Оқ олтин овулидаги сув тозалаш иншооти фойдаланишга топширилди

Дунёнинг кўплаб мамлакатларида тоза ичимлик суви тақчиллиги долзарб масала бўлиб турган бир вақтда, мамлакатимизда аҳолини тоза ичимлик суви билан таъминлаш борасида кенг кўламли амалий ишлар қилинмоқда.

Ўзбекистон Республикаси Президентининг “2021-2023 йилларда Ўзбекистон Республикасининг ижтимоий ва ишлаб чиқариш инфратузилмасини ривожлантириш чора-тадбирлари тўғрисида”ги қарорига асосан Амударё туманида ижтимоий ва ишлаб чиқариш инфратузилмасини жадал ривожлантириш, тадбиркорлик субъектларига қулай инвестиция муҳитини яратиш, иқтисодиёт тармоқлари ва ижтимоий соҳани қўллаб-қувватлаш, шунингдек, давлат-хусусий шериклик асосида янги инфратузилма объектларини барпо этиш, шу асосда аҳоли бандлигини таъминлаш ва уларнинг турмуш даражасини янада яхшилаш бўйича кўплаб ижобий ишлар амалга оширилмоқда.

Амударё туманининг Оқ олтин овулида жойлашган сув иншооти ҳамда 7,9 км узунликдаги ичимлик суви тармоқлари реконструкция қилиниб, фойдаланишга топширилгани ҳам бу борадаги амалий қадамлардан бири бўлди.

Яқинда ушбу иншоотнинг фойдаланишга топширилиш маросими бўлиб ўтди.

Тадбирда Ўзбекистон Республикаси Президенти Администрацияси вакили Акбаржон Жонузақов, Қорақалпоғистон Республикаси Вазирлар Кенгаши Раиси ўринбосари Ерназар Аташов, туман ҳокими Султонбой Йўлдашев, секторлар раҳбарлари, ҳоким ўринбосарлари, муассаса ва ташкилотлар раҳбарлари, овул аҳолиси иштирок этишди. Овул нуронийлари аҳолини тоза ичимлик суви билан таъминлаш савоби улуғ амаллардан эканлигини айтиб, масъулларга ўзларининг чуқур миннаддорлигини билдиришди.

Маълумот ўрнида айтиш керакки, Бирлашган миллатлар ташкилотининг ҳисоботига кўра, бугунги кунда сайёрамиздаги 2 миллиард аҳоли тоза ичимлик сувидан бевосита фойдаланиш имконига эга эмас. Мутахассисларнинг таҳлилларига кўра, жаҳонда 2000 йилдан 2050 йилгача бўлган даврда сувга бўлган глобал талаб 55 фоизга ўсади. Айниқса, Ўзбекистоннинг қўшни мамлакатлардан келадиган сув таъминотига боғлиқлиги юқори даражада, яъни истеъмол қилинадиган сувнинг 80 фоизи ташқаридан келади. Шунинг учун ҳам ҳар бир юртдошимиз сувни тежашга алоҳида эътибор қаратишлари лозим.

Оқ олтин овулидаги мазкур сув тозалаш қурилмаси ва сув тармоқларининг реконструкция қилиниши овул ҳудудида истиқомат қилувчи 300 га яқин оиланинг тозаланган сувга бўлган эҳтиёжини қондиришга хизмат қилади.

Маълумот учун, мазкур сув тозалаш иншооти “Темир бетон” масъулияти чекланган жамияти ҳамда “Манғит мега ҳамкор” масъулияти чекланган жамияти ўртасидаги ўзаро шартномалар асосида реконструкция қилинди.

Оқ олтин овулидаги сув тозалаш қурилмаси ва сув тармоқларининг реконструкция қилиниб, фойдаланишга топширилиши овул аҳолиси учун катта туҳфа бўлди.

Туман ҳокимлигининг Ахборот хизмати.