MAKTABDA ESTETIK FANLAR OYLIGI DOIRASIDA TADBIR BOʻLIB OʻTDI

Umumiy oʻrta taʼlim maktablarida fanlar qay darajada oʻqitilayotgani, oʻquvchilarning fan yoʻnalishlarida belgilangan bilim, koʻnikma va malakalarni qay darajada oʻzlashtirayotganligi fan oyliklarida yaqqol namoyon boʻladi. Taʼlim sifat va samaradorligini oshirishning muhim vositalaridan biri albatta, fan oyliklaridir. Oylik doirasidagi oʻtkaziladigan tadbirlar iqtidorli oʻquvchilarning qobiliyatlarini maʼlum bir maqsadga yoʻnaltirish, isteʼdodli, izlanuvchan, ijodkor oʻqituvchilarni aniqlash, ularning tajribalarini oʻrganish va umumlashtirgan holda targʻib etish, taʼlim-tarbiya jarayonidagi qoʻllanilayotgan uslublarni takomillashtirishga xizmat qiladi.

Umumiy oʻrta taʼlim maktablarida oʻtkaziladigan fan oyliklari 4 haftadan iborat boʻlib, har bir hafta uchun aniq maqsadga qaratilgan tadbirlar rejalashtiradi va bu maktabning yillik ish rejasiga kiritiladi. Uning bajarilishi monitoring qilib boriladi.

Taʼlim-tarbiya sifatini yaxshilashda muhim omil boʻlib xizmat qiluvchi fan oyliklarini yuqori saviyada oʻtkazishga tumanimiz maktablarida ham ulkan eʼtibor qaratilmoqda.

Mangʻit shahridagi kimyo-biologiya fanlariga ixtisoslashgan 38-sonli maktabda aprel – estetik fanlar oyligi doirasida qator tadbirlar oʻtkazildi. Texnologiya, musiqa taʼlimi, chizmachilik, tasviriy sanʼat fanlarini qamrab olgan estetik fanlarga ushbu maktabda oʻquvchilarning qiziqishlari yuqori ekanligini taʼkidlash joiz. Buni  tadbir davomida yaqqol anglash mumkin boʻldi.

Oylik doirasidagi tadbirlarning eng oxirgisi, oylik davomida amalga oshirilgan ishlarning hisoboti tarzida tashkillashtirilgan tadbirda texnologiya fani oʻqituvchilari Muhabbat Bekimbetova, Gulasal Qurbonboyeva, Tursunoy Salayevalar rahbarligida oʻquvchilarning kashtachilik, chevarlik, toʻqimachilik mehnatlarining namunalari namoyish etildi. Koʻrgazmaga qoʻyilgan namunalar qaysi  oʻquvchi ijodi ekanligi yozib qoʻyildi. Shuningdek, tasviriy sanʼat fani oʻqituvchisi Rohatoy Safarova oʻtgan dars mashgʻulotlarida va qoʻshimcha mashgʻulotlarda oʻquvchilar chizgan turli mavzulardagi rasmlar koʻzgazmasi ham barchada ulkan taassurotlar qoldirdi.

 Milliy hunarmandchilik namunalari va rasmlar koʻrgazmasi namoyishidan soʻng barcha maktab faollar zaliga yigʻildi va tadbirning asosiy qismi boshlandi. Tadbirga maktab oʻqituvchilari, oʻquvchilaridan tashqari bir guruh tuman Madaniyat boʻlimi xodimlari, sanʼatkorlar, Oʻzbekiston Milliy tiklanish demokratik partiyasi tuman Kengashi raisi Shirin Yangiboyeva, Boʻston mahalla fuqarolar yigʻini xodimi Barno Doʻsimbetovalar ham ishtirok etdilar. Tadbirni maktab direktorining maʼnaviy-maʼrifiy ishlar boʻyicha oʻrinbosari Nazokat Yusupova ochdi. U yigʻilganlarni  yaqinlashib kelayotgan Ramazon hayiti bilan qutladi, maktabda estetik fanlar oyligi soʻnggi tadbiri maqsadi haqida, estetik fanlarning oʻquvchilar kamolotida tutgan oʻrni haqida batafsil gapirdi.

Maktab estetika fanlari oʻqituvchilarining oylik doirasida amalga oshirgan ishlari haqidagi maʼlumotlari tinglangach, isteʼdodli xonanda Rashid Rahimov, Jamshid Xudoyberganov, Oʻzbekiston Madaniyat va sanʼat instituti talabasi Sherzod Matnazarovlar ijro etgan dilrabo qoʻshiqlar davraga oʻzgacha ruh bagʻishladi.

Shuningdek, tuman Madaniyat boʻlimi xodimi Nasiba Eshchanova tuman miqyosida oʻtkazilayotgan turli bayram tomoshalari va xalq sayllarida faol ishtirok etib, tomoshabinlar eʼtiborini qozonib kelayotgani uchun maktab badiiy havaskorlaridan tuzilgan “Tasanno” guruhi rahbari va aʼzolarini Faxriy yorliqlar bilan taqdirladi.

Estetik fanlar oyligi hisobot tadbiri barchada unutilmas taassurotlar qoldirdi.

Oygul RAJABOVA.