BESh MILLATLI AHIL OILA

18 yoshida Turkmaniston davlatidan taqdir taqozosiga koʻra koʻchib kelib, shu yerda oʻtirimli boʻlib qolib, Oʻdaboy turkman nomi bilan tanilgan, odamoxun, kamtarin va xushfeʼl insonni, garchi u dunyodan oʻtib ketganiga ancha yillar boʻlgan boʻlsa-da, mangʻitliklar juda yaxshi eslashadi. Bir umr Mangʻit paxta tozalash zavodida masʼul lavozimlarda ishlagan Oʻdaboy Oʻtaboyev oʻzbek qizi Bibisora Xolmurodova bilan oila qurib, uch qiz, bir oʻgʻil koʻrishdi, mangʻitliklar bilan yaqin qoʻshnichilik, bordi-keldi qilib, elda aziz, eʼtiborli boʻldi. Oʻgʻlini, qizlarini turli oliygohlarda oʻqitib, yetuk mutaxassislar qilib voyaga yetkazdi.

Dunyodan oʻtib ketgan Oʻdaboy ota, Bibisora onalarning oila qoʻrgʻonini bugungi kunda avlodlari obod, nurafshon qilib, ulardek bagʻrikeng, chor-atrofidagilar bilan doʻst-birodar boʻlib yashab kelishayapti. Ularning yolgʻiz oʻgʻillari (Xudo rahmat qilsin!) Rahimboy Oʻtaboyev ota-ona roziligi bilan ular hayot vaqtlarida onasi rus, otasi oʻzbek qiz bilan, qizlari Momojon Oʻtaboyeva esa qozoq millatiga mansub, Shukurjon oʻzbek millatiga mansub yigitlar bilan turmush qurishib, ahil oila bunyod etishgan. Hammalarining oila qoʻrgʻoni mustahkam, ularda dunyoga kelgan farzandlar ham havas qilsa arzugulik boʻlib kamolga yetishmoqda.

Rahimboy Oʻtaboyev ham bir umr ayoli bilan sen-menga bormay, farzandlariga namuna boʻldi, ota izini bosib, uzoq yillar Mangʻit paxta tozalash  zavodida mehnat qildi. Hozirgi kunda u kishining  uch oʻgʻil, ikki qizi ham turli millat vakillari bilan oila qurib, shu elda tomir yoygan.

Chordara mahallasida tadbirkorlikni rivojlantirish, aholi bandligini taʼminlash masalalari boʻyicha tuman hokimi  yordamchisi Shokir Ahmedov, mahalla fuqarolar yigʻini raisi oʻrinbosari Bogʻdagul Irzayevalar ushbu ulkan oilaga tez-tez tashrif buyurishib, holidan xabar olib turishadi, oila aʼzolarining mehnatsevarligidan, oʻz mehnatlari bilan turmushlarini yanada obod va fayzli qilishayotganidan xursand boʻlishadi, barchaga ularni ibrat qilib koʻrsatishadi.

Ota-ona chirogʻini yoqib oʻtirgan Rahimboy Oʻtaboyevning kichik oʻgʻli Botir ammalari Shukurjon, Momojon, Tozagul opalar, akalari Bahodir, Baxtiyorlar va opa-singillari, barcha qarindoshlari bilan mehr-oqibatliligi, gʻamxoʻrligi bilan, oiladagi ota-ona tutumlarini davom ettirib kelayotgani bilan hurmat qozongan. Tugʻishganlar yigʻilishib kelishganida barchasini ulgʻaytirgan beshik - ota hovlida goʻyo bayram boʻlib ketadi. Diydor quvonchidan koʻngillari toʻlib, oʻtganlar xotirasini eslashadi.

Hozirgi kunda Oʻdaboy ota, Bibisora onaning kenja farzandi Tozagul jiyani Botir bilan yakka tadbirkor sifatida uyida non pishirish mini tsexini oʻrnatgan. Oila aʼzolari birgalikda tayyorlayotgan shirmoy, xushtaʼmli non, non mahsulotlarini doʻkonidan, uyidan ulgurji olib ketadiganlar ham koʻp. Asosan toʻy, maʼraka berayotganlarning buyurtmasiga qarab, non yopib berishadi, mehnatlari barakali. Ular oʻzbek zaminida hech kimdan kam boʻlmay  oʻsib-ulgʻayishganidan, oʻqib mutaxassislik, kasb-kor egallab, mehnatlari mahsulidan el bahramand boʻlayotganidan, elning olqishini olayotganidan xursand.

– Dunyoning turli hududlarida boʻlayotgan talotoʻplar, urush-nizolar, notinchliklar haqida oʻqiganimda, eshitganimda juda azoblanaman, tonglari osuda, tinch-osoyishta, turli millat vakillari teng huquqli, baxtiyor yurtda tugʻilganimga shukronalar aytaman, - deydi Shukurjon opa Oʻtaboyeva.

Ha, opa aytganlariday, shu Vatan koʻpmillatli xalqimizning umumiy uyi. Har birining huquqi, erki, imkoniyatlari teng. Oʻdaboy ota, Bibisora onalarning oilasida 5 millat vakillari tinch-osuda, baxtiyor yashashayotgan boʻlsa, ona Oʻzbekistonimizda 130 dan ziyod millat vakillari oʻz hayotlaridan rozi boʻlib yashashmoqda.

Oygul RAJABOVA.