ФАРОВОН МАҲАЛЛАСИ ТАДБИРКОРЛАРИДАН МАҲАЛЛА БОЛАЛАРИ ХУРСАНД БЎЛИШДИ
“Бир мискиннинг кўнглини обод этиш – Каъбани зиёрат қилган билан баробар”, – деган гап бор халқимизда. Ҳақиқатдан ҳам, айрим сабабларга кўра оиласи боқувчисидан айрилган мискин қалблар, ногиронлиги бор, ўзгалар меҳрига муҳтож инсонларга қувонч бағишлаб, уларнинг ҳаётларига озгина бўлса-да нурафшонлик, шодлик бахш этиб яшаш – одамийликнинг энг эзгу фазилатларидан саналади.
Жорий йилнинг ҳар бир кунини инсон қадр-қимматини улуғлаш, ижтимоий ҳимояга муҳтож аҳоли қатламини моддий ва маънавий қўллаб-қувватлашга қаратилган тадбирлар асосида, халқ билан бирга, баҳамжиҳат ўтказишни ният қилиб, ана шу эзгу ният рўёби учун тизимли ишларни амалга ошираётган Амударё туманининг Фаровон маҳалла фуқаролар йиғини масъуллари деярли ҳар куни халқ орасида. Айниқса, турли байрам саналари муносабати билан маҳалла оқсоқоли Мадамин Казаков, ҳоким ёрдамчиси Муқаддас Бекназарова, оила ва хотин-қизлар масалалари бўйича мутахассис Сайёра Қорабоевалар ҳамкорликда ҳар бир кўча ва ҳар битта хонадонга кириб бориб, маҳалла аҳли ҳаётига оид муаммоли масалаларни жойида ўрганиш ва тегишли ташкилотларга ҳавола этишга ҳаракат қилишади.
Фаровонликлар турли байрам саналарини ҳамжиҳатлик ва хурсандлик билан нишонлашга ҳаракат қилишади. Хусусан, 1 июнь – Халқаро болаларни ҳимоя қилиш куни муносабати билан ўтказилган байрам тадбири ҳам маҳалла аҳли учун ҳақиқий хайр-саховат ва меҳр-оқибат байрамига айланиб кетди. Маҳаллада ўтказиладиган бундай тадбирларга кўпинча саховатпеша тадбиркорлар ҳомийлик қилишади.
Маҳаллада истиқомат қилувчи тадбиркорлар Шукуруллоҳ Султонов ва Акмалжон Матқурбоновларнинг беғараз саъй-ҳаракатлари билан ташкиллаштирилган 1 июнь – Халқаро болаларни ҳимоя қилиш кунига бағишланган байрам тадбирида ҳам маҳалла аҳли учун ёрқин таассуротларга бой бўлди. Байрамда Амударё туман Ногиронлар жамияти раиси Нилуфар Холбоева, шунингдек, ижтимоий ҳимояга муҳтож, боқувчисини йўқотган, отаси ёки онасидан бири жазони ижро этиш масканларида жазо муддатини ўтаётган оилаларнинг фарзандлари иштирок этишди.
Тадбирда Фаровон маҳалла фуқаролар йиғини раиси Мадамин Казаков ва Амударё тумани Ногиронлар жамияти раиси Нилуфар Холбоевалар барчани 1 июнь – Халқаро болаларни ҳимоя қилиш куни муносабати билан табрикладилар. Маҳалланинг саховатпеша тадбиркорлари Шукуруллоҳ Султонов ва Акмалжон Матқурбоновлар маҳалладаги кам таъминланган оилаларнинг фарзандлари, шунингдек, ногиронлиги бўлган болалардан 15 нафарига ўзларининг шахсий совғаларини топширишди.
Яхши сўз, эзгу тилаклар ва маънавий рағбатдан кўнгиллари чароғон бўлган болажонлар ва уларнинг ота-оналари, яқинлари учун байрам тадбири янада завқли онларни ҳадя этди. Болажонлар эл-юрт, халқ меҳр-муҳаббатидан баҳра олиб, қалблари янада эзгу туйғуларга тўлди.
Тадбир давомида Фаровон маҳалласи болалари дўстлик, тинчлик, она Ватан ҳақида шеърлар айтишиб, бир-бирларини байрам билан муборакбод этишди. Маҳалла тадбиркорлари томонидан ёзилган файзли дастурхон атрофида ўтказилган байрам тадбири барчага хуш кайфият бағишлади.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
