Iqtidorli ayol-qizlar bilan uchrashuv tashkil etildi

Dunyoda davlat va jamiyatning nufuzi, ongu tafakkuri, madaniy darajasini koʻrsatadigan mezonlar koʻp. Lekin, har qaysi millat va xalqning maʼnaviy kamolotini belgilovchi, taʼlim-tarbiyasini takomillashtiruvchi bu — ayoldir.

Bugun xotin-qizlarimizning qadami tegmagan joy, ular egallamagan soha qolmadi hisob. Ular oʻqituvchilik, xususiy tadbirkorlik, fermerlik, harbiylik, umuman, ijtimoiy sohadan tortib, iqtisodiyot, sanoat, davlat va jamiyat qurilishi sohasida faollik koʻrsatmoqdalar.

Yaqinda Amudaryo tumanining Boyovul mahallasi hududida joylashgan 9-sonli Bolalar musiqa va sanʼat maktabi binosida adabiyot, fan, taʼlim, hunarmandchilik sohalarida samarali mehnat qilib kelayotgan iqtidorli va faol ayol-qizlar bilan uchrashuv boʻlib oʻtdi.

Uchrashuvda tuman hokimi oʻrinbosari, Oila va xotin-qizlar boʻlimi boshligʻi Goʻzal Soburova, Oʻzbekistonda xizmat koʻrsatgan madaniyat xodimi, “Doʻstlik” ordeni sohibi, Oʻzbekiston Respublikasi yozuvchilar uyushmasi Xorazm viloyati boʻlimi rahbari Gavharjon Ibodullayeva, “Zulfiya nomidagi davlat mukofoti” sohibasi, Oila va xotin-qizlar davlat qoʻmitasi bosh mutaxassisi Guljamol Asqarova, “Zulfiya nomidagi davlat mukofoti” sohibasi Feruza Xayrullayeva, shoira Sadoqat Karimova, jurnalist Maxfira Karimova hamda tumanning iqtidorli ayol-qizlari ishtirok etishdi.

Uchrashuv rasmiyatchilikdan holi ochiq va samimiy ruhda boʻlib oʻtdi. Uchrashuv davomida mehmonlar tumanning iqtidorli shoira qizlari tomonidan bitilgan goʻzal sherlarni tinglab, shoiralarning ijod namunalariga oʻz munosabatlarini bildirdilar.

Yosh shoiralar, maqomchi qizlar ustozlari tomonidan bildirilgan iliq fikrlardan mamnun boʻlib, ijod namunalarini yanada rivojlantirsh borasida berilgan takliflarni eʼtiborga olib, oʻz minnatdorligini bildirib oʻtishdi.

Shundan soʻng, mehmonlar tuman hokimi oʻrinbosari Goʻzal Soburova hamrohligida Yangiobod mahallasining Hamid Olimjon koʻchasida istiqomat qiluvchi Adilboy Sherniyazov hamda Gulsara Norimovalarning xonadonlarida boʻlishdi.

 Xonadon egalari mehmonlarni iliq kutib olishdi. 5 nafar farzandni tarbiyalab voyaga yetkazgan, ularni turli kasblarda oʻqitib, uyli-joyli qilgan Gulsara opa bugun keksalik gashtini surmoqda.

Ushbu oila hamisha oʻzlarining boy hayotiy tajribasi hamda ahil-inoqligi bilan mahallasidagi yosh oilalarga oʻrnak boʻlib keladi.

Mehmonlar shunday ibratli oilalardan yana biri − 7 nafar farzandni tarbiyalab voyaga yetkazgan Gulnihol Jumaboyevaning ham xonadonida boʻlishdi.

Xonadon egalari mamlakatimizda ayol-qizlarga koʻrsatilayotgan eʼtibor, yaratilayotgan shart-sharoitlar haqida oʻzlarining samimiy va iliq fikrlari bilan oʻrtoqlashdilar.

 Shundan soʻng, mehmonlar mahallaning faol ayollaridan biri, yosh oilalarga oʻzining hayotiy saboqlari, oʻgit va nasihatlari bilan ibrat boʻlib kelayotgan Norgul Oʻrozbayevaning xonadoniga tashrif buyurdilar. Mehmonlar onaxondan 5 nafar farzandni tarbiyalab voyaga yetkazishda, kelinlar bilan munosabatda nimalarga eʼtibor bergani toʻgʻrisida hayotiy saboqlarini tingladilar.

Shu oʻrinda aytish kerakki, jamiyatimizda xotin-qizlarga boʻlgan munosabat, hurmat-ehtiromni davlatning ularga boʻladigan munosabatidan yaqqol koʻrish mumkin. Shu nuqtai nazardan qaralsa, ayollarni ulugʻlab, ardoqlab, boshiga koʻtarib yashaydigan xalq oʻzining yuksak madaniyati va olijanob qadriyatlarini amalda namoyon qiladigan millat sifatida hurmat qozonadi.

Muhtaram Prezidentimiz taʼbiri bilan aytganda, ayol-qizlarning barcha sohadagi samarali mehnatini, farzandlar tarbiyasi, oila hayotidagi ulkan xizmatlarini Oʻzbekistonimiz erishayotgan yutuqlardagi beqiyos hissasini hech narsa bilan oʻlchab, baholab boʻlmaydi.

Ayolning jamiyatimizda tutgan oʻrni — bebaho! Zero, Ayolga munosabatda millat, ertangi kun va kelajak avlodga boʻlgan hurmat yaqqol namoyon boʻladi.

Tuman hokimligining Axborot xizmati