“Таълим мазмунига эътибор” мавзусида Республика амалий семинари бўлиб ўтди

Шарқ ҳикматларида “Агар инсон илм нури билан ўз йўлини ёритмаса, зулмат ва нодонлик кўчасида қолади” дея бежиз таъкидланмаган. Киши қалбининг нури илм ва маърифат билан бақувват бўлади. Инсониятнинг қадри ҳам илм билан ҳосил бўлади. Илмни эгаллаб олиш эса таълимдаги бир санъатга қиёсланади.

Таълим мазмун ва моҳиятан жамиятнинг моддий ва маданий тараққиёти даражасига бориб тақалади. Умумий ва соҳавий билимларга бўлган эҳтиёж, таълим ҳақидаги педагогик ғоялар жамият тараққиётининг турли босқичларида турлича аҳамият касб этиб, ўзгариб келган. Жамиятнинг асосий негизи бўлган таълим ва тарбия жараёнида инсоннинг сифатлари, дунёқараши ва турли хил қобилиятлари шаклланиб, ўсиб боради.

Бугунги кунда мамлакатимизда таълим-тарбияга қаратилаётган эътибор натижаси ўлароқ Ўзбекистонда маънан баркамол, интеллектуал салоҳиятга эга ёшлар етишиб чиқмоқда.

Бу борада педагог кадрларнинг салоҳиятини янада ошириш, таълимдаги сўнгги янгиликлардан бохабар бўлишлари учун ўтказилиб келинаётган кўплаб семинар-тренинглар, форумлар катта аҳамиятга эга.

26 август куни Амударё туманидаги 40-сонли умумтаълим мактабида “Таълим мазмунига эътибор” мавзусида Республика амалий семинари бўлиб ўтди.

Семинарда Амударё тумани Халқ таълими бўлими мудири ўринбосари Ибрагим Ражабов, Беруний тумани таълим сифати маниторинги бўлими инспектор-методистлари Ботир Юлдашев, Маҳмуд Раззақов, Кегейли тумани таълим сифати маниторинги бўлими инспектор-методисти Мамбетали Торемуратов, Амударё тумани таълим сифати маниторинги бўлими инспектор-методисти Райхон Якубовалар тренерлик қилишди.

Амударё туманидаги мавжуд 85 та ҳамда Беруний туманидан ташриф буюрган 72 та мактабнинг ўқув ишлари бўйича директор ўринбосарларига таълим сифати юқори бўлмаган мактабларнинг таълим сифатини янги ўқув йилида самарали йўлга қўйиш, “Ягона электрон тизими − erp.maktab.uz” дасутурий мажмуасини мактабларга жорий қилиш, педагог кадрлар салоҳиятини ошириш, янги ўқув йилидаги дарс тақсимоти, Халқаро тадқиқотларга тайёргарлик кўриш ва муносиб иштирок этиш бўйича батафсил маълумот ва тушунтиришлар бердилар.

Шунингдек, умумтаълим мактабларда ўқув ишлари бўйича директор ўринбосарларининг таълим сифатини оширишга қаратилган келгусидаги асосий вазифалари ва уларнинг масъулияти ҳақида, янги ўқув режа ва янги авлод дарсликлари ҳақида тушунтиришлар берилиб, келгусидаги муҳим вазифалар белгилаб олинди.

Семинар иштирокчилари тренерларга ўзларини қизиқтирган саволлар билан мурожаат қилиб атрофлича жавоблар олдилар.

Туман ҳокимлигининг Ахборот хизмати.