Мактабгача таълим ташкилотлари тарбиячилари иштирокида ижодкорлик кўргазмаси ўтказилди

Жорий йилнинг 19 февраль куни Амударё туманидаги “Илк ривожланиш маркази” биносида туманда фаолият юритаётган мактабгача таълим ташкилотлари ходимлари ҳамда уларга масъул сифатида бириктирилган педагоглар иштирокида амалий-кўргазмали семинар бўлиб ўтди. Амударё тумани Мактабгача ва мактаб таълими бўлими бошлиғи томонидан ташкил этилган ушбу тадбирда асосий эътибор “Илк қадам” давлат ўқув дастури талаблари асосида “Ижодкорлик устахоналари”да қўл меҳнати орқали яратиладиган ҳар хил турдаги ўйинчоқлар ва кўргазмали қуроллардан самарали фойдаланиш масалаларига қаратилди.

Семинарда Мактабгача таълим ташкилотлари фаолиятини мувофиқлаштириш шуъбаси бош методисти Ҳулкар Бабажанова ва шуъба методисти Сауле Патуллаевалар сўзга чиқиб, туманда махсус “Ижодкорлик устахонаси” ташкил этилганини, унда ҳар бир мактабгача таълим ташкилотидан бириктирилган ходимлар мунтазам равишда ижодий ишлар олиб бораётганини таъкидлаб ўтди. Яратилган дидактик ўйинчоқлар ва уларни тайёрлаган ижодкор педагогларнинг илғор иш тажрибалари келгусида барча ходимларга оммалаштирилиши таъкидлаб ўтилди.

Тадбирда мактабгача таълим ташкилотларида ташкил этилган "Турон кичкинтойлари" болалар театр жамоалари учун махсус қўл меҳнати билан яратилган кўргазмали қуроллар орқали саҳна кўринишлари намойиш этилди. Йиғилганлар эътиборига 29-сонли давлат мактабгача таълим ташкилоти тарбиячиси Махсуда Қаландарова томонидан қўғирчоқ театри йўналишида “Ур тўқмоқ” эртаги жонли тарзда ҳавола қилинди.

Шунингдек, 18-сонли мактабгача таълим ташкилоти тарбиячиси Санобар Базарбаева соя театри усулида “Капалак” эртагини маҳорат билан кўрсатиб берди. 8-сонли мактабгача таълим ташкилоти вакили Шаҳло Эшимбетова эса бармоқ ва қўлқоп театри йўналишидан фойдаланган ҳолда “Шолғом” эртагини саҳналаштирди. Бундан ташқари, 45-сонли мактабгача таълим ташкилоти тарбиячиси Комила Аманкулова стол театри ёрдамида “Тулки ва турна” эртагини йиғилиш иштирокчиларига намойиш қилди. Ушбу ранг-баранг саҳна кўринишлари семинар иштирокчилари томонидан катта олқишлар билан кутиб олинди ва мутахассисларда жуда катта таассурот қолдирди.

Семинарнинг навбатдаги қисмида кўплаб ижодкор педагоглар ўзларининг қўл меҳнати асосидаги маҳсулотлари билан яқиндан ўртоқлашдилар. Жумладан, 13-сонли давлат мактабгача таълим ташкилоти тарбиячиси Ойша Сафарбаева, 36-сонли давлат мактабгача таълим ташкилоти тарбиячиси Насиба Бабаниязова ҳамда 4-сонли давлат мактабгача таълим ташкилоти тарбиячиси Ўғилжон Ражабовалар ўзлари яратган дидактик ўйинчоқлар намойишини ўтказди. 9-сонли давлат мактабгача таълим ташкилоти тарбиячиси Моҳира Холимбетова, 2-сонли давлат мактабгача таълим ташкилоти тарбиячиси Моҳира Жалалова ва 17-сонли давлат мактабгача таълим ташкилоти тарбиячиси Муборак Юлдашевалар томонидан тайёрланган дидактик ўйинчоқлар ҳам семинар иштирокчиларида катта таассуротлар қолдирди. Айниқса, 19-сонли давлат мактабгача таълим ташкилоти тарбиячиси Асалой Сейтбаева ҳамда 38-сонли давлат мактабгача таълим ташкилоти тарбиячиси Саломат Қурбанбаевалар томонидан яратилган ўзига хос дидактик ўйинчоқлар болаларнинг ҳар томонлама ривожланишига ҳисса қўшиши алоҳида қайд этилди.

Мутахассислар мазкур кўргазмали қуролларнинг қандай материаллардан ва қай усулда ясалишини, қайси мавзуларда ҳамда қайси ёш гуруҳларида фойдаланилишини батафсил тавсифлаб бердилар. Энг муҳими, ушбу воситалар орқали болаларда қандай билим ва кўникмалар шаклланиши алоҳида тушунтирилди.

Семинар якунида кун тартибидаги масала юзасидан қизғин савол-жавоблар ўтказилиб, қатнашувчиларнинг барча фикр ва мулоҳазалари тингланди. Ташкилотчилар келгусида қўл меҳнати билан ўйинчоқлар яратиш бўйича махсус қўлланмалар ишлаб чиқилиб, яратилган дидактик материаллар бўйича ижодкор педагогларнинг илғор иш тажрибаси барча таълим ташкилотларида кенг оммалаштирилишини алоҳида қайд этдилар.