“Ёшлар овози” танловининг туман босқичи ўтказилди

Президентимизнинг 2020 йил 2 октябрь куни Қорақалпоғистон Республикаси Жўқорғи Кенгесининг навбатдан ташқари сессиясида берган топшириқ ҳамда кенгайтирилган тарзда ўтказилган мажлис баёнида белгиланган вазифалар ижроси асосида “Ёшлар овози” танлови ташкил этилган эди.

Мазкур танлов ўтган йили илк маротаба ўтказилишига қарамай, ёшлар орасида тез фурсат ичида ўз ўрнини топди. Бу йил ҳам танловни анъанага айлантириш мақсадида янги овозлар кашф этилмоқда. Айни кунларда Республикамиз бўйлаб “Бўзатов иқтидорларни кашф этади!” шиори остида танловнинг янги мавсуми бўлиб ўтмоқда. Ушбу танлов Ёшлар ишлари агентлиги ва қатор ҳамкор ташкилотлар билан биргаликда ўтказилмоқда.

Танловнинг туман босқичи 16 апрель куни Амударё туманида ҳам кўтаринки руҳда ва юқори савияда ўтказилди. Танлов иштирокчилари 10-15, 16-22, 23-30 ёш тоифаларида бахшичилик, анъанавий ижро яний, мақом, катта ашула, суворахонлик, опера ва эстрада йўналарида ўз иистеъдодини намоён қилдилар.

Танловни туман ҳокими ўринбосари Маҳмуд Шерметов очиб берди ҳамда маҳалла ва сектор босқичларида ғолибликни қўлга киритиб, туман босқичигача етиб келган барча иштирокчиларни самимий табриклаб, ҳудудий ва Республика босқичларида ҳам омад тилади.

Ҳакамлар ҳайъати тадбир давомида барча иштирокчиларнинг истеъдод ва қобилиятларини одилона баҳолаб бордилар.

Аҳамиятли жиҳати, танловнинг ҳолис ва ҳаққоний ўтишини таъминлаш мақсадида ҳар бир иштирокчининг чиқишлари тўлиқ тасвирга олиниб, Ёшлар ишлари агентлиги туман бўлимининг ижтимоий тармоқдаги расмий саҳифаларига жойлаб борилди.

Танловнинг якуний натижаларига кўра, 10-15 ёш тоифасида бахшичилик йўналиши бўйича Жўрабек Саидабдуллаев, Ҳурсанд Давлатбоев, 16-22 ёш тоифасида Отабек Жумабоев, Жавоҳир Саидабдуллаев, 23-30 ёш тоифасида Оғабек Садуллаевлар ғолибликни қўлга киритди.

Анъанавий ижро йўналиши бўйича эса 10-15 ёш тоифасида Камрон Холбоев, Самир Юсупбаев, 16-22 ёш тоифасида Сунталулло Хўжамуратов, Севинч Бектурсинова, 23-30 ёш тоифасида Сардор Машарипов, Элбек Ўразбаевлар ғолиблар сафидан жой олишди.

Шунингдек, опера йўналишида 10-15 ёш тоифасида Равшанбек Камалов, Наврўз Ҳайтимбетов, 16-22 ёш тоифасида Иззат Абдукаримов, 23-30 ёш тоифасида Шерхон Ўтамурадовларга тенг келадиган рақиб топилмади. Эстрада йўналиши бўйича эса 10-15 ёш тоифасида Севинчой Мавлонбергенова, Соҳибжон Йўлдашев, 16-22 ёш тоифасида Дилшода Баҳрамова, Алишер Худойберганов, 23-30 ёш тоифасида Отабек Аҳмадов, Шоҳида Қодировалар танловнинг туман босқичи мутлоқ ғолиблари бўлдилар.

Ғолиблар Ёшлар ишлари агентлиги туман бўлими томонидан тақдирланди ҳамда ҳудудий босқичга йўлланмани қўлга киритдилар. Маълумот ўрнида айтиш керакки, танловнинг Республика босқичида ҳар бир йўналиш бўйича 1-ўрин эгаси 50 млн, 2- ва 3-ўрин совриндорлари мос равишда 30 ҳамда 20 млн сўм пул мукофотини қўлга киритишади. Бундан ташқари, Республика босқичининг қолган иштирокчилари 10 млн сўм пул мукофоти билан тақдирланадилар.

Туманимизнинг хушовоз ёшларига ҳудудий ва Республика босқичларида омад тилаймиз!

Туман ҳокимлигининг Ахборот хизмати