“Yangi Oʻzbekiston yoshlari, birlashaylik!” shiori ostida yoshlar festivali boʻlib oʻtdi

Yurtimizda yoshlarning gʻoya va takliflarini eshitish uchun maydon yaratish, zamon qahramonlarini kashf etish, ularning ilmiy va ijodiy salohiyatini roʻyobga chiqarish va mamlakatdagi yangilanishlarga faol jalb qilish maqsadida koʻplab ijobiy ishlar amalga oshirilmoqda. Aytish kerakki, hukumatimiz tomonidan yoshlar borasida qabul qilinayotgan qarorlar faqatgina yosh avlodning manfaatlarini taʼminlashga qaratilgan. Prezidentimiz tomonidan qabul qilingan “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi qaror ham aynan shu maqsadlar ruyobiga hizmat qiladi.

Mazkur qarorda yoshlarning bandligi taʼminlash, kasbga oʻqitish, sportga qiziqtirish va boʻsh vaqtini mazmunli tashkil etish borasida koʻplab ustuvor vazifalar belgilab berildi.

Ushbu qaror ijrosini taʼminlash maqsadida Amudaryo tumanida sektorlar kesimida koʻplab tanlovlar va sport musobaqalari oʻtkazib kelinmoqda.

Jumladan, 3-mart kuni Nazarxan ovulida “Yangi Oʻzbekiston yoshlari, birlashaylik!” shiori ostida yoshlar festivali boʻlib oʻtdi.

Festival “Salomatlik uchun 5000 qadam” tadbiri bilan boshlandi. Shundan soʻng, 3-sonli maktabning sport maydonchasida oʻgʻil bolalar oʻrtasida sportning mini futbol turi boʻyicha musobaqa boʻlib oʻtdi. Shiddatli va murosasiz kechgan uchrashuvda “Nazarxan jaslari” jamosi birinchi oʻrinni egalladi.

Xotin-qizlar oʻrtasida sportni targʻib qilish bugungi kunning dolzarb masalasi. Sababi, sogʻlom va barkamol avlodni dunyoga keltirish va tarbiyalash davlat siyosati darajasiga koʻtarilgan. Oʻtkazilgan festivalda ayol-qizlar ham faol qatnashishdi. Ular sportning voleybol turi boʻyicha kuch sinashib sportdagi qobiliyatlarini namoyon qildilar. Musobaqada 3-sonli maktab jamoasi birinchi oʻrinni egalladi. Shuningdek, sportning tennis,shaxmat va shashka turlari boʻyicha ham musobaqalar boʻlib oʻtdi. Musobaqalarning barchasida gʻolib boʻlgan jamoalar tuman Turizm va sport boʻlimi hamda Yoshlar ishlari agentligi tuman boʻlimi tomonidan munosib taqdirlandi.

Kunning ikkinchi yarmida Nazarxan ovul fuqarolar yigʻini binosida tuman hokimi Sultonboy Yoʻldashev aholi va yoshlar bilan uchrashdi. Uchrashuv davomida yoshlarga yaratilayotgan imkoniyat va shart-sharoitlar haqida soʻz yuritildi.

Shuningdek, uchrashuv davomida yoshlar tomonidan bir qancha muammo va takliflardan iborat murojaatlar kelib tushdi. Murojaatlarning aksariyati shu joyning oʻzida hal etilgan boʻlsa, baʼzilariga huquqiy tushuntirishlar berildi. Muddat talab qiluvchi murojaatlar tegishli soha vakillariga topshiriq sifatida berildi.

Shundan soʻng, tumanimiz hududida joylashgan “Chilpiq” arxeologik yodgorligiga sayohat tashkil qilindi. Yoshlarga ushbu yodgorlik haqida keng turda maʼlumotlar berilib, ularning ilmiy va maʼnaviy dunyosini yanada boyitishga hissa qoʻshildi.

Sayohat davomida yoshlar mazkur tarixiy yodgorlikning sir-sinoatlarga toʻla ekanligini va bu xalqimiz tarixining uzoq oʻtmishga borib taqalishini tushunib, qalblarida bir olam tassurot va gʻurur bilan qaytdilar.

Tuman hokimligining Axborot xizmati