“Янги Ўзбекистон ёшлари, бирлашайлик!” шиори остида ёшлар фестивали бўлиб ўтди

Юртимизда ёшларнинг ғоя ва таклифларини эшитиш учун майдон яратиш, замон қаҳрамонларини кашф этиш, уларнинг илмий ва ижодий салоҳиятини рўёбга чиқариш ва мамлакатдаги янгиланишларга фаол жалб қилиш мақсадида кўплаб ижобий ишлар амалга оширилмоқда. Айтиш керакки, ҳукуматимиз томонидан ёшлар борасида қабул қилинаётган қарорлар фақатгина ёш авлоднинг манфаатларини таъминлашга қаратилган. Президентимиз томонидан қабул қилинган “Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида”ги қарор ҳам айнан шу мақсадлар руёбига ҳизмат қилади.

Мазкур қарорда ёшларнинг бандлиги таъминлаш, касбга ўқитиш, спортга қизиқтириш ва бўш вақтини мазмунли ташкил этиш борасида кўплаб устувор вазифалар белгилаб берилди.

Ушбу қарор ижросини таъминлаш мақсадида Амударё туманида секторлар кесимида кўплаб танловлар ва спорт мусобақалари ўтказиб келинмоқда.

Жумладан, 3 март куни Назархан овулида “Янги Ўзбекистон ёшлари, бирлашайлик!” шиори остида ёшлар фестивали бўлиб ўтди.

Фестивал “Саломатлик учун 5000 қадам” тадбири билан бошланди. Шундан сўнг, 3-сонли мактабнинг спорт майдончасида ўғил болалар ўртасида спортнинг мини футбол тури бўйича мусобақа бўлиб ўтди. Шиддатли ва муросасиз кечган учрашувда “Назархан жаслари” жамоси биринчи ўринни эгаллади.

Хотин-қизлар ўртасида спортни тарғиб қилиш бугунги куннинг долзарб масаласи. Сабаби, соғлом ва баркамол авлодни дунёга келтириш ва тарбиялаш давлат сиёсати даражасига кўтарилган. Ўтказилган фестивалда аёл-қизлар ҳам фаол қатнашишди. Улар спортнинг волейбол тури бўйича куч синашиб спортдаги қобилиятларини намоён қилдилар. Мусобақада 3-сонли мактаб жамоаси биринчи ўринни эгаллади. Шунингдек, спортнинг теннис,шахмат ва шашка турлари бўйича ҳам мусобақалар бўлиб ўтди. Мусобақаларнинг барчасида ғолиб бўлган жамоалар туман Туризм ва спорт бўлими ҳамда Ёшлар ишлари агентлиги туман бўлими томонидан муносиб тақдирланди.

Куннинг иккинчи ярмида Назархан овул фуқаролар йиғини биносида туман ҳокими Султонбой Йўлдашев аҳоли ва ёшлар билан учрашди. Учрашув давомида ёшларга яратилаётган имконият ва шарт-шароитлар ҳақида сўз юритилди.

Шунингдек, учрашув давомида ёшлар томонидан бир қанча муаммо ва таклифлардан иборат мурожаатлар келиб тушди. Мурожаатларнинг аксарияти шу жойнинг ўзида ҳал этилган бўлса, баъзиларига ҳуқуқий тушунтиришлар берилди. Муддат талаб қилувчи мурожаатлар тегишли соҳа вакилларига топшириқ сифатида берилди.

Шундан сўнг, туманимиз ҳудудида жойлашган “Чилпиқ” археологик ёдгорлигига саёҳат ташкил қилинди. Ёшларга ушбу ёдгорлик ҳақида кенг турда маълумотлар берилиб, уларнинг илмий ва маънавий дунёсини янада бойитишга ҳисса қўшилди.

Саёҳат давомида ёшлар мазкур тарихий ёдгорликнинг сир-синоатларга тўла эканлигини ва бу халқимиз тарихининг узоқ ўтмишга бориб тақалишини тушуниб, қалбларида бир олам тассурот ва ғурур билан қайтдилар.

Туман ҳокимлигининг Ахборот хизмати