GRANT LOYIHASI DOIRASIDA SEMINAR OʻTKAZILDI

Mamlakatimizda imkoniyati cheklanganlarga koʻmaklashish, ularni moddiy va maʼnaviy qoʻllab-quvvatlash, imkon darajasida foydali mehnatga jalb qilish, hayotimizning barcha jabhalarida faol ishtirokini taʼminlash va haq-huquqlarining ishonchli himoya qilish borasida doimiy gʻamxoʻrlik koʻrsatilmoqda.

Oʻzbekiston Respublikasi Nogironlar jamiyati Amudaryo tuman boʻlinmasi tomonidan tumanimizda istiqomat qiluvchi imkoniyati cheklangan fuqarolarni ijtimoiy-maʼnaviy qoʻllab-quvvatlashga, ularning oʻz imkoniyatlari darajasida kasb-hunar bilan shugʻullanishlariga ulkan eʼtibor qaratilmoqda. Nogironligi boʻlgan yoshlarning oʻz bilimlarini oshirishlariga, kasb egallashlariga zarur shart-sharoitlar yaratilmoqda. Boʻlinma Oliy Majlis huzuridagi nodavlat notijorat tashkilotlarini va fuqarolik jamiyatining boshqa institutlarini qoʻllab-quvvatlash jamoat Fondi taʼsis etgan grant tanlovlarida bir necha bor oʻz loyihalari bilan qatnashib, gʻolib boʻlgan edi. Loyihalarning muvaffaqiyatli amalga oshirilishi natijasida oʻnlab imkoniyati cheklangan yoshlar zamonaviy bilimlarni oʻzlashtirib, axborot-kommunikatsion texnologiyalar boʻyicha koʻnikmalarga ega boʻldilar.

Boʻlinma oʻtgan yilning dekabr oyida Oʻzbekiston Nodavlat notijorat tashkilotlari milliy assotsiatsiyasi tomonidan eʼlon qilingan “Yangi Renessans ishtirokchilari” grant tanlovida “Jismoniy imkoniyati cheklangan oʻsmirlar va yoshlarni intellektual mehnat faoliyatiga jalb qilish” nomli loyihasi bilan qatnashib, gʻolib boʻlgan edi. Ayni paytda loyiha muvaffaqiyatli amalga oshirilmoqda.

Yaqinda Mangʻit shahridagi Amudaryo muhandislik texnikumi faollar zalida ushbu loyiha doirasida tadbir boʻlib oʻtdi.

Tadbirga tuman hokimligi va Mahalla va oilani qoʻllab-quvvatlash boʻlimi masʼullari, maktablarda induvidual taʼlim olayotgan oʻquvchilar va “Nogironlar” jamiyati tuman boʻlinmasi hisobida turuvchi jismoniy imkoniyati cheklangan yoshlar, tumanimizning koʻzga koʻringan ijodkorlari, tadbirkorlari ishtirok etdilar. Seminarda dastlab nodavlat notijorat tashkilotlari milliy assotsiatsiyasi Qoraqalpogʻiston boʻlimi rahbari Gulsara Joʻllibekova soʻzga chiqib, seminar mazmun-mohiyati va undan kutilayotgan natijalar haqida gapirdi.

Shuningdek, Nogironlar jamiyati tuman boʻlinmasi raisi Nilufar Xolboyeva loyiha doirasida jismoniy imkoniyati cheklanganlarning toʻlaqonli ilm olishi, oʻz iqtidorini rivojlantirishi va namoyon etishi uchun amalga oshiriladigan ishlar xususida soʻzladi.

Shundan soʻng tuman mahalla va oilani qoʻllab-quvvatlash boʻlimi boshligʻining birinchi oʻrinbosari Goʻzal Saburova va “Aziya Consult” oʻquv markazi masʼullari soʻzga chiqib, yurtimizda, xususan tumanimizda jismoniy imkoniyati cheklangan yoshlarga koʻrsatilayotgan gʻamxoʻrliklar, ularning oliy taʼlim muassasalariga oʻqishga kirishida yaratilayotgan imkoniyatlar haqida gapirib, bu borada Oʻzbekiston Nogironlar jamiyati tuman boʻlinmasi raisi Nilufar Xolboyevaning saʼy-harakatlariga yuqori baho berdilar.

Nogironligi boʻlsa-da, oʻzini hech kimdan kam demay mehnat qilib kelayotgan, xizmatlari evaziga “Jasorat” medali bilan taqdirlangan Zulxumor Husanova va Ravshanbek Matmurodovlar yoshlarga oʻz hayotlari haqida gapirib berib, ulkan motivatsiya berdi.

Seminar ishtirokchilari ijodkor, taʼlim faxriylari Tursunboy Abdullayev, Ahmad Nafasovlarning sheʼrlarini zavq bilan tingladilar, tadbirkor Tursunboy Ahmedovning iliq soʻzlaridan, sovgʻa qilgan kitoblaridan xursand boʻldilar.

Oygul RAJABOVA.