1-СОНЛИ МАКТАБГА АҚШНИНГ ЎЗБЕКИСТОНДАГИ ЭЛЧИХОНАСИ ХОДИМИ ТАШРИФ БУЮРДИ
Бугунги кунда илм-фан ютуқларидан хабардор бўлиш, турли соҳаларда қўлланилаётган замонавий техника ва ускуналарни ўзлаштириш, чет эллик мутахассисларнинг бой тажрибасидан фойдалана олиш учун чет тилларни билиш жуда муҳим. Кейинги йилларда мамлакатимиз таълим муассасаларида ёшларга хорижий тилларни ўргатиш масаласига жуддий эътибор қаратилмоқда. Айниқса дунёдаги етакчи тил ҳисобланмиш инглиз тилини ўқитиш, ўқувчи ёшларнинг ушбу тилда бемалол мулоқот қила олишларига эришиш мақсадида кўпгина чора-тадбирлар амалга оширилаётир. Бунингдек саъй-ҳаракатлар самарасида умумий ўрта таълим мактабларини тугатаётган ёшларнинг хорижий олийгоҳларга ўқишга кираётганлари сафи тобора ортмоқда.
14 апрель куни Амударё туманидаги 1-сонли умумий ўрта таълим мактабига ўқувчиларнинг инглиз тилини ўрганиш даражаси билан танишиш, шунингдек, ўзининг инглиз тилини янада осон ва тез ўргатиш лойиҳаси билан таништириш мақсадида Америка Қўшма штатларининг Ўзбекистондаги элчихонаси ходими Маурин Рунней ташриф буюрди.
Жаноб Рунней мактабда ўзининг инглиз тилини осон ва чуқур ўргатиш лойиҳаси афзалликлари ҳақида маъруза қилди. Лойиҳа мақсади мактаб ўқувчиларининг, барча аҳолининг инглиз тилини чуқур ўрганиб, мазкур тилда бемалол мулоқот қила олиш, ўзларининг фикрларини эркин баён қила олиш кўникмасига эга бўлишларига ёрдам беришдир.
Тадбирда мактабнинг инглиз тили фани ўқитувчилари Муҳаббат Худойберганова, Зивар Отажонова, Қадамбой Аллаберганов, Фариза Ражабова, Иродахон Сафарбоева, Барно Ешимбетова, Мавлуда Усмоновалар профессор Маурин Рунней жаноблари билан инглиз тилини ўқитишнинг истиқболли методлари ҳақида, тилни ўрганишнинг аҳамияти ва бугунги кунда дунёнинг барча давлатларида уни ўргатишга эътибор ошаётгани ҳақида қизғин суҳбатлашдилар. Меҳмон ўзининг инглиз тилини ўқитиш лойиҳасидаги ўзига хосликлар, методлар ҳақида батафсил тушунча берди ва бундан мактаб хорижий тил ўқитувчилари улкан таассуротлар олдилар.
Тадбирда Фариза Ражабова мактабнинг 7-Б синфида “Дунёнинг диққатга сазовор жойлари” мавзусида намунавий дарс ўтди ва бу жараённи диққат билан кузатган меҳмон ўқитувчи маҳоратига юқори баҳо берди. Дарс жараёнида ўқувчиларнинг устози билан бемалол инглиз тилида мулоқот қилиб, ўз фикрларини мустақил билдира олиши меҳмонда зўр таассуротлар қолдирди. У ўқитувчиларнинг, ўқувчиларнинг берган саволларига батафсил жавоблар берди.
Тил билган – эл билади, дейди халқимиз. Мамлакатимизда ёшларини эл биладиган илмли, иқтидорли, маънавиятли, дунё ёшлари билан бемалол беллаша оладиган, салоҳияти юксак қилиб вояга етказиш, шу қаторда хорижий тилларни пухта ўзлаштиришларига эришиш борасида олиб борилаётган изчил ҳаракатлар ўз самарасини бермоқда. Буни мактаблар парталарида ўтириб, хорижий тилларда бурро-бурро сўзлаётган ўқувчилар мисолида ҳам яққол кўришимиз мумкин.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
