МАТЕМАТИКА ФАНИ ОЙЛИГИ ДОИРАСИДА 30-СОНЛИ МАКТАБДА БЕЛЛАШУВ ЎТКАЗИЛДИ
Шу кунларда умумтаълим мактабларида математика фани ойлигига бағишланган тадбирлар ўтказилмоқда. Фан ойлиги доирасида ўтказилаётган тадбирларда ўқувчиларнинг билимлари мустаҳкамланиб, қизиқишлари оширилмоқда. Бундай тадбирларни ташкил этишдан мақсад – ўқувчиларнинг математика ва информатика фанлари бўйича олган назарий билимларини амалиёт билан боғлаш ва математика фанига оид билим кўникма ва малакаларини шакллантиришдан иборат.
Ойлик доирасида Амударё туманидаги 30-сонли мактабда ҳам ҳар бир ҳафта давомида тадбирлар, очиқ дарслар, викториналар, беллашувлар ва баҳс-мунозарали интеллектуал ўйинлар ташкил этилди.
Фан ойлиги муносабати билан 8-синф ўқувчилари ўртасида билимлар беллашуви ўтказилди. Тадбирда дастлаб ойлик доирасида ўтказилаётган тадбирлар, уларнинг фанни ўзлаштиришдаги самараси тўғрисида сўз юритилди. Мактаб ўқувчилари ўртасида синфлар кесимида синов тестлари олингани, ўқувчиларнинг мазкур фанлардан эгаллаган билим, кўникма, малака ва компетенцияларининг мониторинги метод бирлашмаларда жадвал ҳамда диаграммалар асосида таҳлил қилиниб, муҳокама этилгани айтиб ўтилди. Шунингдек, “Очиқ дарслар ҳафталиги”да синфлар кесимида белгиланган мавзулар бўйича машғулотлар олиб борилгани ва бу машғулотларни ота-оналар, ўқитувчилар фаол кузатишгани, таҳлил қилишгани бу таълим самарадорлигини оширишда муҳим аҳамият касб этаётгани хусусида гапирилди.
Шундан сўнг, мактабнинг 8-синф ўқувчилари ўртасида “Ўйнаймиз – ҳисоб-китоб қиламиз” деб номланган беллашув бошлаб юборилди. Ўқувчиларнинг фанга бўлган қизиқишларини янада ошириш мақсадида ўтказилган ушбу беллашув мактабнинг информатика фани ўқитувчиси Шоҳида Якубова, математика фани ўқитувчилари Назокат Солиева, Гулистон Гаюпова, Рашид Давлетов, Зоҳид Ўрозбоев, Гулистон Шукуруллаевалар томонидан ташкил этилди.
Таълим ўзбек ва рус тилларида олиб бориладиган синфлар ўқувчилари ўртасида бўлиб ўтган беллашувда иштирокчилар белгиланган шартлар бўйича ўз билимларини синовдан ўтказдилар. Иштирокчилар берилган мисолларни белгиланган вақтда ечишга ҳаракат қилишди. Беллашувда билимларини намоён этган ўқувчилар математика-информатика фанлари сирларини пухта эгаллаганликларини, маҳоратларини кўрсатишди.
Танлов шартларининг ранг-баранглиги иштирокчилар ўртасида катта қизиқиш ва қизғин мунозараларга сабаб бўлди. Айниқса, ўқувчиларнинг математика белгилари ёрдамида чизган сурати ҳакамлар эътиборини тортди. Сардорлар беллашувида ҳар иккала жамоа сардорлари фаол иштирок этишиб, ўз синфларининг ғолиб бўлишига катта ҳисса қўшишди.
Беллашувда ўқувчилар фаол иштирок қилдилар. Шунингдек, уларнинг математика фанидан олган билимлари янада мустаҳкамланди. Қизиқарли, баҳс-мунозарага бой бўлган беллашувда, ўқувчиларнинг аниқ фанларга бўлган қизиқишлари янада ошди.
Ҳакамлар ҳайъати томонидан ушбу тадбирнинг аҳамияти юксак баҳоланди. Ота-оналар ва ўқитувчиларда ҳам катта таассурот қолдирган тадбир фаоллари фахрий ёрлиқ ва эсдалик совғалари билан тақдирланишди.
Гулзамон Нуруллаева, 30-сонли мактаб ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
