Қорақалпоғистонда хизмат кўрсатган саноат ходими Бахрам Жуманиязов II даражали “Меҳнат фахрийси” кўкрак нишони билан тақдирланди

Обод ва файзли маҳалла – юрт кўрки. Маҳаллалар равнақи мамлакатимиз тараққиёти, ёруғ келажагимизнинг мустаҳкам кафолати, пойдеворидир.

Шу маънода Маҳалла ва нуронийларни қўллаб-қувватлаш вазирлигининг ташкил этилиши ва ушбу вазирлик томонидан маҳалла инситутини янада ривожлантириш, кекса авлод вакилларини қўллаб-қувватлаш, уларга алоҳида ҳурмат ва эътибор кўрсатиш борасида кўплаб ижобий ишлар амалга оширилаётгани айни ҳақиқатдир.

Амударё туманида ҳам кексаларга бўлган эътибор масъул ташкилотларнинг доимо диққат марказида бўлиб келган.

11 август куни Қорақалпоғистон Республикаси Маҳалла ва нуронийларни қўллаб-қувватлаш вазири ўринбосари Турсунбой Абдужабборов, туман Маҳалла ва нуронийларни қўллаб-қувватлаш бўлими бошлиғи маслаҳатчиси, “Маҳалла” хайрия жамоат фонди туман бўлинмаси раиси Баҳадир Балтабаевлар Ойбек маҳалласида истиқомат қилувчи якка-ю ёлғиз, ижтимой ҳимояга муҳтож аёл Марям Раҳимованинг хонадонида бўлдилар.

Ташриф давомида Турсунбой Абдужабборов онахон билан дилдан суҳбат қуриб, унга соғлиғини тиклаши учун “Нуроний” жамғармаси ҳисобидан пул маблағини топширди.

Шундан сўнг масъуллар туман ҳокими Султонбой Йўлдашев, туман Нуронийлар жамоатчилик Кенгаши раиси ўринбосари Бекман Алламберганов ҳамроҳлигида туманнинг Дурунки маҳалласида истиқомат қилувчи меҳнат фахрийси, мутахассислиги бўйича кўплаб шогирдлар тарбиялаб чиқарган, жамоат ишларида доимо фаол бўлиб, бугунги кунда ҳам фахрий жамоатчи сифатида ёшларга ўрнак бўлиб келаётган отахон Бахрам Жуманиязовнинг хонадонига ташриф буюрдилар.

Маъулумки, Президентимизнинг “Меҳнат фахрийси” кўкрак нишонини таъсис этиш тўғрисида”ги қарорига кўра турли соҳаларда кўп йиллар ҳалол ва самарали меҳнат қилган нафақадаги фахрийлар муносиб тақдирланяпти.

Ўзбекистон фахрийларининг ижтимоий фаолиятини қўллаб-қувватлаш “Нуроний” жамғармаси Васийлик Кенгашининг 2022 йил 6 май кунги қарори билан амударёлик 3 нафар нуронийлар, жумладан, қишлоқ хўжалиги соҳаси фахрийси Қосим Наметов ва Қорақалпоғистонда хизмат кўрсатган маданият ходими Гулмирза Нурматовлар I даражали, Қорақалпоғистонда хизмат кўрсатган саноат ходими Бахрам Жуманиязов II даражали “Меҳнат фахрийси” кўкрак нишони билан тақдирланган эди.

Шу куни Маҳалла ва нуронийларни қўллаб-қувватлаш вазири ўринбосари Турсунбой Абдужаббаров Бахром Жуманиёзовнинг кўп йиллик самарали меҳнатларини эътироф этиб, II даражали “Меҳнат фахрийси” кўкрак нишонини тантанали тарзда топширди. Шунингдек, меҳнат фахрийсига бир марталик пул мукофоти ва туман ҳокими Султонбой Йўлдошев томонидан эсдалик совғалари ҳам топширилди.

Айтиш керакки, жамиятимиз файзи бўлган нуроний ва кексаларимизга муносиб эътибор кўрсатиш бўйича янгича ёндашув кўзланган натижани бериб, “инсон қадри учун” ғоясини тўла рўёбга чиқаришда муҳим омил бўлиб хизмат қилаётир.

Туман ҳокимлигининг Ахборот хизмати.