“Қалдирғоч” ёзги болалар оромгоҳида “Ёз−ўтмоқда соз” деб номланган тадбир ўтказилди

Юртимизда болаларнинг ёзги таътил кунларини мазмунли ўтказишлари учун барча шароитлар яратилмоқда. Жумладан, Амударё туманининг Дўрман овули ҳудудида янгидан ташкил этилган “Қалдирғоч” ёзги болалар оромгоҳида ҳам болаларнинг ёзги таътилни мазмунли ва мароқли ўтказишлари учун барча шарт-шароитлар яратилган.

 Яқинда ушбу оромгоҳда “Ёз− ўтмоқда соз” деб номланган тадбир ўтказилди.

Тадбирда туман Маҳалла ва нуронийларни қўллаб-қувватлаш бўлими қошидаги “Нуронийлар” жамоатчилик кенгаши раиси ўринбосари Бекмон ота Аллаберганов, 40-сонли умумтаълим мактаби директори Санобар Хўжамуротова, туман Маънавият ва маърифат маркази раҳбари Махсуд Саълуллаевлар шунингдек, 40-сонли мактаб маъмурияти ўқитувчилари, мактабнинг 5-синф ўқувчилари иштирок қилдилар.

Дастлаб, Санобар Хўжамуротова барча болажонларни оромгоҳнинг очилиши билан самимий қутлади. Шундан сўнг, дам олувчиларга 40-сонли мактаб ўқувчиларининг эришган ютуқлари, ўқувчилар учун яратилган қулайликлар, жамоанинг маҳоратли мураббийлари ҳақида ифтихор билан сўзлади. Шунингдек, ўзининг болалик давридаги қийинчиликлари ва бугунги кунда болаларга яратилаётган шарт-шароитлар ва имкониятлар ҳақида тўлқинланиб гапирди.

Тадбир давомида 40-сонли мактабнинг 5-синф ўқувчилари Қундузой Қўшназарова, Жаҳонгир Ўрозимбетов, Асадбек Каримбоевлар спортнинг каратэ йўналиши бўйича эришган ютуқлари ҳақида ўз тенгдошларига гапириб, спорт чиқишлари орқали ўз маҳоратларини намойиш қилдилар.

5-г синф ўқувчиси Хайрулло Ўрозбоев технология дарсида ўзи ясаган автомобилни, 5-б синф ўқувчиси Нуриддин Жумабоев эса ўзи ясаган экскаваторни намойиш қилдилар. Шунингдек, тадбир давомида ўқувчилар томонидан тайёрланган гўзал рақслар дам олувчиларда ўзгача тассурот қолдирди.

Қолаверса, мактабнинг рус тили фани ўқитувчиси Шўҳижаҳон Нуримбетова томонидан тайёрланган топшириқли ўйинни болажонлар мароқ ва катта қизиқиш билан бажардилар. Оромгоҳда дам олувчилар ўз тенгдошлари тайёрлаб келган барча чиқишларни олқишлар билан кутиб олишди.

Тадбирнинг бадиий қисми якунлангач, 32-Қиличбой сайлов округидан сайланган Қорақалпоғистон Республикаси Жўқорғи Кенгеси депутати Санобар Хўжамуротова тадбирда иштирок этаётган маҳалла  аҳлига ўз фаолияти, ижтимоий ҳаётда рўй бераётган ўзгаришлар, қабул қилинаётган қонунлар моҳияти тўғрисида батафсил маълумот берди.

Шунингдек, 84-сонли мактабнинг якка тартибда ўқитилаётган имконияти чекланган ўқувчиларини ҳамда “Китобхон оила” кўрик-танловининг туман ва Қорақалпоғистон Республикаси босқичида ғолибликни қўлга киритган Ўринбоевлар оиласини қимматбаҳо совғалар билан тақдирлади.

Ушбу ёш оилага Республика босқичида ҳам муваффақиятли қатнашиб, ғолиблар сафидан жой олишларига тилакдошлик билдирди.

Тадбир якунида оромгоҳ кутубхонасига ўзбек ва жаҳон адабиётининг дурдона асарлари совға қилиниб, дам олувчиларга музқаймоқлар улашилди.  

Санобар Хўжамуротова.