Диний мазмундаги материалларни қонунга хилоф равишда сақлаб, тарқатган шахслар маъмурий жавобгарликка тортилди

Шу йилнинг 11 январида Жиноят ишлари бўйича туман судида балоғат ёшига етиб, ҳаётда ўзлари учун режа-орзулар тузиб, орзулари йўлида ўқиб-интиладиган, меҳнат қиладиган ёшга етиб қолса-да, ҳали бирон ишнинг бошини тутмаган, фойдали меҳнат билан шуғулланмаган икки йигит қаршисига тўпланган жиноий иш муҳокама этилди. Улар – тенгдош, Олимжон ва Озод (исмлар ўзгартирилди)нинг тақдири ҳам ўхшаш, ўрта махсус маълумотга эга бўлсалар-да ҳеч қаерда ишламайди.

Бекорчиликдан бемаъниликлар келиб чиқади, деган ибора ҳам худди икковига қарата айтилгандай. Улар қонунга хилоф равишда сақлаш ва тарқатиш таъқиқланган диний мазмундаги материалларни қўл телефонига юклаб олиб, моҳиятига ўзлари ҳам тушунмаган ҳолда бир-бирига жўнатиб туришган.

2021 йил 10 декабрь куни туман Ички ишлар бўлими ТЭҚКГ ходимлари томонидан ҳуқуқбузар Олимжон билан ўтказилган тезкор-профилактик тадбирда унинг қўл телефонида 133 та видео кўринишдаги, 55 та сурат кўринишдаги, 6 та аудио кўринишдаги диний материаллар борлиги аниқланди. Бу материалларни у Озоднинг қўл телефонига ҳам “Телеграм” иловаси орқали ташлаганлиги, Озод ҳам Олимжонга 4 та аудио ва 1 та видео кўринишдаги диний мазмундаги материалларни жўнатганлиги аниқланди.

Бу ҳаракатлари билан улар Ўзбекистон Республикасининг “Виждон эркинлиги ва диний ташкилотлар тўғрисида”ги Қонуни 19-моддаси, 1-банди яъни, “Диний ташкилотларнинг марказий бошқарув органлари диний мақсадлари мўлжалланган буюмлар, диний адабиётлар ва диний ҳужжатларида белгиланган тартибда ишлаб чиқаришга, экспорт ҳамда импорт қилишга ҳамда тарқатишга ҳақлидир” ҳамда 3-банди “Диний ташкилотларнинг марказий бошқарув органлари тегишли лицензия олгандан сўнг диний ибодат буюмларини ишлаб чиқариш ва тарқатиш ҳуқуқига фақат улар эга бўладилар” деб кўрсатилган талабларни билмасдан бузган.

Ўзлари билмаган ҳолда ҳуқуқбузарлик содир этган Олимжон ва Озодга бу борада профилактик  тушунтириш олиб борилди ва маъмурий жавобгарлик тўғрисидаги Кодекснинг тегишли моддаларига мувофиқ жарима жазоси қўлланилди.

Отабек Бекчанов, туман ИИБ Терроризм ва экстремизмга қарши курашиш гуруҳи катта тезкор вакили, майор.