“Ayollar daftari”ga kiritilgan ayollarning uylari taʼmirlab berilmoqda

Ayni kunlarda butun Respublikamiz boʻylab “Ayollar daftari”ga kiritilgan ayol-qizlar bilan ishlash tizimining 3-bosqichi davom etmoqda. 30 yoshdan oshgan xotin-qizlarni xonadonma-xonadon yurish orqali qayta roʻyxatdan oʻtkazish ishlari joriy yil 10-fevral kunida nihoyasiga yetkazilgan edi. Ushbu bosqichda ayol-qizlarning muammolari qaytadan oʻrganildi. Ijtimoiy himoyaga muhtoj boʻlgan bironta ham xotin-qiz eʼtibordan chetda qolib ketmasligiga alohida eʼtibor berildi.

 Bugungi kunda Amudaryo tumanida kam taʼminlangan va ehtiyojmand xotin-qizlarning muammolarini “mahallabay” oʻrganish va hal etish hamda ularni ijtimoiy-iqtisodiy, huquqiy qoʻllab-quvvatlash borasida koʻplab ijobiy ishlar amalga oshirilmoqda.

Jumladan, “Ayollar daftari”ga kiritilgan uy-joyga muhtoj, boquvchisini yoʻqotgan ayollarga arzon-uy joylar uzoq muddatga imtiyozli kredit evaziga berilmoqda. Shuningdek, uyi taʼmirtalab ahvolga kelib qolgan, kam taʼminlangan, nogironligi boʻlgan ayollarning uylari taʼmirlab berilmoqda.

Yaqinda tumandagi 2-sektor rahbari − tuman prokurori Aziz Roʻzmetov sektor hududidagi mahallalarda yashovchi “Ayollar daftari”ga kiritilgan ayollar holidan xabar olib, uy-joylarning taʼmirlanish jarayonlarini koʻzdan kechirdi.

Jumladan, tuman prokurori Farovon, Besh ovul, Ayoqchi va Doʻstlik mahallalari, Qilichboy va Oʻrta qalʼa ovullarida istiqomat qiluvchi ayollarning uylarini taʼmirlash ishlari jadal olib borilayotganining guvohi boʻldi.

Maʼlumot uchun aytib oʻtish kerakki, 3-bosqich “Ayollar daftari”ga bandligi taʼminlanmagan, ammo ishlash istagida boʻlgan, daromad manbaiga ega boʻlmagan, tadbirkorlik qilish istagida boʻlgan, boquvchisi vafot etgan yoki jazoni ijro etish muassasalarida saqlanayotgan, ruhiy kasallikka chalingan, I va II guruh nogironligi boʻlgan, shuningdek, boquvchisi bedarak yoʻqolgan hamda nikohi bekor qilingan yolgʻiz ayollar, shuningdek, mehnatga layoqatsiz, oʻzgalar parvarishiga, uy-joyga muhtoj, noturar joylarda istiqomat qilayotgan va qaramogʻida nogironligi boʻlgan farzandini tarbiyalayotgan ehtiyojmand xotin-qizlar kiritilgan.

Qolaversa, “Ayollar daftari”ga kiritilgan ayollarning muammolarini hal etish maqsadida tuman Oila va xotin-qizlar boʻlimi qoshida turli soha vakillaridan iborat shtab tashkil qilingan.

Shtab aʼzolari oʻzlariga biriktirlgan mahallarda boʻlib, xotin-qizlarning muammolarini hal qilishda faollik koʻrsatmoqdalar. Undan tashqari, mahallalarda yangidan ish boshlagan xotin-qizlar faoli sektor rahbarlari, hokim yordamchisi, yoshlar yetakchisi bilan yaqindan hamkorlikni yoʻlga qoʻyib, mahalladagi ayol-qizlarning muammolarini ijobiy hal etishda tizimli ishlarni amalga oshirmoqda.

Ayol – jamiyat ustuni. Uning jamiyatdagi mavqeʼini mustahkamlash, qobiliyatini roʻyobga chiqarish, tadbirkorlik gʻoyalarini qoʻllab-quvvatlash bugungi kunning dolzarb vazifasi hisoblanadi. “Ayollar daftari”da turgan ehtiyojmand ayol-qizlarning uy-joylarini taʼmirlash borasida amalga oshirilayotgan xayrli ishlardan ham ayolni rozi qilishdek ezgu maqsad koʻzlangan. Zero, ayol oʻtayotgan har bir kunidan rozi boʻlib, ertangi kuniga ishonch bilan yashasa, sogʻlom va barkamol avlodni dunyoga keltiradi. Sogʻlom va barkamol, maʼnan yetuk avlodlar esa jonajon Oʻzbekistonimizning kelajagidir.

Tuman hokimligining axborot xizmati