СУД МАЖЛИСИДА МАЪМУРИЙ НАЗОРАТ ЎРНАТИШГА ДОИР ИШ КЎРИЛДИ

Қонунга кўра, суд томонидан ўта хавфли рецидивист деб топилган, оғир ёки ўта оғир жиноятлар содир этганлиги учун озодликдан маҳрум қилишга ҳукм этилган, ҳар қандай қасддан қилинган жиноятлар учун икки ёки ундан ортиқ марта озодликдан маҳрум қилишга ҳукм этилган шахсларга нисбатан суд томонидан маъмурий назорат ўрнатилади. Маъмурий назорат остидаги шахсларга нисбатан суд қарори асосида муайян маъмурий чекловлар қўлланилади.

Яқинда Амударё тумани Ички ишлар бўлими биносида суд мажлиси ўтказилди. Унда “Жазони ижро этиш муассасаларидан озод этилган айрим тоифадаги шахслар устидан маъмурий назорат ўрнатиш туғрисида”ги Ўзбекистон Республикаси Қонуни талабидан келиб чиқиб, туман Ички ишлар бўлими ҳуқуқбузарликлар профилактикаси бўлинмасида ҳисобда турган 4 нафар муқаддам судланган фуқароларга нисбатан маъмурий назорат тўғрисидаги тақдимномаларига асосан иш материаллари кўриб чиқилди.

Суд мажлисида Жиноий ишлар бўйича туман суди масъуллари, туман Ички ишлар бўлимининг ҳуқуқбузарликлар профилактикаси бўлинмаси бошлиғи Орифжон Қосимов, профилактика инспекторлари ҳамда вояга етмаганлар масалалари бўйича инспектор-психологлар иштирок этдилар.

Маъмурий назорат ўрнатишдан мақсад, туманимизда жиноятчиликнинг олдини олиш ва қайта ҳуқуқбузарликлар содир этилишини камайтириш, назоратдаги шахслар билан якка тартибда профилактик суҳбатлар ўтказиб, улар томонидан такроран жиноят содир қилинишининг олдини олиш ҳисобланади.

Маъмурий назорат бу суд томонидан жазони ижро этиш муассасаларидан озод қилинган шахсларга қўлланиладиган чекловлардан иборат тарбиявий таъсир чорасидир. Маъмурий чекловлар суд томонидан ички ишлар органининг тақдимномасига ёки назорат остидаги шахснинг ёхуд унинг вакилининг аризасига, шунингдек меҳнат жамоасининг, жамоат бирлашмасининг ва фуқаролар ўзини ўзи бошқариш органининг илтимосномасига биноан назорат остидаги шахснинг турмуш тарзи ва хулқ-атвори ҳақидаги маълумотлар инобатга олинган ҳолда қисман бекор қилинади.

Суд мажлисида маъмурий назорат ўрнатишнинг шу каби тартиблари, белгиланадиган чекловлар таништириб ўтилди. Шунингдек, маъмурий назорат ўрнатилган 4 нафар шахсга яшаш жойидан ташқарида бўлиш, муайян жойларда бўлиш, суд белгилаган ҳудуддан ички ишлар органининг рухсатисиз чиқиш, алкоголли ичимликлар ичиш таъқиқланиши, рўйхатдан ўтиш учун ҳар ойда бир мартадан тўрт мартагача ички ишлар органига келиши кераклиги, назорат қоидалари бузилган тақдирда жиноий жавобгарликка тортилиши тушунтирилди.

Бундан ташқари суд давомида 7 нафар шахсга ҳуқуқбузарлик содир қилгани учун жарима жазоси тайинланиб, жазо муқаррарлиги таъминланди.

Туманимизда жиноятчилик ва ҳуқуқбузарликнинг олдини олишда тегишли давлат органлари ва ташкилотлар билан ҳамкорликда профилактик ва тарғибот ишлари олиб борилмоқда. Шунингдек, вояга етмаганлар ва ёшлар ўртасида жиноятчилик ва ҳуқуқбузарликларнинг олдини олиш мақсадида туман Ички ишлар бўлими ҳуқубузарликлар профилактикаси бўлинмаси вояга етмаганлар масалалари бўйича инпектор-психологлари томонидан ўқув муассасалари ва кўнгилочар жойларда тарғибот ва ташвиқот ишлари олиб борилмоқда.

Бу каби чора-тадбирлар туман ҳудудида жиноят ва ҳуқуқбузарликлар содир этилишининг олдини олиб, камайишини таъминламоқда.

Ж.Ўразбоев, Жиноят ишлари бўйича туман суди раиси.

О.Қосимов, туман ИИБ ҲПБ бошлиғи.