76-SONLI MAKTAB ASOSIY BINOSI REKONSTRUKTsIYa QILINIB, 360-OʻRINLI QOʻShIMChA BINO QURILMOQDA

Mamlakatimiz yangi davrga qadam qoʻyayotgan, yangilanishlar shiddat bilan kechayotgan hozirgi davrda maktab taʼlimini rivojlantirish eng ustuvor vazifalar qatorida turibdi. Chunki har qanday davlat kelajagi bilimli, fidoyi insonlarga bogʻliq. Maktablarning inson shaxsi kamolotidagi oʻrni beqiyosdir. Oʻzbekistonning 2022-2026-yillarga moʻljallangan taraqqiyot strategiyasida toʻrtinchi ustuvor yoʻnalish aynan taʼlim sohasini rivojlantirishga qaratilgan.

Keyingi yillarda yangi massivlar qurilishi, qishloq infratuzilmasi kengayishi va aholi soni oʻsishi mavjud maktablarning ayrimlarida qoʻshimcha oʻquv binolari qurilishi zaruratini yuzaga keltirdi.

Amudaryo tumanining Toshyop ovulida, Mangʻit shahri bilan chegaradosh hududda, aylanma yoʻl boʻyida joylashgan 76-sonli maktabda ham shunday zarurat yuzaga kelgan edi. Mazkur maktabda shu paytga qadar 22 ta sinfda 216 nafar oʻquvchi taʼlim-tarbiya olayotgan edi. Hududda yangi aholi massivlari qurilayotgani, oʻquvchilar soni tobora koʻpayib borayotgani inobatga olinib, maktabni rekonstruktsiya qilish va qoʻshimcha 380 oʻquvchi oʻrniga moʻljallangan yangi bino qurilishi boshlab yuborildi.

Bu ishlarni amalga oshirish uchun 4 milliard 327 mln. soʻm mablagʻ ajratilgan. Qurilish ishlari Saidakbar Saidahmedov rahbarligidagi “Temir beton” masʼuliyati cheklangan jamiyati ishchilari tomonidan amalga oshirilmoqda.

Qurilish ishlari 108 kun ichida yakunlanishi reja qilingan. Hozirgi kunda asosiy binoning tomini shiferlash, ichki va tashqi pardozlash ishlari bilan bir qatorda qoʻshimcha yangi bino qurish ishlari jadal surʼatlarda olib borilmoqda.

Ishchi-quruvchilarga ishlash uchun munosib sharoitlar yaratilgan boʻlib, ikki mahal issiq ovqat, choy bilan taʼminlangan. Ularning unumli mehnatlari tufayli asosiy binodan tashqari qoʻshimcha binoning birinchi qavatida gʻisht terish ishlari sifatli tarzda, belgilangan jadval asosida olib borilmoqda. Binoning gʻisht terib boʻlingan qismlariga esa beton plitalar yotqizilmoqda.

Shu kungacha amalga oshirilishi rejalashtirilgan asosiy binodagi rekonstruktsiya va qoʻshimcha bino qurilishi ishlarining ellik foizi ado etildi va quruvchilar ishlarni jadal surʼatlarda davom ettirishmoqda.

Qisqa qilib aytganda, chor-atrofi anvoyi gullar, mevali, manzarali daraxtlar bilan bezangan 76-sonli maktab hududida ulkan bunyodkorlik ishlari amalga oshirilmoqda.

Maktab oʻquvchilari yangi 2022-2023 oʻquv yilini rekonstruktsiya qilinib, oʻqish uchun qulay sharoitlar yaratilgan sinfxonalarda boshlashadi. Qoʻshimcha bino qurilishi natijasida maktabda 12 ta yangi sinfxona paydo boʻladi. Bu yerda taʼlim olayotgan Mangʻit shahrining Olmazor mahallasi hamda Toshyop ovuli, Bosuv mahallasi hududlarida yashovchi oʻquvchi yoshlar yaratilgan imkoniyatlardan unumli foydalanib, puxta taʼlim olishga intiladilar, degan niyat bilan maktab jamoasining kelusi oʻquv yilidagi ishlariga muvaffaqiyatlar tilaymiz.

Oygul RAJABOVA.