Педагоглардан иборат жамоалар ўртасида “Заковат” интеллектуал ўйини ўтказилди

Мамлакатимизда илм-фан ривожига қаратилаётган эътибор кўлами йил сайин кенгаймоқда. Ёшларнинг ақл-заковатини оширадиган, иқтидорини рўёбга чиқарадиган лойиҳалар изчил қўллаб-қувватланаётгани, интеллектуал салоҳиятни оширишга қаратилган ҳар қандай ташаббус рағбатлантирилаётгани ўзининг ижобий самараларини бермоқда.

Ўзбекистон Республикаси Президентининг 2022 йил 20 январдаги “Заковат” интеллектуал ўйинини аҳоли ўртасида оммавий-маърифий ҳаракатга айлантириш ва бошқа интеллектуал ўйинларни ривожлантиришга оид чора-тадбирлар тўғрисида” ги қарори имзоланиши ҳам билимга чанқоқ ёшлар учун муҳим янгилик бўлди.

 Қарорга асосан, Амударё тумани Халқ таълим бўлимига қарашли умумтаълим мактаб педагоглари ўртасида “Заковат” интеллектуал ўйини ташкил қилинди. Мақсад – иқтидорли ёшларнинг билимларини ошириш, уларни саралаш ва интеллектуал ўйинларга кенг жалб қилишдир. Ўтказилган мазкур интеллектуал ўйинда туманимиздаги 85 та умумтаълим мактабларининг ҳар биридан 1 тадан жамоа қатнашиб, билимларини синовдан ўтказишди.

21 февралдан 24 февралгача “Заковат” интеллектуал ўйинининг секторлар кесимида саралаш босқичи ўтказилди. Ҳудудий саралаш босқичида 1-сектор ҳудудидан 18-, 26- ва 82-сонли умумтаълим мактаб педагог жамоалари, 2-сектор ҳудудидан 15-, 27- ва 84-сонли мактаблар педагог жамоалари ярим финал йўлланмасини қўлга киритди. 3-сектор ҳудудидан 9-, 41- ва 85-сонли мактаб педагог жамоалари, 4-сектор ҳудудидан эса 30-, 31- ва 76-сонли мактаб педагог жамоалари кейинги босқичга йўлланма олдилар.

“Заковат” интеллектуал ўйинининг ярим финал босқичи 26 февраль куни ўтказилиб, бир-биридан билимдон ва салоҳиятли жамоа вакиллари ўзларининг бор билимларини ишга солиб, куч синашишди.

Ярим финал ўйинлари натижаларига кўра, 1-сектор ҳудудидан 18-сонли умумтаълим мактаби педагог жамоаси, 2-сектор ҳудудидан 84-сонли умумтаълим мактаб педагог жамоаси, 3-сектор ҳудудидан 9-сонли умумтаълим мактаби педагог жамоаси, 4-сектор ҳудудидан эса 30-сонли умумтаълим мактаб педагог жамоалари финалга йўлланмани қўлга киритди.

1 март куни “Заковат” интеллектуал ўйинининг туман бўйича финал босқичи бўлиб ўтди. Муросасиз кечган ўйин натижаларига кўра финалда 1-ўринни 30-сонли, 2-ўринни 9-сонли ва 3-ўринни 84-сонли мактаб педагогларидан иборат билимдонлар жамоалари эгаллашди. Ғолиб бўлган жамоалар Фахрий ёрлиқ ва эсталик совғалари билан тақдирландилар.

Шу ўринда айтиш лозимки мустақил фикрлайдиган, зукко ва кенг дунёқарашга эга бўлган ўғил-қизларни тарбиялаш борасидаги ишларга давлат сиёсатининг энг муҳим ва устувор йўналиши сифатида алоҳида эътибор берилмоқда. Ёшларни изланувчанлик, ташаббускорлик ва етакчиликка ундаб келаётган “Заковат” интеллектуал ўйини ҳам ушбу вазифалар ижросини таъминлашда муҳим аҳамият касб этади.

Ф.Эшимбетова.