МАКТАБДА ЭСТЕТИК ФАНЛАР ОЙЛИГИ ДОИРАСИДА ТАДБИР БЎЛИБ ЎТДИ
Умумий ўрта таълим мактабларида фанлар қай даражада ўқитилаётгани, ўқувчиларнинг фан йўналишларида белгиланган билим, кўникма ва малакаларни қай даражада ўзлаштираётганлиги фан ойликларида яққол намоён бўлади. Таълим сифат ва самарадорлигини оширишнинг муҳим воситаларидан бири албатта, фан ойликларидир. Ойлик доирасидаги ўтказиладиган тадбирлар иқтидорли ўқувчиларнинг қобилиятларини маълум бир мақсадга йўналтириш, истеъдодли, изланувчан, ижодкор ўқитувчиларни аниқлаш, уларнинг тажрибаларини ўрганиш ва умумлаштирган ҳолда тарғиб этиш, таълим-тарбия жараёнидаги қўлланилаётган услубларни такомиллаштиришга хизмат қилади.
Умумий ўрта таълим мактабларида ўтказиладиган фан ойликлари 4 ҳафтадан иборат бўлиб, ҳар бир ҳафта учун аниқ мақсадга қаратилган тадбирлар режалаштиради ва бу мактабнинг йиллик иш режасига киритилади. Унинг бажарилиши мониторинг қилиб борилади.
Таълим-тарбия сифатини яхшилашда муҳим омил бўлиб хизмат қилувчи фан ойликларини юқори савияда ўтказишга туманимиз мактабларида ҳам улкан эътибор қаратилмоқда.
Манғит шаҳридаги кимё-биология фанларига ихтисослашган 38-сонли мактабда апрель – эстетик фанлар ойлиги доирасида қатор тадбирлар ўтказилди. Технология, мусиқа таълими, чизмачилик, тасвирий санъат фанларини қамраб олган эстетик фанларга ушбу мактабда ўқувчиларнинг қизиқишлари юқори эканлигини таъкидлаш жоиз. Буни тадбир давомида яққол англаш мумкин бўлди.
Ойлик доирасидаги тадбирларнинг энг охиргиси, ойлик давомида амалга оширилган ишларнинг ҳисоботи тарзида ташкиллаштирилган тадбирда технология фани ўқитувчилари Муҳаббат Бекимбетова, Гуласал Қурбонбоева, Турсуной Салаевалар раҳбарлигида ўқувчиларнинг каштачилик, чеварлик, тўқимачилик меҳнатларининг намуналари намойиш этилди. Кўргазмага қўйилган намуналар қайси ўқувчи ижоди эканлиги ёзиб қўйилди. Шунингдек, тасвирий санъат фани ўқитувчиси Роҳатой Сафарова ўтган дарс машғулотларида ва қўшимча машғулотларда ўқувчилар чизган турли мавзулардаги расмлар кўзгазмаси ҳам барчада улкан таассуротлар қолдирди.
Миллий ҳунармандчилик намуналари ва расмлар кўргазмаси намойишидан сўнг барча мактаб фаоллар залига йиғилди ва тадбирнинг асосий қисми бошланди. Тадбирга мактаб ўқитувчилари, ўқувчиларидан ташқари бир гуруҳ туман Маданият бўлими ходимлари, санъаткорлар, Ўзбекистон Миллий тикланиш демократик партияси туман Кенгаши раиси Ширин Янгибоева, Бўстон маҳалла фуқаролар йиғини ходими Барно Дўсимбетовалар ҳам иштирок этдилар. Тадбирни мактаб директорининг маънавий-маърифий ишлар бўйича ўринбосари Назокат Юсупова очди. У йиғилганларни яқинлашиб келаётган Рамазон ҳайити билан қутлади, мактабда эстетик фанлар ойлиги сўнгги тадбири мақсади ҳақида, эстетик фанларнинг ўқувчилар камолотида тутган ўрни ҳақида батафсил гапирди.
Мактаб эстетика фанлари ўқитувчиларининг ойлик доирасида амалга оширган ишлари ҳақидаги маълумотлари тинглангач, истеъдодли хонанда Рашид Раҳимов, Жамшид Худойберганов, Ўзбекистон Маданият ва санъат институти талабаси Шерзод Матназаровлар ижро этган дилрабо қўшиқлар даврага ўзгача руҳ бағишлади.
Шунингдек, туман Маданият бўлими ходими Насиба Эшчанова туман миқёсида ўтказилаётган турли байрам томошалари ва халқ сайлларида фаол иштирок этиб, томошабинлар эътиборини қозониб келаётгани учун мактаб бадиий ҳаваскорларидан тузилган “Тасанно” гуруҳи раҳбари ва аъзоларини Фахрий ёрлиқлар билан тақдирлади.
Эстетик фанлар ойлиги ҳисобот тадбири барчада унутилмас таассуротлар қолдирди.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
