76-СОНЛИ МАКТАБ АСОСИЙ БИНОСИ РЕКОНСТРУКЦИЯ ҚИЛИНИБ, 360 ЎРИНЛИ ҚЎШИМЧА БИНО ҚУРИЛМОҚДА
Мамлакатимиз янги даврга қадам қўяётган, янгиланишлар шиддат билан кечаётган ҳозирги даврда мактаб таълимини ривожлантириш энг устувор вазифалар қаторида турибди. Чунки ҳар қандай давлат келажаги билимли, фидойи инсонларга боғлиқ. Мактабларнинг инсон шахси камолотидаги ўрни беқиёсдир. Ўзбекистоннинг 2022-2026 йилларга мўлжалланган тараққиёт стратегиясида тўртинчи устувор йўналиш айнан таълим соҳасини ривожлантиришга қаратилган.
Кейинги йилларда янги массивлар қурилиши, қишлоқ инфратузилмаси кенгайиши ва аҳоли сони ўсиши мавжуд мактабларнинг айримларида қўшимча ўқув бинолари қурилиши заруратини юзага келтирди.
Амударё туманининг Тошёп овулида, Манғит шаҳри билан чегарадош ҳудудда, айланма йўл бўйида жойлашган 76-сонли мактабда ҳам шундай зарурат юзага келган эди. Мазкур мактабда шу пайтга қадар 22 та синфда 216 нафар ўқувчи таълим-тарбия олаётган эди. Ҳудудда янги аҳоли массивлари қурилаётгани, ўқувчилар сони тобора кўпайиб бораётгани инобатга олиниб, мактабни реконструкция қилиш ва қўшимча 380 ўқувчи ўрнига мўлжалланган янги бино қурилиши бошлаб юборилди.
Бу ишларни амалга ошириш учун 4 миллиард 327 млн. сўм маблағ ажратилган. Қурилиш ишлари Саидакбар Саидаҳмедов раҳбарлигидаги “Темир бетон” масъулияти чекланган жамияти ишчилари томонидан амалга оширилмоқда.
Қурилиш ишлари 108 кун ичида якунланиши режа қилинган. Ҳозирги кунда асосий бинонинг томини шиферлаш, ички ва ташқи пардозлаш ишлари билан бир қаторда қўшимча янги бино қуриш ишлари жадал суръатларда олиб борилмоқда.
Ишчи-қурувчиларга ишлаш учун муносиб шароитлар яратилган бўлиб, икки маҳал иссиқ овқат, чой билан таъминланган. Уларнинг унумли меҳнатлари туфайли асосий бинодан ташқари қўшимча бинонинг биринчи қаватида ғишт териш ишлари сифатли тарзда, белгиланган жадвал асосида олиб борилмоқда. Бинонинг ғишт териб бўлинган қисмларига эса бетон плиталар ётқизилмоқда.
Шу кунгача амалга оширилиши режалаштирилган асосий бинодаги реконструкция ва қўшимча бино қурилиши ишларининг эллик фоизи адо этилди ва қурувчилар ишларни жадал суръатларда давом эттиришмоқда.
Қисқа қилиб айтганда, чор-атрофи анвойи гуллар, мевали, манзарали дарахтлар билан безанган 76-сонли мактаб ҳудудида улкан бунёдкорлик ишлари амалга оширилмоқда.
Мактаб ўқувчилари янги 2022-2023 ўқув йилини реконструкция қилиниб, ўқиш учун қулай шароитлар яратилган синфхоналарда бошлашади. Қўшимча бино қурилиши натижасида мактабда 12 та янги синфхона пайдо бўлади. Бу ерда таълим олаётган Манғит шаҳрининг Олмазор маҳалласи ҳамда Тошёп овули, Босув маҳалласи ҳудудларида яшовчи ўқувчи ёшлар яратилган имкониятлардан унумли фойдаланиб, пухта таълим олишга интиладилар, деган ният билан мактаб жамоасининг келуси ўқув йилидаги ишларига муваффақиятлар тилаймиз.
Ойгул РАЖАБОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
