Qoraqalpogʻistonda xizmat koʻrsatgan sanoat xodimi Baxram Jumaniyazov II darajali “Mehnat faxriysi” koʻkrak nishoni bilan taqdirlandi

Obod va fayzli mahalla – yurt koʻrki. Mahallalar ravnaqi mamlakatimiz taraqqiyoti, yorugʻ kelajagimizning mustahkam kafolati, poydevoridir.

Shu maʼnoda Mahalla va nuroniylarni qoʻllab-quvvatlash vazirligining tashkil etilishi va ushbu vazirlik tomonidan mahalla insitutini yanada rivojlantirish, keksa avlod vakillarini qoʻllab-quvvatlash, ularga alohida hurmat va eʼtibor koʻrsatish borasida koʻplab ijobiy ishlar amalga oshirilayotgani ayni haqiqatdir.

Amudaryo tumanida ham keksalarga boʻlgan eʼtibor masʼul tashkilotlarning doimo diqqat markazida boʻlib kelgan.

11-avgust kuni Qoraqalpogʻiston Respublikasi Mahalla va nuroniylarni qoʻllab-quvvatlash vaziri oʻrinbosari Tursunboy Abdujabborov, tuman Mahalla va nuroniylarni qoʻllab-quvvatlash boʻlimi boshligʻi maslahatchisi, “Mahalla” xayriya jamoat fondi tuman boʻlinmasi raisi Bahadir Baltabayevlar Oybek mahallasida istiqomat qiluvchi yakka-yu yolgʻiz, ijtimoy himoyaga muhtoj ayol Maryam Rahimovaning xonadonida boʻldilar.

Tashrif davomida Tursunboy Abdujabborov onaxon bilan dildan suhbat qurib, unga sogʻligʻini tiklashi uchun “Nuroniy” jamgʻarmasi hisobidan pul mablagʻini topshirdi.

Shundan soʻng masʼullar tuman hokimi Sultonboy Yoʻldashev, tuman Nuroniylar jamoatchilik Kengashi raisi oʻrinbosari Bekman Allamberganov hamrohligida tumanning Durunki mahallasida istiqomat qiluvchi mehnat faxriysi, mutaxassisligi boʻyicha koʻplab shogirdlar tarbiyalab chiqargan, jamoat ishlarida doimo faol boʻlib, bugungi kunda ham faxriy jamoatchi sifatida yoshlarga oʻrnak boʻlib kelayotgan otaxon Baxram Jumaniyazovning xonadoniga tashrif buyurdilar.

Maʼulumki, Prezidentimizning “Mehnat faxriysi” koʻkrak nishonini taʼsis etish toʻgʻrisida”gi qaroriga koʻra turli sohalarda koʻp yillar halol va samarali mehnat qilgan nafaqadagi faxriylar munosib taqdirlanyapti.

Oʻzbekiston faxriylarining ijtimoiy faoliyatini qoʻllab-quvvatlash “Nuroniy” jamgʻarmasi Vasiylik Kengashining 2022-yil 6-may kungi qarori bilan amudaryolik 3 nafar nuroniylar, jumladan, qishloq xoʻjaligi sohasi faxriysi Qosim Nametov va Qoraqalpogʻistonda xizmat koʻrsatgan madaniyat xodimi Gulmirza Nurmatovlar I darajali, Qoraqalpogʻistonda xizmat koʻrsatgan sanoat xodimi Baxram Jumaniyazov II darajali “Mehnat faxriysi” koʻkrak nishoni bilan taqdirlangan edi.

Shu kuni Mahalla va nuroniylarni qoʻllab-quvvatlash vaziri oʻrinbosari Tursunboy Abdujabbarov Baxrom Jumaniyozovning koʻp yillik samarali mehnatlarini eʼtirof etib, II darajali “Mehnat faxriysi” koʻkrak nishonini tantanali tarzda topshirdi. Shuningdek, mehnat faxriysiga bir martalik pul mukofoti va tuman hokimi Sultonboy Yoʻldoshev tomonidan esdalik sovgʻalari ham topshirildi.

Aytish kerakki, jamiyatimiz fayzi boʻlgan nuroniy va keksalarimizga munosib eʼtibor koʻrsatish boʻyicha yangicha yondashuv koʻzlangan natijani berib, “inson qadri uchun” gʻoyasini toʻla roʻyobga chiqarishda muhim omil boʻlib xizmat qilayotir.

Tuman hokimligining Axborot xizmati.