Ҳоким ёрдамичиси: “Ҳар бир оила даромад манбаига эга бўлиши керак”

Кейинги йилларда маҳалла фаолиятига катта эътибор қаратилиб, маҳаллабай ва хонадонбай ишлаш тизими жорий этилди. Ушбу тизмлар фаолияти йўлга қўйилганлиги натижасида кўплаб муаммолар ечим топиб, халқимиз турмуши фаровонлиги кун сайин юксалмоқда.

Амударё туманининг 49 та маҳаллаларида ҳоким ёрдамчилари ўз фаолиятини бошлаганига 2 ойдан ошиқроқ вақт бўлди. Улар ҳудудни иқтисодий ривожлантириш, тадбиркорликни қўллаб-қувватлаш, аҳоли бандлигини таъминлашга яқиндан кўмаклашмоқда. Ҳоким ёрдамчиларининг самарали фаолият олиб боришлари учун етарли шароитлар яратилган.

Туманимизнинг Оқ олтин овулига бириктирилган ҳоким ёрдамчиси Отабек Ибрагимов ҳам бошқа касбдошлари сингари очиқ танловда қатнашиб, салоҳиятли кадр сифатида танлаб олинди. Иш бошлаганига ҳали кўп вақт бўлмаса ҳам, маҳалладошларининг ҳурмати ва ишончига эришди.

Маълумот учун, бугунги кунда Оқ олтин овулида 1325 та хонадон мавжуд бўлиб, ушбу хонадонларда 7410 нафар аҳоли истиқомат қилади. Овул аҳолиси асосан деҳқончилик, боғдорчилик, чорвачилик билан шуғулланиб келади. 

Ҳоким ёрдамчиси ўз иш фаолиятини дастлаб, хатловдан бошлади. Уйма-уй юрган ҳолда хонадонлардаги аҳвол билан танишиб, уларнинг муаммо ва таклифларини ўрганди. Шунингдек, маҳалланинг “ўсиш нуқталари”ни аниқлаб, хизмат кўрсатиш ва сервис соҳасини ривожлантириш, тадбиркорларнинг сонини кўпайтиришни ўз олдига мақсад қилиб қўйди.

Ҳоким ёрдамчиси таъкидлаганидек, ҳар бир рўзғор даромад манбаига эга бўлса, камбағаллик деган тушунчага ўрин қолмайди. Аҳоли билан юзма-юз мулоқот чоғида Отабек Ибрагимов қишлоқ хўжалиги ерларини ижарага олиш истагидаги фуқароларга зарурий тушунтиришлар бериб, тадбиркорлик йўналишларини белгилаб олишларида ҳам амалий ёрдамлар бермоқда.

Маълумки, айни кунларда Президентимизнинг махсус қарори асосида жорий йилда туман бўйича фермер хўжаликларининг пахта ва ғалладан қисқартирилган 897 гектар майдонларини жами 3 минг 588 та деҳқон хўжаликлари ташкил қилиш учун аҳолига бериш бўйича амалий ишлар давом этмоқда. Овул ҳудудида умумий майдони 42 гектар бўлган қишлоқ хўжалиги ерлари 168 та лотларга бўлиниб, шундан 159 таси аукционга қўйилди. Аукцион натижаларига кўра бугунги кунда 6,25 гектар ер 25 нафар фуқароларга ажратиб берилиб, фуқароларнинг бандлиги таъминланди.

Шунингдек, ҳоким ёрдамчиси томонида касб-хунар эгаллашга иштиёқи ва қобилияти бор 5 нафар фуқаролар “Ишга марҳамат” мономаркази, касб-ҳунарга ўқитиш маркази ва бошқа нодавлат таълим муассасаларида ўқитишга йўналтирилди.

Бундан ташқари, фуқароларнинг томорқаларига хизмат кўрсатиш ҳамда сифатли ва арзон уруғлар етказиб бериш мақсадида “Oq-oltin tomorqa xizmati” масъулияти чекланган жамияти ҳам ташкил этилиб, ишсиз фуқароларнинг бандлиги таъминланмоқда.

Шунингдек, овул ҳудудида 1 гектарлик иссиқхона ҳам ташкил қилинди.

Бир сўз билан айтганда, Инсон қадрини улуғлаш ва фаол маҳалла йилида ҳоким ёрдамчилари томонидан олиб борилаётган бу каби ишлар халқимиз турмуш фаровонлигини бундан ҳам юксалтиришдек эзгу мақсадларга хизмат қилади.

Туман ҳокимлигининг Ахборот хизмати