СОБИҚ АФҒОНЧИ ЖАНГЧИЛАР УЧУН ТАДБИР ТАШКИЛ ЭТИЛДИ
1979 йилдан 1989 йилгача афғон заминида мавжуд тузумга қарши чиққан мухолифатнинг қуролланган тузилмаларига қарши кечган жангларда собиқ иттифоқ таркибидаги республикаларнинг ҳарбий хизмат бурчини ўтаётган йигитлари ҳам сафарбар этилган эди.
Ҳудудда совет қўшинларининг чекланган контингенти томонидан қўллаб-қувватланган Афғонистон ҳукумати билан дунёнинг бир қатор етакчи давлатларининг молиявий кўмагидан фойдаланган афғон мужоҳидларининг кўп сонли тузилмалари ўртасида 10 йилдан ортиқ давом этган урушда собиқ иттифоқ республикаларининг не-не забардаст ўғлонлари ҳалок бўлди, омон қайтганларининг ҳам айримлари урушда олган жароҳатлари туфайли эрта оламдан ўтди.
Кейинчалик мақсадсиз уруш дея ном олган ушбу урушда бахтиёр йигитлик даврини суриб юрган 358 нафар амударёлик азамат ўғлонлар ҳам иштирок этишган. Афсуски, шундан 13 нафарининг жонсиз танаси темир тобутларда қайтган. Ўзбекистонликларнинг ҳам тинч ҳаётига раҳна солган машъум уруш ўчоқларидан собиқ совет иттифоқининг ҳарбий қўшинлари олиб чиқилганига шу йилнинг 15 февралида 33 йил тўлди.
Сана муносабати билан туманимизда истиқомат қилувчи 283 нафар собиқ афғончи жангчилар учун туман ҳокимлиги ва “Ветеран” жангчи-фахрий ва ногиронлари бирлашмаси Қорақалпоғистон бўлимининг тумандаги вакили ҳамкорлигида 15 февраль куни тантанали тадбир ташкил этилди.
Собиқ афғончи жангчилар дастлаб Манғит шаҳрининг Олмазор маҳалласида жойлашган Хотира майдонига йиғилдилар, афғон урушида шаҳид бўлган, омон қайтиб, урушда олган жароҳатлари туфайли бевақт оламдан ўтган қуролдошларининг хотирасини эсга олиб, майдондаги Мотамсаро она ҳайкали пойига гулчамбарлар қўйдилар.
Шунингдек, шу ҳудудда жойлашган музейга ташриф буюриб, турли даврларга оид, ҳар бири меҳнаткаш ва некбин халқимизнинг ўтмишини эслатувчи экспонатлар билан танишдилар.
Собиқ афғончилар хотира майдонни сайр қилиш баробарида Манғит шаҳри, ҳатто чекка овуллар ҳам тобора кўркамлашиб, ободонлашиб бораётгани, бу албатта, юртимиздаги тинчлик, осойишталик маҳсули эканлигини эътироф этдилар. Кейинги йилларда собиқ афғон уруши қатнашчилари ва уларнинг оила аъзоларини ижтимоий қўллаб-қувватлаш борасида кенг кўламли чора-тадбирлар амалга оширилаётганини таъкидладилар.
Сўнгра собиқ қуролдошлар Қипчоқ шаҳарчасида жойлашган “Жайхун” тўйхонасида ёзилган тўкин дастурхонга таклиф этилди.
Уларни туман ҳокими ўринбосарлари Рашид Салаев, Маҳмуд Шерметов, Ўзбекистон “Ветеран” жангчи-фахрий ва ногиронлари бирлашмасининг Қорақалпоғистон бўлимининг туманимиздаги вакили Баҳодир Жуманиёзовлар афғон тупроғидан совет қўшинлари олиб чиқилганига 33 йил тўлиши муносабати билан қизғин қутладилар ва эсдалик совғаларини топширдилар.
Уруш даврида ҳалок бўлган 13 нафар азаматнинг, урушдан омон қайтиб, жангларда олган жароҳатлари ва уруш асоратлари туфайли бевақт оламдан ўтган байналмилал жангчиларнинг хотираси эсга олиниб, улар ҳақига дуо қилинди.
Тадбирда собиқ қуролдошлар тўкин дастурхон атрофида дийдорлашиб, ўтган кунларини ёдга олишди, бугунгидай ҳур ва дориломон кунларга етганига шукроналар айтишди. Туманимизнинг таниқли санъаткорлари уларни жўшқин қўшиқлари билан хушнуд этди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
