Pedagoglardan iborat jamoalar oʻrtasida “Zakovat” intellektual oʻyini oʻtkazildi

Mamlakatimizda ilm-fan rivojiga qaratilayotgan eʼtibor koʻlami yil sayin kengaymoqda. Yoshlarning aql-zakovatini oshiradigan, iqtidorini roʻyobga chiqaradigan loyihalar izchil qoʻllab-quvvatlanayotgani, intellektual salohiyatni oshirishga qaratilgan har qanday tashabbus ragʻbatlantirilayotgani oʻzining ijobiy samaralarini bermoqda.

Oʻzbekiston Respublikasi Prezidentining 2022-yil 20-yanvardagi “Zakovat” intellektual oʻyinini aholi oʻrtasida ommaviy-maʼrifiy harakatga aylantirish va boshqa intellektual oʻyinlarni rivojlantirishga oid chora-tadbirlar toʻgʻrisida” gi qarori imzolanishi ham bilimga chanqoq yoshlar uchun muhim yangilik boʻldi.

 Qarorga asosan, Amudaryo tumani Xalq taʼlim boʻlimiga qarashli umumtaʼlim maktab pedagoglari oʻrtasida “Zakovat” intellektual oʻyini tashkil qilindi. Maqsad – iqtidorli yoshlarning bilimlarini oshirish, ularni saralash va intellektual oʻyinlarga keng jalb qilishdir. Oʻtkazilgan mazkur intellektual oʻyinda tumanimizdagi 85 ta umumtaʼlim maktablarining har biridan 1 tadan jamoa qatnashib, bilimlarini sinovdan oʻtkazishdi.

21-fevraldan 24-fevralgacha “Zakovat” intellektual oʻyinining sektorlar kesimida saralash bosqichi oʻtkazildi. Hududiy saralash bosqichida 1-sektor hududidan 18-, 26- va 82-sonli umumtaʼlim maktab pedagog jamoalari, 2-sektor hududidan 15-, 27- va 84-sonli maktablar pedagog jamoalari yarim final yoʻllanmasini qoʻlga kiritdi. 3-sektor hududidan 9-, 41- va 85-sonli maktab pedagog jamoalari, 4-sektor hududidan esa 30-, 31- va 76-sonli maktab pedagog jamoalari keyingi bosqichga yoʻllanma oldilar.

“Zakovat” intellektual oʻyinining yarim final bosqichi 26-fevral kuni oʻtkazilib, bir-biridan bilimdon va salohiyatli jamoa vakillari oʻzlarining bor bilimlarini ishga solib, kuch sinashishdi.

Yarim final oʻyinlari natijalariga koʻra, 1-sektor hududidan 18-sonli umumtaʼlim maktabi pedagog jamoasi, 2-sektor hududidan 84-sonli umumtaʼlim maktab pedagog jamoasi, 3-sektor hududidan 9-sonli umumtaʼlim maktabi pedagog jamoasi, 4-sektor hududidan esa 30-sonli umumtaʼlim maktab pedagog jamoalari finalga yoʻllanmani qoʻlga kiritdi.

1-mart kuni “Zakovat” intellektual oʻyinining tuman boʻyicha final bosqichi boʻlib oʻtdi. Murosasiz kechgan oʻyin natijalariga koʻra finalda 1-oʻrinni 30-sonli, 2-oʻrinni 9-sonli va 3-oʻrinni 84-sonli maktab pedagoglaridan iborat bilimdonlar jamoalari egallashdi. Gʻolib boʻlgan jamoalar Faxriy yorliq va estalik sovgʻalari bilan taqdirlandilar.

Shu oʻrinda aytish lozimki mustaqil fikrlaydigan, zukko va keng dunyoqarashga ega boʻlgan oʻgʻil-qizlarni tarbiyalash borasidagi ishlarga davlat siyosatining eng muhim va ustuvor yoʻnalishi sifatida alohida eʼtibor berilmoqda. Yoshlarni izlanuvchanlik, tashabbuskorlik va yetakchilikka undab kelayotgan “Zakovat” intellektual oʻyini ham ushbu vazifalar ijrosini taʼminlashda muhim ahamiyat kasb etadi.

F.Eshimbetova.