“Обод қишлоқ” дастури доирасида Тўлқин овулида амалга оширилаётган ишлар сифати ўрганилди

Бугунги кунда юртимизда “Обод қишлоқ” ва “Обод маҳалла” дастурлари доирасида амалга оширилаётган ишлар туфайли кўплаб маҳалла ва қишлоқлар гўзал қиёфа касб этмоқда. Дастур доирасида одамларнинг яшаш шароитини яхшилаш, ижтимоий соҳа объектларидан тўлақонли фойдаланишлари учун барча шароитларни яратиш мақсадида кенг кўламли қурилиш ишлари амалга оширилмоқда.

Жумладан, Амударё туманининг Тўлқин овули ва Аёқчи маҳалласи ҳудудлари “Обод қишлоқ” ва “Обод маҳалла” дастурларига киритилган бўлиб, бугунги кунда дастур доирасидаги қурилиш ва ободонлаштириш ишлари жадал суръатлар билан давом этмоқда.

Яқинда туман ҳокими С.Йўлдашев ҳамроҳлигида прокуратура органлари вакиллари − Қорақалпоғистон Республикаси прокурори ўринбосари, Адлия катта маслаҳатчиси Равшан Бауаддинов, туман прокурори Азиз Рўзметов, туман ҳокими ўринбосари Нодирбек Комолов ҳамда буюртмачи ташкилот раҳбарлари “Обод қишлоқ” дастури доирасида олиб борилаётган ишлар билан яқиндан танишиш мақсадида Тўлқин овулида бўлдилар.

Маълумот ўрнида айтиш керакки, дастур доирасида амалга ошириладиган қурилиш ва таъмирлаш ишлари учун жами 10,3 млрд. сўм миқдорда маблағ ажратилган.

Бугунги кунда ушбу маблағларнинг бир қисмига Тўлқин овули ҳудудидаги 24-сонли мактабгача таълим ташкилоти биноси мукаммал таъмирланмоқда. Шунингдек, 10,5 кмли ички йўлларга тош-шағал, ва асфальт қопламасини ётқизиш ишлари бажарилмоқда.

 Ундан ташқари, Тўлқин овули ҳудудида 2 млрд.сўм маблағ эвазига 4 та сув иншооти ҳамда 1 млрд. 550 млн.сўм эвазига 7 та бозор инфратузилма объектлари қурилмоқда.

Овул ҳудудида истеъмолчиларнинг табиий газ ва электр энергияси билан таъминланиш сифатини янада яхшилаш масалаларига ҳам алоҳида аҳамият берилиб, 7,6 млн.сўм эвазига 4,4 км узунликдаги газ қувурлари ва 19 та газ тақсимлаш пунктлари тамъирланмоқда.

Қолаверса, овул ҳудудига янгидан кўчиб келган ёш оилаларнинг электр энергиясига бўлган эҳтиёжини таъминлаш мақсадида 3,3 км узунликдаги электр линияларини тортиш, 3 та янги трансформатор ўрнатиш ишлари олиб борилмоқда. Ундан ташқари, 2 км пиёдалар йўлакчасини қуриш, 80 та тунги ёритгич чироқларини ўрнатиш ишлари жадал суратларда давом этмоқда.

Бугуни кунда, 4 та янги турдаги чиқинди контейнерларини ўрнатиш, 60 та якка тартибдаги уй-жойларни таъмирлаш, 4 км алоқа линияларини тортиш ишларини ижрочиларни танлаб олиш мақсадида тендер савдоларига чиқариш чоралари кўрилмоқда.

Бугун юртимизда, хусусан, туманимизда амалга оширилаётган ислоҳотлардан кўзланган асосий мақсад − аҳолининг фаровон турмуш кечириши учун муносиб шароит яратишдан иборатдир. Зеро, давлатимиз раҳбари таъбири билан айтганда, одамлар юртимизда кечаётган ислоҳотларни яқин келажакда эмас, бугун, реал ҳаётида ҳис этиб яшашлари даркор.

Туман ҳокимлигининг Ахборот хизмати.