BOQUVChISINI YOʻQOTGAN AYoLLAR FARZANDLARIGA MAKTAB FORMALARI SOVGʻA QILINDI

Yurtimizda aholining kam taʼminlangan va ijtimoiy himoyaga muhtoj qatlamini har tomonlama qoʻllab-quvvatlashga boʻlgan eʼtibor kun sayin oshmoqda. Bu boradagi Prezident va hukumat qarorlariga koʻra, aholining ushbu qatlamiga har tomonlama gʻamxoʻrliklar koʻrsatilmoqda.

Amudaryo tumanida ham bu borada sektorlar kesimida qator ishlar amalga oshirilib kelinmoqda. Ayni kunlardagi maktablarda yangi oʻquv yili boshlanish arafasida ham bu ezgu ishlar davom ettirilib, kam taʼminlangan oilalar farzandlariga maktab formalari, oʻquv qurollari, darslik va boshqa kitoblar yetkazib berilmoqda.

24-avgust kuni Qilichboy ovuli, yaʼni 2-sektor hududida yashovchi, "Ayollar daftari"ning 3-bosqichida roʻyxatga olingan, boquvchisini yoʻqotgan hamyurtlarimizning xonadonlariga sektor rahbari, tuman prokurori Aziz Roʻzmetov, prokuror yordamchisi Abbaz Niyazimbetov va tuman Xalq taʼlimi boʻlimi mudiri Akmal Ismoilov, fuqarolar yigʻini raisi Bahrom Qodirov va boshqalar tashrif buyurib, hol-ahvol soʻrashdi. Ularning farzandlariga maktab formasi, kitoblar va sport qurollarini sovgʻa qilishdi.

Maʼlumki, joriy yilning 31-martida Vazirlar Mahkamasining “Xotin-qizlar muammolarini oʻrganish va hal etish tizimini yanada takomillashtirish chora-tadbirlari toʻgʻrisida”gi 145-sonli qarori qabul qilingan edi. Mazkur qarorga asosan “Ayollar daftari”ni yuritish orqali xotin-qizlar muammolarini tizimli ravishda hal etish va ularni ijtimoiy qoʻllab-quvvatlash tartibi toʻgʻrisida Nizom ishlab chiqildi. Ushbu Nizomda kam taʼminlangan va ehtiyojmand xotin-qizlarning muammolarini mahallabay oʻrganish va hal etish hamda ularni ijtimoiy-iqtisodiy va huquqiy qoʻllab-quvvatlash tartibi belgilab berildi. Shunga koʻra “Ayollar daftari”ga kiritilgan xotin-qizlarga 6 toifa boʻyicha alohida manzilli va 3 toifa boʻyicha umumiy yordam koʻrsatilib kelinmoqda.

Barcha joylarda boʻlgani kabi 2-sektor hududida ham “Ayollar daftari” roʻyxatiga kiritilgan xotin-qizlar 6 ta toifaga ajratilib, ularga manzilli yordam koʻrsatilmoqda. Ushbu ayollarning voyaga yetmagan farzandlari, qaramogʻida yoshidan qatʼiy nazar I guruh nogironligi boʻlgan farzandlariga davolash, dori vositalari olib berish va boshqa yordamlar koʻrsatish kabilar borasida amaliy ishlar yoʻlga qoʻyilgan.

Sektor rahbari va boshqa masʼullar tomonidan oʻz farzandlariga koʻrsatilgan gʻamxoʻrlikdan nihoyatda mamnun boʻlgan ayollar bunday eʼtibor uchun Prezidentimizga, homiylarga minnatdorchilik bildirishdi.

Yangi oʻquv yili boshlanishi arafasidagi shu kunlarda bozorlarda ota-onalar farzandlariga maktab formasi, oʻquv qurollarini, sport kiyimlari va boshqa zarur narsalarni olib berib, ularni xursand qilishmoqda. Bunday kezlarda kam taʼminlangan, ijtimoiy himoyaga muhtoj oilalarda voyaga yetayotgan va boquvchisini yoʻqotgan ayollarning oʻgʻil-qizlarga gʻamxoʻrlik qilish, ularning koʻnglini koʻtarishning savobi nihoyatda ulugʻ.

Sovgʻalarga ega boʻlgan bolajonlar ham ertaga boshqa tengdoshlari qatori yangi oʻquvchi formalarida maktabga otlanib, joriy oʻquv yilini koʻtarinki ruh bilan boshlashadi.

Ozoda Xudoyberganova.