ЯНГИОБОД МАҲАЛЛАСИДА ХОТИН-ҚИЗЛАР УЧУН САЙЁР ҚАБУЛ ЎТКАЗИЛДИ

Қорақалпоғистон Республикасининг барча ҳудудларида Қорақалпоғистон Республикаси судлари судьялари томонидан “Аёллар дафтарига” киритилган ҳуқуқий ёрдамга муҳтож хотин-қизларга ҳуқуқий ёрдам кўрсатиш юзасидан мўлжалланган чора-тадбирлар режасининг ижросини таъминлаш мақсадида сайёр қабуллар ўтказилмоқда.

Шу йил 10 июнь куни Амударё туманидаги Янгиобод маҳалласида ҳам ушбу чора-тадбирлар ижросини таъминлаш мақсадида сайёр қабул ташкил этилди. Сайёр қабулда Қорақалпоғистон Республикаси суди, Жиноят ишлари бўйича Амударё туман суди масъуллари, фуқаролар йиғинлари раислари, Янгиобод, Фаровон, Бой овул ва Дурунки маҳалла фуқаролар йиғинлари ҳамда Бобур, Жумур овул, Жумуртов ва Куюк кўпир овул фуқаролар йиғинларида “Аёллар дафтари”га киритилган фуқаролар, шу ҳудудларнинг фаол аёллари қатнашишди.

Таъкидланганидек, Амударё туманидаги 49 та маҳалла ва овул фуқаролар йиғинида яшовчи аҳоли сони 204 минг 738 нафарни ташкил қилади. “Аёллар дафтари”га шундан 3810 нафар хотин-қиз рўйхатга киритилган. Рўйхатда турган аёл-қизларга манзилли равишда ҳар томонлама кўмак бериб келинмоқда.

Тадбир давомида суд масъуллари Ўзбекистон Республикаси Вазирлар Маҳкамасининг 2021 йил 8 январдаги “Хотин-қизларни ижтимоий қўллаб-қувватлаш бўйича қўшимча чора-тадбирлар тўғрисида”ги қарори ва ушбу қарор билан тасдиқланган “Аёллар дафтари”ни юритиш бўйича вақтинчалик тартибнинг мазмун-моҳиятини тушунтириб ўтдилар.

Шу билан бирга жамиятда турли қийинчилик ва муаммоларга дуч келаётган хотин-қизларнинг қонун ва қонуности ҳужжатлар талабини тўлиқ билмаслиги, уларга берилган қонуний имтиёзлардан бехабар эканлиги юзага келаётган қийинчиликларнинг асосий сабабларидан бири эканлиги таъкидланиб, амалдаги қонун ҳужжатлари тўғрисида маълумотлар берилди. Билим ва касб ўрганишга эҳтиёжи бор бўлган ишсиз хотин-қизларга “Аёллар дафтари” асосида ишга жойлаштириш ва ижтимоий ёрдам бериш тартиби ҳам тушунтирилди.  

Шунингдек, қабулга келган хотин-қизлар ишга жойлаш, моддий ёрдам, уй-жой, оилавий низолар масалаларида мурожаат қилишди. Мурожаатларнинг ҳар бирига алоҳида эътибор қаратилди ва ўрганиб чиқилди. Ўрганишлар натижаси бўйича ҳуқуқий тушунтиришлар берилди, имкон қадар ва қонун доирасида ҳал қилиш чоралари кўрилди.

Шу куни туман ҳудудидаги фуқаролар йиғинларида ўтказилган сайёр қабулларда 18 нафар хотин-қизларга ҳуқуқий ёрдам кўрсатилди. Мурожаатлар асосан ишга жойлашиш масаласи бўйича, оилавий муносабатлар, яъни алимент, никоҳни бекор қилиш кабилар бўйича, моддий ёрдам олишга доир, уй-жой масалалар юзасидан қабул қилиниб, барчасини ҳал қилиш чоралари кўрилди.

Тадбирда иштирок этган бошқа фуқароларга ҳам қизиқтирган бошқа масалалар юзасидан ҳуқуқий маслаҳатлар, тушунчалар берилди. “Аёллар дафтари” рўйхатида турган хотин-қизларга судьялар томонидан ўтказилган мазкур сайёр қабул, кўрсатилган ҳуқуқий ёрдам ва берилган билимлар уларнинг муаммоларини ҳал этилишида муҳим аҳамият касб этди.

С.Давлетмуродов, Қорақалпоғистон Республикаси суди судьяси.

Э.Жуманиёзов, Жиноят ишлари бўйича Амударё туман суди девонхона мудири.