“Qaldirgʻoch” yozgi bolalar oromgohida “Yoz−oʻtmoqda soz” deb nomlangan tadbir oʻtkazildi

Yurtimizda bolalarning yozgi taʼtil kunlarini mazmunli oʻtkazishlari uchun barcha sharoitlar yaratilmoqda. Jumladan, Amudaryo tumanining Doʻrman ovuli hududida yangidan tashkil etilgan “Qaldirgʻoch” yozgi bolalar oromgohida ham bolalarning yozgi taʼtilni mazmunli va maroqli oʻtkazishlari uchun barcha shart-sharoitlar yaratilgan.

 Yaqinda ushbu oromgohda “Yoz− oʻtmoqda soz” deb nomlangan tadbir oʻtkazildi.

Tadbirda tuman Mahalla va nuroniylarni qoʻllab-quvvatlash boʻlimi qoshidagi “Nuroniylar” jamoatchilik kengashi raisi oʻrinbosari Bekmon ota Allaberganov, 40-sonli umumtaʼlim maktabi direktori Sanobar Xoʻjamurotova, tuman Maʼnaviyat va maʼrifat markazi rahbari Maxsud Saʼlullayevlar shuningdek, 40-sonli maktab maʼmuriyati oʻqituvchilari, maktabning 5-sinf oʻquvchilari ishtirok qildilar.

Dastlab, Sanobar Xoʻjamurotova barcha bolajonlarni oromgohning ochilishi bilan samimiy qutladi. Shundan soʻng, dam oluvchilarga 40-sonli maktab oʻquvchilarining erishgan yutuqlari, oʻquvchilar uchun yaratilgan qulayliklar, jamoaning mahoratli murabbiylari haqida iftixor bilan soʻzladi. Shuningdek, oʻzining bolalik davridagi qiyinchiliklari va bugungi kunda bolalarga yaratilayotgan shart-sharoitlar va imkoniyatlar haqida toʻlqinlanib gapirdi.

Tadbir davomida 40-sonli maktabning 5-sinf oʻquvchilari Qunduzoy Qoʻshnazarova, Jahongir Oʻrozimbetov, Asadbek Karimboyevlar sportning karate yoʻnalishi boʻyicha erishgan yutuqlari haqida oʻz tengdoshlariga gapirib, sport chiqishlari orqali oʻz mahoratlarini namoyish qildilar.

5-g sinf oʻquvchisi Xayrullo Oʻrozboyev texnologiya darsida oʻzi yasagan avtomobilni, 5-b sinf oʻquvchisi Nuriddin Jumaboyev esa oʻzi yasagan ekskavatorni namoyish qildilar. Shuningdek, tadbir davomida oʻquvchilar tomonidan tayyorlangan goʻzal raqslar dam oluvchilarda oʻzgacha tassurot qoldirdi.

Qolaversa, maktabning rus tili fani oʻqituvchisi Shoʻhijahon Nurimbetova tomonidan tayyorlangan topshiriqli oʻyinni bolajonlar maroq va katta qiziqish bilan bajardilar. Oromgohda dam oluvchilar oʻz tengdoshlari tayyorlab kelgan barcha chiqishlarni olqishlar bilan kutib olishdi.

Tadbirning badiiy qismi yakunlangach, 32-Qilichboy saylov okrugidan saylangan Qoraqalpogʻiston Respublikasi Joʻqorgʻi Kengesi deputati Sanobar Xoʻjamurotova tadbirda ishtirok etayotgan mahalla  ahliga oʻz faoliyati, ijtimoiy hayotda roʻy berayotgan oʻzgarishlar, qabul qilinayotgan qonunlar mohiyati toʻgʻrisida batafsil maʼlumot berdi.

Shuningdek, 84-sonli maktabning yakka tartibda oʻqitilayotgan imkoniyati cheklangan oʻquvchilarini hamda “Kitobxon oila” koʻrik-tanlovining tuman va Qoraqalpogʻiston Respublikasi bosqichida gʻoliblikni qoʻlga kiritgan Oʻrinboyevlar oilasini qimmatbaho sovgʻalar bilan taqdirladi.

Ushbu yosh oilaga Respublika bosqichida ham muvaffaqiyatli qatnashib, gʻoliblar safidan joy olishlariga tilakdoshlik bildirdi.

Tadbir yakunida oromgoh kutubxonasiga oʻzbek va jahon adabiyotining durdona asarlari sovgʻa qilinib, dam oluvchilarga muzqaymoqlar ulashildi.  

Sanobar Xoʻjamurotova.