келиб, шу ерда ўтиримли бўлиб қолиб, Ўдабой туркман номи билан танилган, одамохун, камтарин ва хушфеъл инсонни, гарчи у дунёдан ўтиб кетганига анча йиллар бўлган бўлса-да, манғитликлар жуда яхши эслашади. Бир умр Манғит пахта тозалаш заводида масъул лавозимларда ишлаган Ўдабой Ўтабоев ўзбек қизи Бибисора Холмуродова билан оила қуриб, уч қиз, бир ўғил кўришди, манғитликлар билан яқин қўшничилик, борди-келди қилиб, элда азиз, эътиборли бўлди. Ўғлини, қизларини турли олийгоҳларда ўқитиб, етук мутахассислар қилиб вояга етказди.

Дунёдан ўтиб кетган Ўдабой ота, Бибисора оналарнинг оила қўрғонини бугунги кунда авлодлари обод, нурафшон қилиб, улардек бағрикенг, чор-атрофидагилар билан дўст-биродар бўлиб яшаб келишаяпти. Уларнинг ёлғиз ўғиллари (Худо раҳмат қилсин!) Раҳимбой Ўтабоев ота-она розилиги билан улар ҳаёт вақтларида онаси рус, отаси ўзбек қиз билан, қизлари Моможон Ўтабоева эса қозоқ миллатига мансуб, Шукуржон ўзбек миллатига мансуб йигитлар билан турмуш қуришиб, аҳил оила бунёд этишган. Ҳаммаларининг оила қўрғони мустаҳкам, уларда дунёга келган фарзандлар ҳам ҳавас қилса арзугулик бўлиб камолга етишмоқда.

Раҳимбой Ўтабоев ҳам бир умр аёли билан сен-менга бормай, фарзандларига намуна бўлди, ота изини босиб, узоқ йиллар Манғит пахта тозалаш  заводида меҳнат қилди. Ҳозирги кунда у кишининг  уч ўғил, икки қизи ҳам турли миллат вакиллари билан оила қуриб, шу элда томир ёйган.

Чордара маҳалласида тадбиркорликни ривожлантириш, аҳоли бандлигини таъминлаш масалалари бўйича туман ҳокими  ёрдамчиси Шокир Аҳмедов, маҳалла фуқаролар йиғини раиси ўринбосари Боғдагул Ирзаевалар ушбу улкан оилага тез-тез ташриф буюришиб, ҳолидан хабар олиб туришади, оила аъзоларининг меҳнатсеварлигидан, ўз меҳнатлари билан турмушларини янада обод ва файзли қилишаётганидан хурсанд бўлишади, барчага уларни ибрат қилиб кўрсатишади.

Ота-она чироғини ёқиб ўтирган Раҳимбой Ўтабоевнинг кичик ўғли Ботир аммалари Шукуржон, Моможон, Тозагул опалар, акалари Баҳодир, Бахтиёрлар ва опа-сингиллари, барча қариндошлари билан меҳр-оқибатлилиги, ғамхўрлиги билан, оиладаги ота-она тутумларини давом эттириб келаётгани билан ҳурмат қозонган. Туғишганлар йиғилишиб келишганида барчасини улғайтирган бешик - ота ҳовлида гўё байрам бўлиб кетади. Дийдор қувончидан кўнгиллари тўлиб, ўтганлар хотирасини эслашади.

Ҳозирги кунда Ўдабой ота, Бибисора онанинг кенжа фарзанди Тозагул жияни Ботир билан якка тадбиркор сифатида уйида нон пишириш мини цехини ўрнатган. Оила аъзолари биргаликда тайёрлаётган ширмой, хуштаъмли нон, нон маҳсулотларини дўконидан, уйидан улгуржи олиб кетадиганлар ҳам кўп. Асосан тўй, маърака бераётганларнинг буюртмасига қараб, нон ёпиб беришади, меҳнатлари баракали. Улар ўзбек заминида ҳеч кимдан кам бўлмай  ўсиб-улғайишганидан, ўқиб мутахассислик, касб-кор эгаллаб, меҳнатлари маҳсулидан эл баҳраманд бўлаётганидан, элнинг олқишини олаётганидан хурсанд.

– Дунёнинг турли ҳудудларида бўлаётган талотўплар, уруш-низолар, нотинчликлар ҳақида ўқиганимда, эшитганимда жуда азобланаман, тонглари осуда, тинч-осойишта, турли миллат вакиллари тенг ҳуқуқли, бахтиёр юртда туғилганимга шукроналар айтаман, - дейди Шукуржон опа Ўтабоева.

Ҳа, опа айтганларидай, шу Ватан кўпмиллатли халқимизнинг умумий уйи. Ҳар бирининг ҳуқуқи, эрки, имкониятлари тенг. Ўдабой ота, Бибисора оналарнинг оиласида 5 миллат вакиллари тинч-осуда, бахтиёр яшашаётган бўлса, она Ўзбекистонимизда 130 дан зиёд миллат вакиллари ўз ҳаётларидан рози бўлиб яшашмоқда.

Ойгул РАЖАБОВА.