“Ёшлар овози – 2022” танлови бошланди

Ўзбекистон Республикаси Ёшлар ишлари агентлиги қатор ташкилотлар билан ҳамкорликда “Бўзатов иқтидорларни кашф этади” шиори остида 2021 йилда ўтказган “Ёшлар овози” танловини жорий йилда ҳам давом эттирмоқда. Ушбу танлов ўтган йили илк бор ўтказилганига қарамай, ёшлар орасида ўз ўрни ва нуфузига эга бўлди. Ёшларнинг катта саҳналарда ўз иқтидорини намойиш этиш учун имкон берган танловнинг мадҳияси ҳам яратилди ва ёшларнинг эътиборига тушди.

Қорақалпоғистон Республикасининг қайта тикланган Бўзатов тумани ёш санъат ихлосмандларини бирлаштирадиган, ўз санъатини намойиш этадиган минбарга айланди. Ушбу танловнинг жорий йилги мавсуми ўтган йилгидан фарқлироқ беш босқичда ўтказилади: саралаш босқичи, сектор босқичи, маҳаллий босқич, ҳудудий босқичи ҳамда республика босқичи. Ҳудудий босқичдан муваффақиятли ўтган ёш истеъдодлар Бўзатов туманида бўлиб ўтадиган ушбу танловнинг республика босқичида иштирок этадилар. Қуйи, яъни барча маҳаллаларда ўтказиладиган саралаш босқичидан бошлаб рўйхатдан ўтган ҳар бир иштирокчининг иқтидори синовдан ўтказилади.

10-15 ёш, 16-22 ёш ва 23-30 ёш тоифаларида иштирокчиларнинг бахшичилик, анъанавий ижро (мақом, катта ашула, суворахонлик), опера ҳамда эстрада каби 4 та йўналишнинг бирида иқтидорини синовдан ўтказишни мақсад қилган танловнинг илк босқичи туманимизда ҳам бошланди.

Шу кунгача Амударё туманининг 1- ва 3-секторлари ҳудудидаги 24 та овул, маҳалла, шаҳарчалардан 700 нафардан зиёд ёшлар танловнинг илк босқичида ўз қобилиятларини синовдан ўтказдилар. Шуларнинг 63 нафари кейинги – сектор босқичида иштирок этиш ҳуқуқини қўлга киритдилар. Шу жумладан жорий йилнинг 4 апрелида 21-сонли Болалар мусиқа ва санъат мактабида Қипчоқ овули, шаҳарчаси ва Дарё бўйи маҳалласи санъатсевар ёшлари танловнинг илк босқичида қатнашиб, ўз иқтидорларини синовдан ўтказдилар.

Шуниси қувонарлики, мамлакатимизда ёшларнинг интеллектуал салоҳияти юксалтириш, бўш вақтларини мазмунли ва мақсадли ўтказиш, иқтидорларини ривожлантиришга кўмаклашиш ва уларни бирлаштириш мақсадида ўтказилаётган танлов чекка ҳудудлар ёшларини ҳам қамраб олаяпти.

21-сонли Болалар мусиқа ва санъат мактабида ўтказилган танловнинг илк босқичига иштирокчилар пухта тайёргарликлар кўришганини намойиш этишди. Унда қатнашган 100 нафардан зиёд уч ёш тоифасидаги иштирокчиларнинг 36 нафари кейинги сектор босқичида қатнашиш имкониятини қўлга киритишди.

Бахшичилик, анъанавий ижро, опера ва эстрада йўналишларида ўтказилган танловни малакали мутахассислар, Ёшлар ишлари агентлиги туман бўлими ходимлари ҳаққоний баҳолаб бордилар. “Ёшлар овози” танлови кўплаб иқтидорли ёшларни аниқлашга хизмат қилмоқда. Ушбу танловнинг қуйи яъни маҳаллалар босқичи туманимизда давом этмоқда.

Янги овозларни кашф этиш, уларни қўллаб-қувватлаш, катта саҳналарда ўз санъатини намойиш этиш учун кенг йўл очиб берадиган танловнинг якуний босқичи жорий йилда ҳам Бўзатовда бўлиб ўтади.

О.РАЖАБОВА.