Иқтидорли аёл-қизлар билан учрашув ташкил этилди

Дунёда давлат ва жамиятнинг нуфузи, онгу тафаккури, маданий даражасини кўрсатадиган мезонлар кўп. Лекин, ҳар қайси миллат ва халқнинг маънавий камолотини белгиловчи, таълим-тарбиясини такомиллаштирувчи бу — аёлдир.

Бугун хотин-қизларимизнинг қадами тегмаган жой, улар эгалламаган соҳа қолмади ҳисоб. Улар ўқитувчилик, хусусий тадбиркорлик, фермерлик, ҳарбийлик, умуман, ижтимоий соҳадан тортиб, иқтисодиёт, саноат, давлат ва жамият қурилиши соҳасида фаоллик кўрсатмоқдалар.

Яқинда Амударё туманининг Бойовул маҳалласи ҳудудида жойлашган 9-сонли Болалар мусиқа ва санъат мактаби биносида адабиёт, фан, таълим, ҳунармандчилик соҳаларида самарали меҳнат қилиб келаётган иқтидорли ва фаол аёл-қизлар билан учрашув бўлиб ўтди.

Учрашувда туман ҳокими ўринбосари, Оила ва хотин-қизлар бўлими бошлиғи Гўзал Собурова, Ўзбекистонда хизмат кўрсатган маданият ходими, “Дўстлик” ордени соҳиби, Ўзбекистон Республикаси ёзувчилар уюшмаси Хоразм вилояти бўлими раҳбари Гавҳаржон Ибодуллаева, “Зулфия номидаги давлат мукофоти” соҳибаси, Оила ва хотин-қизлар давлат қўмитаси бош мутахассиси Гулжамол Асқарова, “Зулфия номидаги давлат мукофоти” соҳибаси Феруза Хайруллаева, шоира Садоқат Каримова, журналист Махфира Каримова ҳамда туманнинг иқтидорли аёл-қизлари иштирок этишди.

Учрашув расмиятчиликдан ҳоли очиқ ва самимий руҳда бўлиб ўтди. Учрашув давомида меҳмонлар туманнинг иқтидорли шоира қизлари томонидан битилган гўзал шерларни тинглаб, шоираларнинг ижод намуналарига ўз муносабатларини билдирдилар.

Ёш шоиралар, мақомчи қизлар устозлари томонидан билдирилган илиқ фикрлардан мамнун бўлиб, ижод намуналарини янада ривожлантирш борасида берилган таклифларни эътиборга олиб, ўз миннатдорлигини билдириб ўтишди.

Шундан сўнг, меҳмонлар туман ҳокими ўринбосари Гўзал Собурова ҳамроҳлигида Янгиобод маҳалласининг Ҳамид Олимжон кўчасида истиқомат қилувчи Адилбой Шерниязов ҳамда Гулсара Норимоваларнинг хонадонларида бўлишди.

 Хонадон эгалари меҳмонларни илиқ кутиб олишди. 5 нафар фарзандни тарбиялаб вояга етказган, уларни турли касбларда ўқитиб, уйли-жойли қилган Гулсара опа бугун кексалик гаштини сурмоқда.

Ушбу оила ҳамиша ўзларининг бой ҳаётий тажрибаси ҳамда аҳил-иноқлиги билан маҳалласидаги ёш оилаларга ўрнак бўлиб келади.

Меҳмонлар шундай ибратли оилалардан яна бири − 7 нафар фарзандни тарбиялаб вояга етказган Гулниҳол Жумабоеванинг ҳам хонадонида бўлишди.

Хонадон эгалари мамлакатимизда аёл-қизларга кўрсатилаётган эътибор, яратилаётган шарт-шароитлар ҳақида ўзларининг самимий ва илиқ фикрлари билан ўртоқлашдилар.

 Шундан сўнг, меҳмонлар маҳалланинг фаол аёлларидан бири, ёш оилаларга ўзининг ҳаётий сабоқлари, ўгит ва насиҳатлари билан ибрат бўлиб келаётган Норгул Ўрозбаеванинг хонадонига ташриф буюрдилар. Меҳмонлар онахондан 5 нафар фарзандни тарбиялаб вояга етказишда, келинлар билан муносабатда нималарга эътибор бергани тўғрисида ҳаётий сабоқларини тингладилар.

Шу ўринда айтиш керакки, жамиятимизда хотин-қизларга бўлган муносабат, ҳурмат-эҳтиромни давлатнинг уларга бўладиган муносабатидан яққол кўриш мумкин. Шу нуқтаи назардан қаралса, аёлларни улуғлаб, ардоқлаб, бошига кўтариб яшайдиган халқ ўзининг юксак маданияти ва олижаноб қадриятларини амалда намоён қиладиган миллат сифатида ҳурмат қозонади.

Муҳтарам Президентимиз таъбири билан айтганда, аёл-қизларнинг барча соҳадаги самарали меҳнатини, фарзандлар тарбияси, оила ҳаётидаги улкан хизматларини Ўзбекистонимиз эришаётган ютуқлардаги беқиёс ҳиссасини ҳеч нарса билан ўлчаб, баҳолаб бўлмайди.

Аёлнинг жамиятимизда тутган ўрни — бебаҳо! Зеро, Аёлга муносабатда миллат, эртанги кун ва келажак авлодга бўлган ҳурмат яққол намоён бўлади.

Туман ҳокимлигининг Ахборот хизмати