“Аёллар дафтари”га киритилган аёлларнинг уйлари таъмирлаб берилмоқда

Айни кунларда бутун Республикамиз бўйлаб “Аёллар дафтари”га киритилган аёл-қизлар билан ишлаш тизимининг 3-босқичи давом этмоқда. 30 ёшдан ошган хотин-қизларни хонадонма-хонадон юриш орқали қайта рўйхатдан ўтказиш ишлари жорий йил 10 февраль кунида ниҳоясига етказилган эди. Ушбу босқичда аёл-қизларнинг муаммолари қайтадан ўрганилди. Ижтимоий ҳимояга муҳтож бўлган биронта ҳам хотин-қиз эътибордан четда қолиб кетмаслигига алоҳида эътибор берилди.

 Бугунги кунда Амударё туманида кам таъминланган ва эҳтиёжманд хотин-қизларнинг муаммоларини “маҳаллабай” ўрганиш ва ҳал этиш ҳамда уларни ижтимоий-иқтисодий, ҳуқуқий қўллаб-қувватлаш борасида кўплаб ижобий ишлар амалга оширилмоқда.

Жумладан, “Аёллар дафтари”га киритилган уй-жойга муҳтож, боқувчисини йўқотган аёлларга арзон-уй жойлар узоқ муддатга имтиёзли кредит эвазига берилмоқда. Шунингдек, уйи таъмирталаб аҳволга келиб қолган, кам таъминланган, ногиронлиги бўлган аёлларнинг уйлари таъмирлаб берилмоқда.

Яқинда тумандаги 2-сектор раҳбари − туман прокурори Азиз Рўзметов сектор ҳудудидаги маҳаллаларда яшовчи “Аёллар дафтари”га киритилган аёллар ҳолидан хабар олиб, уй-жойларнинг таъмирланиш жараёнларини кўздан кечирди.

Жумладан, туман прокурори Фаровон, Беш овул, Аёқчи ва Дўстлик маҳаллалари, Қиличбой ва Ўрта қалъа овулларида истиқомат қилувчи аёлларнинг уйларини таъмирлаш ишлари жадал олиб борилаётганининг гувоҳи бўлди.

Маълумот учун айтиб ўтиш керакки, 3-босқич “Аёллар дафтари”га бандлиги таъминланмаган, аммо ишлаш истагида бўлган, даромад манбаига эга бўлмаган, тадбиркорлик қилиш истагида бўлган, боқувчиси вафот этган ёки жазони ижро этиш муассасаларида сақланаётган, руҳий касалликка чалинган, I ва II гуруҳ ногиронлиги бўлган, шунингдек, боқувчиси бедарак йўқолган ҳамда никоҳи бекор қилинган ёлғиз аёллар, шунингдек, меҳнатга лаёқатсиз, ўзгалар парваришига, уй-жойга муҳтож, нотурар жойларда истиқомат қилаётган ва қарамоғида ногиронлиги бўлган фарзандини тарбиялаётган эҳтиёжманд хотин-қизлар киритилган.

Қолаверса, “Аёллар дафтари”га киритилган аёлларнинг муаммоларини ҳал этиш мақсадида туман Оила ва хотин-қизлар бўлими қошида турли соҳа вакилларидан иборат штаб ташкил қилинган.

Штаб аъзолари ўзларига бириктирлган маҳалларда бўлиб, хотин-қизларнинг муаммоларини ҳал қилишда фаоллик кўрсатмоқдалар. Ундан ташқари, маҳаллаларда янгидан иш бошлаган хотин-қизлар фаоли сектор раҳбарлари, ҳоким ёрдамчиси, ёшлар етакчиси билан яқиндан ҳамкорликни йўлга қўйиб, маҳалладаги аёл-қизларнинг муаммоларини ижобий ҳал этишда тизимли ишларни амалга оширмоқда.

Аёл – жамият устуни. Унинг жамиятдаги мавқеъини мустаҳкамлаш, қобилиятини рўёбга чиқариш, тадбиркорлик ғояларини қўллаб-қувватлаш бугунги куннинг долзарб вазифаси ҳисобланади. “Аёллар дафтари”да турган эҳтиёжманд аёл-қизларнинг уй-жойларини таъмирлаш борасида амалга оширилаётган хайрли ишлардан ҳам аёлни рози қилишдек эзгу мақсад кўзланган. Зеро, аёл ўтаётган ҳар бир кунидан рози бўлиб, эртанги кунига ишонч билан яшаса, соғлом ва баркамол авлодни дунёга келтиради. Соғлом ва баркамол, маънан етук авлодлар эса жонажон Ўзбекистонимизнинг келажагидир.

Туман ҳокимлигининг ахборот хизмати