БОҚУВЧИСИНИ ЙЎҚОТГАН АЁЛЛАР ФАРЗАНДЛАРИГА МАКТАБ ФОРМАЛАРИ СОВҒА ҚИЛИНДИ

Юртимизда аҳолининг кам таъминланган ва ижтимоий ҳимояга муҳтож қатламини ҳар томонлама қўллаб-қувватлашга бўлган эътибор кун сайин ошмоқда. Бу борадаги Президент ва ҳукумат қарорларига кўра, аҳолининг ушбу қатламига ҳар томонлама ғамхўрликлар кўрсатилмоқда.

Амударё туманида ҳам бу борада секторлар кесимида қатор ишлар амалга оширилиб келинмоқда. Айни кунлардаги мактабларда янги ўқув йили бошланиш арафасида ҳам бу эзгу ишлар давом эттирилиб, кам таъминланган оилалар фарзандларига мактаб формалари, ўқув қуроллари, дарслик ва бошқа китоблар етказиб берилмоқда.

24 август куни Қиличбой овули, яъни 2-сектор ҳудудида яшовчи, "Аёллар дафтари"нинг 3-босқичида рўйхатга олинган, боқувчисини йўқотган ҳамюртларимизнинг хонадонларига сектор раҳбари, туман прокурори Азиз Рўзметов, прокурор ёрдамчиси Аббаз Ниязимбетов ва туман Халқ таълими бўлими мудири Акмал Исмоилов, фуқаролар йиғини раиси Баҳром Қодиров ва бошқалар ташриф буюриб, ҳол-аҳвол сўрашди. Уларнинг фарзандларига мактаб формаси, китоблар ва спорт қуролларини совға қилишди.

Маълумки, жорий йилнинг 31 мартида Вазирлар Маҳкамасининг “Хотин-қизлар муаммоларини ўрганиш ва ҳал этиш тизимини янада такомиллаштириш чора-тадбирлари тўғрисида”ги 145-сонли қарори қабул қилинган эди. Мазкур қарорга асосан “Аёллар дафтари”ни юритиш орқали хотин-қизлар муаммоларини тизимли равишда ҳал этиш ва уларни ижтимоий қўллаб-қувватлаш тартиби тўғрисида Низом ишлаб чиқилди. Ушбу Низомда кам таъминланган ва эҳтиёжманд хотин-қизларнинг муаммоларини маҳаллабай ўрганиш ва ҳал этиш ҳамда уларни ижтимоий-иқтисодий ва ҳуқуқий қўллаб-қувватлаш тартиби белгилаб берилди. Шунга кўра “Аёллар дафтари”га киритилган хотин-қизларга 6 тоифа бўйича алоҳида манзилли ва 3 тоифа бўйича умумий ёрдам кўрсатилиб келинмоқда.

Барча жойларда бўлгани каби 2-сектор ҳудудида ҳам “Аёллар дафтари” рўйхатига киритилган хотин-қизлар 6 та тоифага ажратилиб, уларга манзилли ёрдам кўрсатилмоқда. Ушбу аёлларнинг вояга етмаган фарзандлари, қарамоғида ёшидан қатъий назар I гуруҳ ногиронлиги бўлган фарзандларига даволаш, дори воситалари олиб бериш ва бошқа ёрдамлар кўрсатиш кабилар борасида амалий ишлар йўлга қўйилган.

Сектор раҳбари ва бошқа масъуллар томонидан ўз фарзандларига кўрсатилган ғамхўрликдан ниҳоятда мамнун бўлган аёллар бундай эътибор учун Президентимизга, ҳомийларга миннатдорчилик билдиришди.

Янги ўқув йили бошланиши арафасидаги шу кунларда бозорларда ота-оналар фарзандларига мактаб формаси, ўқув қуролларини, спорт кийимлари ва бошқа зарур нарсаларни олиб бериб, уларни хурсанд қилишмоқда. Бундай кезларда кам таъминланган, ижтимоий ҳимояга муҳтож оилаларда вояга етаётган ва боқувчисини йўқотган аёлларнинг ўғил-қизларга ғамхўрлик қилиш, уларнинг кўнглини кўтаришнинг савоби ниҳоятда улуғ.

Совғаларга эга бўлган болажонлар ҳам эртага бошқа тенгдошлари қатори янги ўқувчи формаларида мактабга отланиб, жорий ўқув йилини кўтаринки руҳ билан бошлашади.

Озода Худойберганова.