ГРАНТ ЛОЙИҲАСИ ДОИРАСИДА СЕМИНАР ЎТКАЗИЛДИ
Мамлакатимизда имконияти чекланганларга кўмаклашиш, уларни моддий ва маънавий қўллаб-қувватлаш, имкон даражасида фойдали меҳнатга жалб қилиш, ҳаётимизнинг барча жабҳаларида фаол иштирокини таъминлаш ва ҳақ-ҳуқуқларининг ишончли ҳимоя қилиш борасида доимий ғамхўрлик кўрсатилмоқда.
Ўзбекистон Республикаси Ногиронлар жамияти Амударё туман бўлинмаси томонидан туманимизда истиқомат қилувчи имконияти чекланган фуқароларни ижтимоий-маънавий қўллаб-қувватлашга, уларнинг ўз имкониятлари даражасида касб-ҳунар билан шуғулланишларига улкан эътибор қаратилмоқда. Ногиронлиги бўлган ёшларнинг ўз билимларини оширишларига, касб эгаллашларига зарур шарт-шароитлар яратилмоқда. Бўлинма Олий Мажлис ҳузуридаги нодавлат нотижорат ташкилотларини ва фуқаролик жамиятининг бошқа институтларини қўллаб-қувватлаш жамоат Фонди таъсис этган грант танловларида бир неча бор ўз лойиҳалари билан қатнашиб, ғолиб бўлган эди. Лойиҳаларнинг муваффақиятли амалга оширилиши натижасида ўнлаб имконияти чекланган ёшлар замонавий билимларни ўзлаштириб, ахборот-коммуникацион технологиялар бўйича кўникмаларга эга бўлдилар.
Бўлинма ўтган йилнинг декабрь ойида Ўзбекистон Нодавлат нотижорат ташкилотлари миллий ассоциацияси томонидан эълон қилинган “Янги Ренессанс иштирокчилари” грант танловида “Жисмоний имконияти чекланган ўсмирлар ва ёшларни интеллектуал меҳнат фаолиятига жалб қилиш” номли лойиҳаси билан қатнашиб, ғолиб бўлган эди. Айни пайтда лойиҳа муваффақиятли амалга оширилмоқда.
Яқинда Манғит шаҳридаги Амударё муҳандислик техникуми фаоллар залида ушбу лойиҳа доирасида тадбир бўлиб ўтди.
Тадбирга туман ҳокимлиги ва Маҳалла ва оилани қўллаб-қувватлаш бўлими масъуллари, мактабларда индувидуал таълим олаётган ўқувчилар ва “Ногиронлар” жамияти туман бўлинмаси ҳисобида турувчи жисмоний имконияти чекланган ёшлар, туманимизнинг кўзга кўринган ижодкорлари, тадбиркорлари иштирок этдилар. Семинарда дастлаб нодавлат нотижорат ташкилотлари миллий ассоциацияси Қорақалпоғистон бўлими раҳбари Гулсара Жўллибекова сўзга чиқиб, семинар мазмун-моҳияти ва ундан кутилаётган натижалар ҳақида гапирди.
Шунингдек, Ногиронлар жамияти туман бўлинмаси раиси Нилуфар Холбоева лойиҳа доирасида жисмоний имконияти чекланганларнинг тўлақонли илм олиши, ўз иқтидорини ривожлантириши ва намоён этиши учун амалга ошириладиган ишлар хусусида сўзлади.
Шундан сўнг туман маҳалла ва оилани қўллаб-қувватлаш бўлими бошлиғининг биринчи ўринбосари Гўзал Сабурова ва “Aziya Consult” ўқув маркази масъуллари сўзга чиқиб, юртимизда, хусусан туманимизда жисмоний имконияти чекланган ёшларга кўрсатилаётган ғамхўрликлар, уларнинг олий таълим муассасаларига ўқишга киришида яратилаётган имкониятлар ҳақида гапириб, бу борада Ўзбекистон Ногиронлар жамияти туман бўлинмаси раиси Нилуфар Холбоеванинг саъй-ҳаракатларига юқори баҳо бердилар.
Ногиронлиги бўлса-да, ўзини ҳеч кимдан кам демай меҳнат қилиб келаётган, хизматлари эвазига “Жасорат” медали билан тақдирланган Зулхумор Ҳусанова ва Равшанбек Матмуродовлар ёшларга ўз ҳаётлари ҳақида гапириб бериб, улкан мотивация берди.
Семинар иштирокчилари ижодкор, таълим фахрийлари Турсунбой Абдуллаев, Аҳмад Нафасовларнинг шеърларини завқ билан тингладилар, тадбиркор Турсунбой Аҳмедовнинг илиқ сўзларидан, совға қилган китобларидан хурсанд бўлдилар.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
