Elektr tarmoqlari filialida korruptsiyaga qarshi kurashish masalalari muhokama etildi

Jamiyatda qonun ustuvorligini taʼminlash, davlat va xoʻjalik boshqaruvi organlari faoliyatida shaffoflikka erishish, xodimlarning huquqiy ongi va madaniyatini yuksaltirish mamlakatimizda amalga oshirilayotgan islohotlarning uzviy yoʻnalishlaridan biri hisoblanadi. Ayniqsa, aholiga bevosita xizmat koʻrsatuvchi tizimlarda bu boradagi ishlar doimiy eʼtibor markazida turibdi. Zero, har bir sohada qonunchilik talablariga ogʻishmay amal qilinishi jamiyat taraqqiyotining muhim shartlaridan sanaladi.

Elektr energetikasi tarmogʻi aholi va tadbirkorlik subʼektlari bilan kundalik muloqotda boʻladigan soha ekani inobatga olinsa, ushbu tizim xodimlarining halolligi, intizomi va kasbiy odobi nafaqat korxona obroʻsiga, balki isteʼmolchilarning davlat siyosatiga boʻlgan ishonchiga ham bevosita taʼsir koʻrsatishi tabiiy. Shu bois tizimda xodimlar bilan profilaktik ishlarni muntazam tashkil etish, ularning huquqiy bilimini oshirishga qaratilgan uchrashuvlar oʻtkazish muhim ahamiyat kasb etadi.

Shu maqsadda Amudaryo tumani hokimligi binosida “Hududiy elektr tarmoqlari” aktsiyadorlik jamiyatining Qoraqalpogʻiston hududiy filiali xodimlari ishtirokida yigʻilish boʻlib oʻtdi. Unda korruptsiyaga qarshi murosasiz kurashish, odob-axloq va ichki mehnat tartibi qoidalariga rioya etish masalalari koʻrib chiqildi.

Yigʻilish kun tartibiga, shuningdek, xodimlarning noqonuniy xatti-harakatlari yuzasidan kelib tushgan murojaatlarni oʻrganish hamda 2026-yilda sodir etilgan korruptsiyaviy huquqbuzarliklar tahlili kiritilib, har bir masala boʻyicha atroflicha fikr almashildi.

Tadbir “Hududiy elektr tarmoqlari” aktsiyadorlik jamiyatining Qoraqalpogʻiston hududiy filiali Korruptsiyaga qarshi kurashish va komplayens nazorat boʻlimi boshligʻi raisligida oʻtkazildi. Yigʻilish avvalida Oʻzbekiston Respublikasi Prezidenti tomonidan 2026-yilda korruptsiyaga qarshi kurashish boʻyicha “favqulodda holat” eʼlon qilingani alohida qayd etildi.

Raislik qiluvchi filialda korruptsiyaning oldini olish, unga nisbatan murosasiz munosabatda boʻlish hamda xodimlarning huquqiy saviyasini oshirish boʻyicha qator chora-tadbirlar olib borilayotganiga qaramasdan, jamoa orasida huquqbuzarlik holatlari hamon uchrab kelayotganiga yigʻilganlar eʼtiborini qaratdi. Uning taʼkidlashicha, bu kabi holatlarning takrorlanishi tizimda olib borilayotgan ishlarning samarasini pasaytirmoqda.

Shu bilan birga, masʼullar jamiyat hamda tizim tarkibidagi korxonalar xodimlari tomonidan sodir etilgan jinoyatlar ustida toʻxtalib, oʻtkazilayotgan tadbirlardan tegishli xulosa chiqarilmagan taqdirda, bunday holatlar ogʻir oqibatlarga olib kelishi mumkinligi boʻyicha ishtirokchilarni yana bir bor ogohlantirdi. Ushbu masalada har bir xodim shaxsan javobgar ekani alohida uqtirildi.

Yigʻilishda Xalq deputatlari Amudaryo tumani kengashining korruptsiyaga qarshi kurashish va xavfsizlik masalalari boʻyicha doimiy komissiyasi raisi Yaxshimurod Ahmedov ham soʻzga chiqdi. U profilaktik choralar koʻrilayotganiga qaramasdan, ayrim xodimlarning xatolaridan saboq chiqarmasligi yuqoridagi kabi holatlarga sabab boʻlayotganini alohida koʻrsatib oʻtdi.

Majlis yakunida “Hududiy elektr tarmoqlari” aktsiyadorlik jamiyatining Qoraqalpogʻiston hududiy filiali Amudaryo tumani elektr taʼminoti korxonasi boshligʻi Jasur Salayev barcha xodimlarning huquqiy ongi va huquqiy madaniyatini yuksaltirish, jamoada korruptsiyaga nisbatan murosasiz munosabatni shakllantirish borasida amalga oshirilayotgan ishlar, toʻgʻri va halol ishlashning ahamiyati haqida toʻxtalib oʻtdi.

Belgilangan kun tartibidagi barcha masalalar yuzasidan bildirilgan fikr-mulohazalar eshitilib, ular atroflicha muhokama qilingan holda, yigʻilish yakunida tegishli qaror qabul qilindi.