Hokim yordamichisi: “Har bir oila daromad manbaiga ega boʻlishi kerak”

Keyingi yillarda mahalla faoliyatiga katta eʼtibor qaratilib, mahallabay va xonadonbay ishlash tizimi joriy etildi. Ushbu tizmlar faoliyati yoʻlga qoʻyilganligi natijasida koʻplab muammolar yechim topib, xalqimiz turmushi farovonligi kun sayin yuksalmoqda.

Amudaryo tumanining 49 ta mahallalarida hokim yordamchilari oʻz faoliyatini boshlaganiga 2 oydan oshiqroq vaqt boʻldi. Ular hududni iqtisodiy rivojlantirish, tadbirkorlikni qoʻllab-quvvatlash, aholi bandligini taʼminlashga yaqindan koʻmaklashmoqda. Hokim yordamchilarining samarali faoliyat olib borishlari uchun yetarli sharoitlar yaratilgan.

Tumanimizning Oq oltin ovuliga biriktirilgan hokim yordamchisi Otabek Ibragimov ham boshqa kasbdoshlari singari ochiq tanlovda qatnashib, salohiyatli kadr sifatida tanlab olindi. Ish boshlaganiga hali koʻp vaqt boʻlmasa ham, mahalladoshlarining hurmati va ishonchiga erishdi.

Maʼlumot uchun, bugungi kunda Oq oltin ovulida 1325 ta xonadon mavjud boʻlib, ushbu xonadonlarda 7410 nafar aholi istiqomat qiladi. Ovul aholisi asosan dehqonchilik, bogʻdorchilik, chorvachilik bilan shugʻullanib keladi. 

Hokim yordamchisi oʻz ish faoliyatini dastlab, xatlovdan boshladi. Uyma-uy yurgan holda xonadonlardagi ahvol bilan tanishib, ularning muammo va takliflarini oʻrgandi. Shuningdek, mahallaning “oʻsish nuqtalari”ni aniqlab, xizmat koʻrsatish va servis sohasini rivojlantirish, tadbirkorlarning sonini koʻpaytirishni oʻz oldiga maqsad qilib qoʻydi.

Hokim yordamchisi taʼkidlaganidek, har bir roʻzgʻor daromad manbaiga ega boʻlsa, kambagʻallik degan tushunchaga oʻrin qolmaydi. Aholi bilan yuzma-yuz muloqot chogʻida Otabek Ibragimov qishloq xoʻjaligi yerlarini ijaraga olish istagidagi fuqarolarga zaruriy tushuntirishlar berib, tadbirkorlik yoʻnalishlarini belgilab olishlarida ham amaliy yordamlar bermoqda.

Maʼlumki, ayni kunlarda Prezidentimizning maxsus qarori asosida joriy yilda tuman boʻyicha fermer xoʻjaliklarining paxta va gʻalladan qisqartirilgan 897 gektar maydonlarini jami 3 ming 588 ta dehqon xoʻjaliklari tashkil qilish uchun aholiga berish boʻyicha amaliy ishlar davom etmoqda. Ovul hududida umumiy maydoni 42 gektar boʻlgan qishloq xoʻjaligi yerlari 168 ta lotlarga boʻlinib, shundan 159 tasi auktsionga qoʻyildi. Auktsion natijalariga koʻra bugungi kunda 6,25 gektar yer 25 nafar fuqarolarga ajratib berilib, fuqarolarning bandligi taʼminlandi.

Shuningdek, hokim yordamchisi tomonida kasb-xunar egallashga ishtiyoqi va qobiliyati bor 5 nafar fuqarolar “Ishga marhamat” monomarkazi, kasb-hunarga oʻqitish markazi va boshqa nodavlat taʼlim muassasalarida oʻqitishga yoʻnaltirildi.

Bundan tashqari, fuqarolarning tomorqalariga xizmat koʻrsatish hamda sifatli va arzon urugʻlar yetkazib berish maqsadida “Oq-oltin tomorqa xizmati” masʼuliyati cheklangan jamiyati ham tashkil etilib, ishsiz fuqarolarning bandligi taʼminlanmoqda.

Shuningdek, ovul hududida 1 gektarlik issiqxona ham tashkil qilindi.

Bir soʻz bilan aytganda, Inson qadrini ulugʻlash va faol mahalla yilida hokim yordamchilari tomonidan olib borilayotgan bu kabi ishlar xalqimiz turmush farovonligini bundan ham yuksaltirishdek ezgu maqsadlarga xizmat qiladi.

Tuman hokimligining Axborot xizmati