40-СОНЛИ МАКТАБДА МУҲАММАД ЮСУФ ТАВАЛЛУДИНИНГ 68 ЙИЛЛИГИ КЕНГ НИШОНЛАНДИ

Ўзбек халқининг севимли фарзанди, Ўзбекистон халқ шоири Муҳаммад Юсуф ижоди ва унинг бетакрор, жўшқин шеърияти бугунги кунда нафақат ўзбек халқининг, балки бутун Марказий Осиё давлатлари халқларининг маънавий мулкига айланган.

Ўзбек шеъриятининг ривожига жуда катта ҳисса қўшган нодир истеъдод соҳиби Муҳаммад Юсуф қаламига мансуб ҳароратли мисралар бу шеърият билан ошно бўлган ҳар бир қалбга она Юрт, Ватан суратини чизгани, киндик қони томган азиз тупроққа сўнмас меҳр туйғусини уйғота олгани билан миллионлаб инсонлар учун қадрлидир. Шу боис, гарчи шоирнинг ўзи бугун орамизда бўлмаса-да, ҳар йили 26 апрель санаси унинг нафақат таваллуд топган куни, балки она Ватан туйғусини ўз шеърияти билан юксак пардаларда куйлаган чинакам халқ шоирини улуғлаш, хотирасини қадрлаш куни сифатида бутун мамлакатимизда кенг нишонланади.

Амударё туманидаги 40-сонли умумтаълим мактабида ҳам халқимизнинг севимли фарзанди, Ўзбекистон халқ шоири Муҳаммад Юсуф таваллудининг 68 йиллигига бағишланган адабий-мусиқий хотира тадбири бўлиб ўтди.

Мактабнинг тантаналар зали шоир ҳаёти ва ижодига бағишланган кўргазмали воситалар, шоир китоблари, шунингдек, болалиги ва ёшлик даврлари, жўшқин ижодий фаолияти акс эттирилган суратлар, кўргазмали воситалар билан безатилиб, катта экранда Муҳаммад Юсуфнинг ўзи ҳаёт даврида тарихга муҳрланган шеърият давраларидаги, давлат тадбирларидаги чиқишлари, адабий жараёнлардаги фаолияти хусусидаги лавҳалар намойиш этиб борилди.

Шоир хотирасига бағишланган адабий-мусиқий тадбирни мактаб директори, Қорақалпоғистон Республикаси Жўқорғи Кенгеси депутати Санобар Хўжамуродова очди ва барча шеърият шайдоларига ушбу сананинг ўзбек халқи ва адабиёти учун ўта муҳимлиги, қисқа умри  давомида халқимизга улкан маънавий мерос қолдирган, Ўзбекистон деб аталмиш гўзал ва бетакрор заминни бутун жисм-у жони билан севган ҳамда бетакрор шеърларига муҳрлаган Муҳаммад Юсуф номи етти ёшдан етмиш ёшгача ҳар бир юртдошимиз учун қадрли эканлигини таъкидлади.

Шундан сўнг, тадбирда мактаб ўқувчилари томонидан тайёрланган саҳна кўринишлари намойиш этилди. Унда Муҳаммад Юсуфнинг хокисор, мунис ва меҳрибон онаси, яқинлари, дўст-у биродарлари, оиласи, фарзандлари ва шогирдлари билан бўлган юксак инсоний муносабатлари, интилиш ва изланишлари, орзулари йўлидаги машаққатли меҳнат дамлари ишонарли тарзда очиб берилди.

Тадбир меҳмони, Ўзбекистон Ёзувчилар уюшмаси аъзоси, Қорақалпоғистон Республикасида хизмат кўрсатган журналист, шоира  Робия Йўлдошева Муҳаммад Юсуф билан боғлиқ хотиралари ҳақида сўзлаб, шоирнинг деярли барча шеърлари ўзбек адабиётининг, халқимизнинг бебаҳо мулки эканлигини таъкидлади.

У шоир ҳаёти ва шахс сифатидаги эзгу фазилатлари ҳақида гапираркан, Ўзбекистон Қаҳрамони, халқ ёзувчиси Саид Аҳмад айтганидай, гарчи Муҳаммад Юсуф жисман орамизда бўлмаса-да, Муҳаммад Юсуф деб аталган буюк Шеърият борлигини, бу шеърият ҳар бир қалбда мангу яшашини таъкидлади.

Тадбир давомида ўқувчи-ёшлар шоир шеърларини мароқ билан ўқидилар, Муҳаммад Юсуф шеърлари билан айтиладиган қўшиқларни ижро этдилар. Таниқли халқ ҳофизлари томонидан куйланган, халқнинг бетакрор маънавий мулкига айланган ашулаларга рақсга тушдилар. Тадбирнинг ҳар бир лаҳзасида шоир шеърлари янграб турди ва ўзбек халқининг ардоқли фарзанди ижодига, порлоқ  хотирасига юксак ҳурмат ва эҳтиром кўрсатилди.

Р.Аноров, М.Шомуродов олган суратлар.